YEHEZKIEL 28 - WUKE SUSI WATTI'U AL᷊AL᷊USASSA

Ratun Tirus niṛṛuumanna

¹ Mawu nabbisara si ya'u,

² “Ei taumata apan mattate, wal᷊oa'e si ratun Tirus, apa apan i Ya'u Mawu Apan Atanggaṛṛanne mabbal᷊o si tou, ‘Ringannu mawunga i'o mangngantimma i'o monganna apan ua'ianna su pattangngannu tahal᷊oangnga. Wotongnge lai i'o mamunga ere monganna, arawe paanaunge, i'o tumba'u taumata wiasa.

³ Sunnanu i'o mappandeanna wuassi Danel, na'oman sara tawe addapingnga apan uawuni si'o.

⁴ I'o napa'attu asingkatta wuṛṛu pasasunnanu ipangammulu darotongnga, wul᷊awanna wuṛṛu sal᷊a'a.

⁵ Atonna, i'o pande maddagangnga wuṛṛu orassa indi naalate, wuṛṛu pa'aalanu udde naaola'a si'o mawunga!’ ”

^6-7 Mawu Apan Atanggaṛṛanne nabbisara, “Ei Tirus, ana waugu i'o massunna watangannu ere lai Ruata, i Ya'u sarun mandolokku tantara waine apan lembon maṛṛagissa iapapangalo si'o. I mangitou sarun makkimunsa'a al᷊awo'u araṛṛansangu apan buatte niolangngu ana waugu al᷊amattu asingkannu wuṛṛu pasasunnunanu.

⁸ I'o sarun pateanna wuṛṛu ilabbinga sulal᷊ummu tahal᷊oangnga.

⁹ Ne, napawe nia'omante tempone udde, ta'e wotongngewe i'o mabbisara manungku i'o Ruata? Su saruannu manga mamamatenu, nasemakke manungku i'o tumba'u taumata wiasa.

¹⁰ I'o sarun mate ere lai taumata dal᷊ebone ana waugu nipaten taumata raho apan tawe maaillal᷊a Ruata. I Ya'u, Mawu Apan Atanggaṛṛanne buatte nabbisara.”

Ananawo ratun Tirus

¹¹ Mawu nabbisara apia si ya'u, wisara-Ne,

¹² “Ei taumata apan mattate, lalluaite si ratun Tirus. Pasingkata'e apa apan i Ya'u, Mawu Apan Atanggaṛṛanne mabbisara si tou, ‘I'o buatte naola'a waneṛṛan asasuungnga; dorone i'o mangke pande wuṛṛu maṛṛamaga!

¹³ Tampa atatanaannu su Eden, wawail᷊annu Ruata. Laungngu lal᷊ogaṛṛannu al᷊awo'u permata: watun delima wuṛṛu intan, topas, watu pirus, watu yakut, ratna, cempaka, watu nilam, zamrud wuṛṛu watu alkali maṛṛamu. Lal᷊ogakka wul᷊awannu lai manambo. Manga saranapa udde niola'a hausannu su allo i'o niriaddi.

¹⁴ Mala'ekatta apan maata'utta Ta'u iaddo isudde iapariagga si'o. I'o uatana'a su wowone-U apan na'ukkassa wuṛṛu u'amatta su pattangngannu watu permata apan lullendappa.

¹⁵ Pallal᷊agunu nasuungnga ro'en i'o niriaddi na'oman sara i'o mannattakke ma'ola'a al᷊al᷊eo.

¹⁶ I'o tawe atanaanne mabbal᷊u'a, wuṛṛu eteudde apan nangapiddu watukku araṛṛagissa wuṛṛu rosa. Ne i'o Ta'u nilimbuaṛṛanna wuassu wowone-U apan na'ukkassa, wuṛṛu mala'ekatta uariaga si'o nallimbuakka si'o wuassu pattangngannu permata apan lullendappa udde.

¹⁷ Hatinu apan maṛṛamaga naa'ola'a si'o mawunga wuṛṛu atatelengnga naaola'a si'o mammanara woddo. Ana waugu udde i'o Ta'u iwantinga su leta'a wuṛṛu Ta'u olaanna pananaunganna su manga ratu waine.’ ”

¹⁸ Mawu nabbisara, “Ei Tirus, i'o nandal᷊eo manga tampa patataṛṛamawuannu ana waugu manga pasasal᷊a wuṛṛu pallal᷊inga sutempo uawawalli. Ana waugu udde i'o Ta'u tutunganna ma'oman sara mappatakku leta'a. Anambon taumata apan ma'ellega si'o tumba'u ma'asilo awu.

¹⁹ I'o nawul᷊ite saran mal᷊annu-l᷊annu. Anambon walahanna apan masingkannu nabbal᷊i mangngindo ana waugu matta'utta maola'a lai ere i'o.”

Nubuatta su ola'u ṛuumanna su Sidon

²⁰ Mawu nabbisara si ya'u,

²¹ “Ei taumata apan mattate, wontehete soa Sidon.

²² Pasingkata'e su tumanangnge manungku i Ya'u Mawu Apan Atanggaṛṛanne mabbisara si mangitou, ‘I Ya'u indi seennu, ei Sidon. Manga taumata sarun maddalo si Ya'u ana waugu inolaang-Ku su saruannu. Sutempo i Ya'u nakkuumannu tumanangngu, i mangitou sarun maasingkatta manungku ete i Ya'u Mawu apan na'ukkassa.

²³ I Ya'u sarun mandantan al᷊aṛṛusa'itta, wuṛṛu mamalan daṛṛa mangngelekka su manga lal᷊annu. I'o sarun pangaloannu seetta wuassu al᷊awo'u pappi'uanne, wuṛṛu tumanangngu sarun pateanna. Ne i'o masingkatte manungku ete i Ya'u Mawu.’ ”

Israel sarun al᷊amatanna

²⁴ Mawu nabbisara, “Manga wanua al᷊indonganne apan buatte nallobbossa Israel, tate maola'a sambau roa'a wuṛṛu larangnga apan maataddu'a Israel. I mangitou sarun maatutukka manungku ete i Ya'u Mawu Apan Atanggaṛṛanne.”

²⁵ Mawu Apan Atanggaṛṛanne nabbisara, “I Ya'u sarun mangammullu manga taumatan Israel wuassu manga wanua marau sutampa i mangitou apan buatte Ta'u nisal᷊iawukka, wuṛṛu anambon balahanna sarun maasingkatta i Ya'u na'ukkassa. Walahannu Israel sarun matana'a apia su leta'i mangitou sassane, leta'a apan buatte Ta'u nionggolla si allang-Ku Yakub.

²⁶ I mangitou sarun mabbiakka ringannu matammudda isudde wuṛṛu mapararisikku manga wal᷊en see ma'ola'a manga waillu anggore. I Ya'u sarun makkuumannu anambon al᷊indonganni mangitou apan buatte nangal᷊uandaga si mangitou, ma'oman sara Israel maola'a mal᷊angnganna. Ne i mangitou masingkatte manungku ete i Ya'u, Mawu Ruata mangitou.”