YEHEZKIEL 26 - WUKE SUSI WATTI'U AL᷊AL᷊USASSA

Nubuatta su ola'u ṛuumanna su Tirus

¹ Su allo paarorone wul᷊anna sulal᷊ummu tonna mapul᷊oassa sutempo i yami niwuangnga, Mawu nabbisara si ya'u,

² “Ei taumata apan mattate, tumana'u Tirus buatte naggio lapiddu mabbisara, ‘Yerusalem naṛṛimunsa'e! Auatanne sulal᷊ummu madagangnga nawul᷊ite! I tou tate maola'a ro'appi ite lai!’ ”

³ Mawu Apan Atanggaṛṛanne nabbisara, “I Ya'u indi seennu, ei Tirus! I Ya'u sarun mangapiddu manambo walahanna iapapangalo si'o, wuṛṛu i mangitou sarun dumanta naal᷊ihidda lua'a su tahal᷊oangnga.

⁴ I mangitou sarun makkimunsa'a manga darandungngu soanu wuṛṛu mapaṛṛa'a manga menaranu. Al᷊awo'u leta'a apan poiaroddi sarun Ta'u insueanna ma'oman sara mallambe tumba'u sambau watu lol᷊okka su tangngan tahal᷊oangnga.

⁵ Manga samakka sarun mamatin soma mangitou su wowon batu udde. I Ya'u Mawu Apan Atanggaṛṛanne buatte nabbisara. Tirus sarun maola'a inassu anambon balahanna.

⁶ I mangitou sarun mangaṛṛo see mamate tumana'u manga soa su leta'u ammarannu Tirus. Ne tumana'u Tirus naasingkatte manungku ete i Ya'u Mawu.”

⁷ Mawu Apan Atanggaṛṛanne nabbisara, “I Ya'u sarun mangapiddi Ratu Nebukadnezar wuassu Babel iapapangalo si'o, ei Tirus. Ratu apan atohasanne udde sarun dumanta wuassu sawannakka ringannu tantara apan bahewalla, ringannu manambo awal᷊o wuṛṛu manga keretan pangalo see lai tantara uasa'e awal᷊o.

⁸ Manga tumana'a su al᷊awo'u soa su leta'a ratakke sarun pateanna sulal᷊ummu pangalo udde. Seetta sarun maal᷊i manga hote pattillindumanna, wuṛṛu mangombo manga darandungnga pamangaloanna wuṛṛu mangatokku manga allungnga wahewalla apan ipaatti mangitou maola'a tanda'a batu ipamangalo si'o.

⁹ I mangitou sarun manggohakku manga darandungngu ringannu manga ahidda wuṛṛu mapaṛṛa'a manga menaranu ringannu manga aal᷊iatta'a.

¹⁰ Manga awal᷊o mangitou aroddi anambone, na'oman sara lempangne naaola'a awu pasi talla'a apan uaoossa si'o. Tingikka maddallu'a wuassu tantara uasa'e awal᷊o apan uawol᷊engnga keretan bal᷊unna wuṛṛu keretan pangalo sarun mapangio'u manga darandungngu sutempo i mangitou umamattu manga ngara pasallangannu soa apan naola'e manga tuidda udde.

¹¹ Tantara uasa'e awal᷊o udde sarun mangampangnga su manga lal᷊annu wuṛṛu mamate tumanangngu ringannu hal᷊ele mangitou. Manga tugunu apan maṛṛansanga wuṛṛu matohassa sarun iapaaṛṛa'a.

¹² Manga seennu udde sarun mangaṛṛo al᷊awo'u pa'aala wuṛṛu wal᷊u'annu. I mangitou sarun makkimunsa'a manga darandungngu wuṛṛu mapaṛṛa'a manga wal᷊enu apan mapia. I mangitou sarun manganu manga watune, manga pappalla wuṛṛu letangnge, wua'udde niramme su tahal᷊oangnga.

¹³ I Ya'u sarun mapaaddo al᷊awo'u antarinu wuṛṛu musikku kecapinu.

¹⁴ Apan Ta'u itantangnga tumba'u sambau watu apan lol᷊okka, tampa manga samakka mammatin soma mangitou. Soa udde ta'e iapararisikka apia. I Ya'u, Mawu Apan Atanggaṛṛanne buatte nabbisara.”

¹⁵ Mawu Apan Atanggaṛṛanne nabbisara su soa Tirus, “Tumana'u leta'u salleanna sarun mangindon atata'utta napawe maaringikka hahuressan awawadonu wuṛṛu aintul᷊i manga taumata apan tantal᷊anna laṛṛatanna.

¹⁶ Naasilo pal᷊addu pabbiaṛṛannu, manga ratu waussu manga walahanna su winggin sahatta sarun dumarisikka wuassu adderan araratuanna, malluatta juban araratuanna wuṛṛu laubbi mangitou apan pia sujine, see inuma'ianna mangngindo su leta'a. I mangitou lembon matta'utta na'oman sara tawe matammudda.

¹⁷ Wua'udde i mangitou mangantarin aantari pallal᷊abinga indi si'o: Naṛṛimunsa'e soa apan raddal᷊oanna! Al᷊awo'u apalla nisahangginna wuassu laudda. Tumanangnge dorone uataṛṛino su tahal᷊oangnga na'oman sara taumatan sahatta matta'utta.

¹⁸ Orassa indi, sutempo i'o niawaddo, tumana'u manga taṛṛanusa mangngindo. Niṛṛumindu'e i mangitou sarangkanambone naasilo araṛṛimunsa'a apan tawe iaṛṛangngo.”

¹⁹ Mawu Apan Atanggaṛṛanne nabbisara, “I'o ta'u olaanna mal᷊annaba ere soa apan tawe tumanangne. I Ya'u sarun manaappa si'o ringannu ua'e wuassu wantan laudda.

²⁰ Ana see i'o Ta'u iiringnga watukku runian taumata nate tadea'u iapaammulu manga taumata wuassu tempon al᷊amona. Ta'u iwala i'o mamanua su runian taumata nate udde, su pattangngannu lanna'u winalalanna sarangkalo'engnge, suadio'a ringannu taumata nate. Ne letangngu tate atanaanna apia, wuṛṛu i'o tate ireengnga suwallattu taumata wiakka.

²¹ I'o Ta'u olaanna tul᷊adda apan ma'ata'utta, wuṛṛu eteudde panginsueannu pabbiaṛṛannu. Manga taumata sarun maddea'a si'o, arawe i'o tate asombanganna. I Ya'u Mawu Apan Atanggaṛṛanne buatte nabbisara.”