YEHEZKIEL 21 - WUKE SUSI WATTI'U AL᷊AL᷊USASSA

Hal᷊ele Mawu

¹ Mawu nabbisara si ya'u, wisara-Ne,

² “Ei taumata apan mattate, wontohete Yerusalem. Wontohete manga tampa patataṛṛamawuanna poiaroddi. Panaunga'a su taumatan Israel,

³ manungku i Ya'u, Mawu, nabbisara arendi, ‘I Ya'u indi seennu. I Ya'u sarun manawutta hal᷊ele-U wuṛṛu mamate si yamiu sarangkanambone, apan dal᷊eo ara'e lai mapia.

⁴ Ringannu hal᷊ele-U sarun Ta'u ro'apanna anambon taumata wuassu sawannakka maddatingngu timukka.

⁵ Ne anambon taumata sarun maasingkatta manungku i Ya'u, Mawu, manawutta hal᷊ele-U wuṛṛu tate iaddo apia suṛṛomane.’

⁶ Ei taumata apan mattate, sassal᷊iomante wuṛṛu pa'uarete su saruannu manga taumatan Israel, ereola'u i'o massusa wuṛṛu tawe antimma.

⁷ Amungkangngu i mangitou maiwal᷊o anio i'o ma'u are, wal᷊oa'e manungku i'o massusa ana waugu watti'a apan sarun dumanta. Watti'a udde sarun maaola'a naungngi mangitou mata'utta, lima mangitou mallome, wuṛṛu wu'u mangitou mangngiladda, i mangitou sarun apadiannu ikkatta. Atonna tempone nia'omante, wuṛṛu sarangkanambone udde sarun mariaddi. I Ya'u Mawu Apan Atanggaṛṛanne buatte nabbisara.”

⁸ Mawu nabbisara si ya'u,

⁹ “Ei taumata apan mattate, pamani'atte! Pasingkata'e su manga taumata manungku i Ya'u, Mawu nabbisara arendi, ‘Pia sambau hel᷊ele, hal᷊ele niasa wuṛṛu niapaaṛṛoro.

¹⁰ I tou niapaṛṛoro tadea'u wotongnge maapate, nilaukka tadea'u lullendappa. Su uma-U tate lai al᷊al᷊uassa ana waugu anambon sasingadda wuṛṛu ṛuumanna a'appisanni mangitou.

¹¹ Hal᷊ele udde niasa tadea'u sidutu nasaddiate ipaatta ana see itantilla su sangkatou taṛṛa pototta.

¹² Ei taumata apan mattate, lalluaite wuṛṛu sal᷊andete! Ana waugu hal᷊ele udde nasaddiate lumawangnga uma-U. Manga piaṛṛa'u Israel suadio'a ringannu ahewallu walahanna sarun usu'annu hal᷊ele udde ma'oman sara mate. Ne pameppelle roonu ringannu massusa,

¹³ ana waugu i Ya'u tantal᷊anna mannal᷊u'atta uma-U, amungkangngu i mangitou maddiri mangapia pallal᷊agune, sarangkanambone udde sarun mariaddi si mangitou.’

¹⁴ Ne, taumata apan mattate, lalluaite. Pattal᷊o'appe, maola'a tatiala su hal᷊ele udde tadea'u manattakke maṛṛata. Hal᷊ele udde lembon maata'utta.

¹⁵ I tou na'ola'a walahang-Ku matal᷊o wuṛṛu maddamangnga iattara. I Ya'u namansaggu soa mangitou ringannu hal᷊ele udde apan lullendappa ere sawallo, wuṛṛu nasaddiate mamate.

¹⁶ Ei hal᷊ele apan maṛṛoro, paṛṛawate watukku aikkatanna wuṛṛu aiṛṛi, wuṛṛu watuakku tampa walate apulunu.

¹⁷ I Ya'u sarun mattal᷊o'appa lai, ana see asasa'u-U sarun umompo'a. I Ya'u, Mawu buatte nabbisara.”

Hal᷊elen ratun Babel

¹⁸ Mawu nabbisara si ya'u, wisara-Ne,

^19-20 “Ei taumata apan mattate, hambara'e darua lal᷊anna apan botongne amatannu ratun Babel apan mangapiddu hel᷊elene. Lal᷊anna darua udde ṛinone manattakka wuassu wanua apan sambau; lal᷊anna sambau mabatukku Raba, soan Amon; wuṛṛu sambau lai watukku Yerusalem, soa apan pia tanda'a batune su Yehuda. Elea'e papappalla ipamiaṛṛa'u umaamatta su lal᷊anna apan mappengate.

²¹ Ratun Babel uarisikka maranin pappalla ipamantingiddu lal᷊anna udde. Tadea'u maasingkatta lal᷊anna udde i tou naddorongnga tatantiro wuassu manga paal᷊uanne, nanampukku anaanna wuṛṛu namarikissa aten binatangnga apan wakku nionggolla sasamba.

²² Inauranna manungku anaanna apan nianun lima aikkatanne pia tatialan Yerusalem! Udde atappasanne manungku ratu ṛinone mamangalo soan Yerusalem, manggoressan pangalo wuṛṛu mandolokku tantarane mangatokku ahidda ipanggohakka, itaingnga su manga ngaran Yerusalem, mangombon leta'a maola'a darandungnga pamangaloanna wuṛṛu maal᷊i manga hote.

²³ Tumana'u Yerusalem tawe mangimanna manungku i mangitou pappangaloanna, ana waugu i mangitou buatte na'ola'a paaire ringannu Babel. Arawe pani'atta indi sarun mapanaungngi mangitou manungku i mangitou sarun sametanna ana waugu manga rosa mangitou.

²⁴ I Ya'u, Mawu Apan Atanggaṛṛanne nabbisara si mangitou, ‘Manga rosanu niasingkatante wuṛṛu anambon taumata masingkatta manungku i yamiu nassal᷊a. Al᷊al᷊eone niasiloanna sulal᷊ummu anambon ala'uannu. Orassa indi nia'omante tempone i yamiu iṛṛuumanna wuṛṛu i yamiu sarun Ta'u itantilla su seennu.’

²⁵ Wuṛṛu su ratun Israel i Ya'u mabbisara, ‘Ei ratu apan dal᷊eo wuṛṛu mal᷊awangnga! Tempo ipakkuumanna panginsueanne maranite.

²⁶ I Ya'u, Mawu Apan Atanggaṛṛanne buatte nabbisara. Luatte mahkotanu wuṛṛu wu'ate paporongngu. Orassa indi, tempo nawal᷊ute saṛṛene. Ola'e paapia taumata asiangnga wuṛṛu i mangitou onggol᷊eten taṛṛino! Lintuṛṛa'e manga tembonanne wuassu aiananne!

²⁷ Soa indi sarun Ta'u ṛamunsaanna sara masue, na'oman sara suapan tampa pia manga winalal᷊anna. Arawe olangnge udde wakkute mariaddi napawe taumata apan Ta'u nipile ipakkuumannu soa indi nirumantate. Ete si tou Ta'u itantilla soa indi.’ ”

Hal᷊ele wuṛṛu taumatan Amon

²⁸ “Ei taumata apan mattate, pani'atte! Pasingkata'e su taumatan Amon apan buatte nallobbossa Israel, manungku i Ya'u, Mawu Apan Atanggaṛṛanne nabbisara, ‘Halele sammata nariahite ipamate; hal᷊ele udde buatte niasa lullendappa ere sawallo, tadea'u nasaddiate ipamate.

²⁹ Aellega apan niasiloanni yamiu udde palassu, wuṛṛu pani'atta apan iwabbalong kamiu udde lai wawahia wuṛṛu awusu. I yamiu lal᷊eo wuṛṛu mal᷊awangnga, wuṛṛu tempo ipakkuumannu apan panginsueanne maranite. Hal᷊ele udde sarun maṛṛata ullekkanu.

³⁰ Ei taumatan Amon, suṛṛia'e apia hal᷊elenu su ṛomane! I yamiu sarun Ta'u iṛṛuumanna su tampang kami nariaddi wuṛṛu niasungkanga.

³¹ I Ya'u sarun mapassabbangu asasa'u-U apan lukkenggamma si yamiu. Wuṛṛu i yamiu sarun Ta'u itantilla su manga taumata apan maṛṛagissa wuṛṛu nal᷊atite mammate.

³² I yamiu sarun masue iepoddu putungnga. Daṛṛanu sarun mangelekka su wanuanu sassane, wuṛṛu tawe saran sangkatou lai apan ta'e maanaungnga si'o. I Ya'u Mawu buatte nabbisara.’ ”