YEHEZKIEL 2 - WUKE SUSI WATTI'U AL᷊AL᷊USASSA

¹ nabbisara, “Ei taumata apan mattate, darisikke. I ya'u mappulu maggahattonu.”

² Sutempo i ya'u naaringikka tingikka udde, sinumuttate Ghaṛṛahon Duata sulal᷊ummu wadangku, wuṛṛu nitul᷊idde i ya'u. Wua'udde i ya'u naaringikka apia tingikka udde nabbisara,

³ “Ei taumata apan mattate, i'o Ta'u irolokka inai ringannu manga taumatan Israel apan lullawangnga si Ya'u. I mangitou udde lullawangnga ere iupungngi mangitou lai.

⁴ I mangitou puane maatikka wuṛṛu tawe mangadatta si Ya'u. I'o Ta'u irolokka inai ringanni mangitou iapapasingkatta apa apan i Ya'u, Mawu Apan Atanggaṛṛane mabbisara si mangitou,

⁵ tanne i mangitou mappulu maddaringikka ara'e maddiri; apan apianne, i mangitou ṛinone maasingkatta manungku pia nabi su pattangnganni mangitou.

⁶ Arawe i'o, ei taumata apan mattate, arie mata'uttu manga lumal᷊awangnga udde, ara'e manga apa apan iwisara mangitou. I mangitou sarun lumawangnga wuṛṛu mangadio'a si'o, na'oman sara ereola'u i'o mabbiakka su pattangngannu kalajengkinga. Salaiwe aroddi, arie paata'utta.

⁷ Pasingkata'e anambon tanata-U si mangitou, tanne i mangitou mappulu maddaringikka ara'e maddiri. Naungete manungku i mangitou udde manga lumal᷊awangnga.

⁸ Ei taumata apan mattate, paddaringi'o apa apan iwisara-U si'o. Arie mallaṛṛenggenna lumawangnga lai. Wu'ate moṛṛongngu wuṛṛu ante apa apan Ta'u ionggolla si'o.”

⁹ Wua'udde i ya'u naasilo ta'iakka apan ual᷊ul᷊ukka si ya'u. Sulal᷊ummu ta'iakka udde pia buke lalul᷊unanna,

¹⁰ apan wawoṛṛetanna su ruam ba'ane. See niwu'ate wuke lalul᷊unanna udde wuṛṛu isudde uawoṛṛetta lal᷊uai, sasal᷊iomanna wuṛṛu sasal᷊ande.