YEHEZKIEL 16 - WUKE SUSI WATTI'U AL᷊AL᷊USASSA

Yerusalem apan mal᷊awangnga

¹ Mawu nabbisara apia si ya'u,

² “Ei taumata apan mattate, pasiloa'e su Yerusalem manga inolaanna lal᷊eo apan buatte niola'i mangitou.”

³ Mawu Apan Atanggaṛṛanne nandolo'u niapapasingkattu tanata indi su Yerusalem, “Ei Yerusalem, i'o nasungkangnga su leta'u Kanaan. Iamangngu taumatan Amori wuṛṛu inangngu taumatan Het.

⁴ Sutempo niasungkangnga taweddu namototta pusiddu, ara'e nandeno si'o, ara'e namuṛṛan asimma, ara'e nangoossu nasa.

⁵ Tawe saran sangkatou apan niumakkannu na'oman sara ma'ola'a olangnge udde si'o. Sutempo i'o niasungkangnga, taweddu umakkannu si'o, ewe'e i'o lai niramme su wailla.

⁶ Wua'udde sinumabbite i Ya'u wuṛṛu naasilo si'o tuttambul᷊ilinga sulal᷊ummu laikku daṛṛanu, arawe i Ya'u tawe namala i'o mate.

^7-9 I Ya'u nanganu ua'e ana see Ta'u niukkassa daṛṛa wuassu waddangngu. Ta'u niraddassa awangngu ringannu lanan zaitun. Ta'u niwuwunna i'o ere sasuanna apan masuwukka. I'o tinumuwo mal᷊ihakka, sehatta wuṛṛu mal᷊angkassa, see naola'a sangkatou maṛṛuala. Susunu mannattakke tuttuwo wuṛṛu utangngu mal᷊o'engnga, arawe i'o tantol᷊e. Sutempo i Ya'u sinumabbi apia, i Ya'u naasilo manungku nia'omante tempone matatunanga. Ta'u niluṛṛe juba-U su waddangngu apan uatantol᷊e, wuṛṛu Ta'u pina'ire pattatunga-U si'o. Ore, i Ya'u na'ire paa'awingnga ringannu, wuṛṛu i'o mabbal᷊i tatahuanang-Ku. I Ya'u, Mawu Apan Atanggaṛṛanne buatte nabbisara.

¹⁰ Wua'udde Ta'u niluṛṛe si'o laubba apan nikarawanga, sapatu wuassu pisi apan aal᷊usanne, wawa'issu pua wuassu linen wuṛṛu juba sutra.

¹¹ Ta'u nilogakka i'o ringannu permata, wul᷊ele wuṛṛu manga hal᷊angnga.

¹² Ta'u nionggolla si'o sinsingngu ngirunna, ngante-ngante wuṛṛu araposan araratuanna apan maṛṛansanga.

¹³ Etearoddi i'o lal᷊ogaṛṛannu wul᷊awanna wuṛṛu sal᷊a'a; laungngu niola'a wuassu linen wuṛṛu sutra pia karawange. I'o wotongnge umanna roti wuassu taponna apan apianne, ringannu pul᷊a, wuṛṛu lanan zaitun. Araṛṛamagu ete nangillembo wuṛṛu i'o naola'e wo'i.

¹⁴ Anambon balahanna maddalo araṛṛamagu nasuungnga udde, wuṛṛu ete i Ya'u apan na'ola'a si'o maṛṛamaga. I Ya'u Mawu Apan Atanggaṛṛanne buatte nabbisara.

¹⁵ Arawe i'o nassal᷊a paattu araṛṛamagu see awawangngin arannu. I'o mattiilla ringannu suapan esakka apan sumabbi isudde.

¹⁶ Sambageanganna wuassu laungngu nipa'annu ipallogakka tampa passubbanna paal᷊uannu. I'o nabbal᷊i masandaga wuṛṛu nangonggollu watangannu su anambon esakka.

¹⁷ Wuassu lal᷊ogakka wul᷊awanna wuṛṛu sal᷊a'a apan Ta'u nionggolla si'o, niolangngu manga paal᷊uanna taumata esakka, ana see i'o sinumandaga ringannu manga paal᷊uanna udde.

¹⁸ Niluṛṛenu su manga paal᷊uanna laubba karawanga apan buatte Ta'u nionggolla si'o. Niolangngu sasamba si mangitou lanan zaitun wuṛṛu amania apan buatte nisengkammu wuassia-U.

¹⁹ Ta'u nionggolla si'o anna wuassu taponna apan apianne, pul᷊a wuṛṛu lanan zaitun apan tutune. Arawe sarangkanambone udde niolangngu sasamba su manga paal᷊uanna udde ipalluassa naungngi mangitou. I Ya'u Mawu Apan Atanggaṛṛanne buatte nabbisara.

²⁰ Wua'udde i'o nangonggollu al᷊aṛṛana'i ite, esakka wuṛṛu wawine, maola'a sasamba su manga paal᷊uanna. Taambe lai natimu manungku i'o tawe satia si Ya'u?

²¹ Ṛinone lai anuannu manga al᷊aṛṛana-U wuṛṛu mangonggolli mangitou su manga paal᷊uanna?

²² Sulal᷊ummu pabbiaṛṛannu apan maarantinna ere sumasandaga udde, sara addio'a lai tate mannaungnga i'o ta'e addio'a dorone, sutempo i'o tantol᷊e wuṛṛu tuttondo sulal᷊ummu laikku daṛṛanu sassane.”

Pabbiaṛṛannu Yerusalem ere sumasandaga

²³ Mawu Apan Atanggaṛṛanne nabbisara, “Nasilakate i'o! Atonna nasilakate! I'o buatte na'ola'a al᷊awo'u al᷊al᷊eo udde.

²⁴ See lai, su leta'u mal᷊alangngu soa wuṛṛu su winggi manga lal᷊anna i'o mappararisikku manga tampa pasasubbanna paal᷊uanna wuṛṛu sumasandaga.

²⁵ I'o nandal᷊eo araṛṛamagu. Waddangngu ia'imbenu su manga esakka apan sumabbi, wuṛṛu tawe illol᷊one i'o sussandaga.

²⁶ Mesir, al᷊indongannu apan bahewalla apulune udde, buatte niringanannu mattiilla. I'o mattatudda sussandaga tadea'u i Ya'u masa'u.

²⁷ Orassa indi i Ya'u makkuumannu wuṛṛu mangul᷊e al᷊amatta apan buatte Ta'u nionggolla si'o. I'o Ta'u itantilla su manga taumatan Filistin apan maddantinnu wuṛṛu apan u'amatta maasilo atorannu apan lal᷊eo udde.

²⁸ Arawe i'o taambe lai nawusa; ana waugu udde mangke mangngenggenna taumatan Asyur. I'o naola'a sumasandagi mangitou, arawe tawe lai maasomba awawusa wuassi mangitou.

²⁹ See i'o lai naola'a sumasandagu taumatan Babel, walahanna mabbawal᷊u'a udde. Arawe i mangitou lai nangonggollu awawusa si'o.”

³⁰ Mawu Apan Atanggaṛṛanne nabbisara, “Sarangkanambone udde buatte niolangngu ere sangkatou sumasandaga apan tawe masili.

³¹ Su leta'u mal᷊alangngu soa wuṛṛu suapan dal᷊anna i'o napararisikku manga tampa pasasubbanna paal᷊uanna wuṛṛu sassandahanna. Arawe i'o wal᷊ine ere sumasandaga waine apan mappandumma roitta.

³² I'o ere wawine apan mandal᷊eo awingu wuṛṛu na'apulun esakka waine.

³³ Sangkatou sumasandaga sidutu maasomba wawaekke, arawe nawal᷊i'a ete i'o apan mangngonggollu aonggolla su manga arangnguannu, ewe'e lai nisal᷊ongngu i mangitou ringannu roitta tadea'u rumanta suapan tampa see matiilla suadio'a.

³⁴ I'o sumasandaga apan al᷊aṛṛaene wuassu sumasandaga waine. Taweddu mamatangngu maola'a sumasandaga. I'o tawe waeṛṛanna, ewe'e i'o lai sassane apan mamaekka. Atonna i'o al᷊aṛṛaene wuassu sumsandaga waine.”

Ṛuumannu Ruata su Yerusalem

^35-36 Ei Yerusalem, sumasandaga, paddaringikke apa apan niwisara Mawu Apan Atanggaṛṛanne, “I'o buatte nalluatta laungngu, wuṛṛu ere sumasandaga i'o nantillu watangannu su manga apulunu wuṛṛu su manga paal᷊uanna apan maarantinna udde. Manga anangngu nipatenu wuṛṛu niolangngu sasamba su manga paal᷊uanna udde.

³⁷ Ana waugu udde, anambon arangnguannu dorone sarun Ta'u iammulla, mawae ipa'apulunu aroddi lai apan ia'arantinnu. I mangitou sarun dumarisikka mamal᷊iwutta si'o wuṛṛu sarun malluatta al᷊awo'u laungngu, ma'oman sara i mangitou maasilate waddangngu apan tantol᷊e.

³⁸ I'o sarun Ta'u iṛṛuumanna ana waugu pasasandaga wuṛṛu pamamate apan buatte niolangngu udde. Sulal᷊ummu naungdal᷊eo wuṛṛu asasa'u-U i'o sarun Ta'u iṛṛuumanna pateanna.

³⁹ I'o sarun Ta'u itantilla su manga arangnguannu udde, wuṛṛu i mangitou sarun mapaṛṛa'a manga tampa i'o sussandaga wuṛṛu massubba paal᷊uanna. Al᷊awo'u laungngu wuṛṛu lal᷊ogakku sarun aṛṛoanni mangitou, ma'oman sara i'o matantol᷊e.

⁴⁰ I mangitou sarun mandolokku awadaalla manuntungnga si'o ringannu watu, wuṛṛu manattadda waddangngu ringannu hal᷊ele.

⁴¹ I mangitou saru manoṛṛobba manga wal᷊enu wuṛṛu mandolokku manga wawine mabbiala i'o iṛṛuumanna. Etearoddi Ta'u iapaaddo pasasandagu. I'o tate lai mattahia aonggolla su manga arangnguannu.

⁴² Wakkute udde asasa'u-U umompo'a, wuṛṛu sarun maola'a matammuda apia. I Ya'u tate masa'u apia ara'e mallu'adda.

⁴³ I Ya'u nakkuumannu ana waugu i'o tawe mannaungnga ereapa i Ya'u namaddul᷊i si'o sutempo i'o ta'e addio'a. I'o na'ola'a si Ya'u nasa'u ringannu al᷊awo'u inolaanna apan dal᷊eo udde. Anio al᷊awo'u inolaannu apan maarantinna udde ta'e lai tattambannu ringannu sussandaga? I Ya'u Mawu Apan Atanggaṛṛanne buatte nabbisara.”

Ere inangnge, aroddi lai sinangiane

⁴⁴ Mawu nabbisara, “Ei Yerusalem, manga taumata sarun mappaattu sasanato'a indi si'o, ‘Ere inangnge, aroddi lai sinangiane.’

⁴⁵ Atonna, i'o uddewe ana'a wawinen inangngu. I tou maddantinnu awinge wuṛṛu su manga anangne sassane. I'o ual᷊al᷊ihiddu manga tuṛṛangngu wawine apan maddantinnu awinge wuṛṛu manga anangne. I'o wuṛṛu manga tuṛṛangngu, eteudde manga soa maraninu uatahuannu inangnga taumatan Het wuṛṛu iamangnga taumatan Amori.

⁴⁶ Iaangngu uddewe Samaria su sawannakka ringannu anambon ampungnge. Wuṛṛu tuarinu uddewe Sodom su timukka ringannu anambon ampunge.

⁴⁷ Nawusatewe i'o uatantuṛṛutta ual᷊aṛṛeggenna lempangngi mangitou wuṛṛu mangaṛṛussa pallal᷊agu mangitou apan ma'arantinna udde? Taambe! Tate mal᷊annu lai i'o ewe'e a'atambannu al᷊al᷊eone wuassi mangitou.

⁴⁸ Sulal᷊ummu arang-Ku, Ruata apan biakka, unnu Mawu Apan Atanggaṛṛanne, tuṛṛangngu Sodom ringannu manga ampunge taambe saran paassa al᷊al᷊eone ere i'o ringannu manga ampungu.

⁴⁹ Sodom wuṛṛu manga ampunge mawunga ana waugu uatahuanna manambo walingakku anna see wotongnga mabbiakka ringannu matammudda wuṛṛu paddarame. Arawe i mangitou tawe ma'ellega taumata asiangnga wuṛṛu taumata lal᷊ebone.

⁵⁰ I mangitou mawunga wuṛṛu tawe maddaringikka, see ma'ola'a pallal᷊agu apan Ta'u iaarantinna. Ana waugu udde i mangitou Ta'u ṛimunsaanna ere lai apan aellehannu.

^51-52 Atonna Samaria lal᷊eo, arawe rosane tawe maasatenga wuassu manga rosanu. Pallal᷊agunu marau maddal᷊eoanna lai. Manga tuṛṛangngu wawine ereola'u tawe sal᷊ane isumandingnga si'o. I'o ṛinone masili wuṛṛu umol᷊obba!”

Sodom wuṛṛu Samaria sarun iapararisikka apia

⁵³ Mawu nabbisara su Yerusalem, “Sodom wuṛṛu Samaria see manga ampungi mangitou sarun Ta'u olaanna manambo wiakke apia. Wua'udde, wakkute udde i'o olaanna manambo wiakke lai.

⁵⁴ Ringannu aroddi i'o sarun masili su watangannu sassane, wuṛṛu al᷊al᷊eonu sarun mapal᷊iatta'a su manga tuṛṛangngu aroddi apiane pal᷊addi mangitou.

⁵⁵ I mangitou wuṛṛu manga ampungi mangitou sarun mabbal᷊i manambo wiakke apia, see i'o lai wuṛṛu manga ampungu.

⁵⁶ Wal᷊inewe i'o buatte nilumagen Sodom sutempo i'o ta'e mawunga

⁵⁷ wuṛṛu al᷊al᷊eonu taambe niasingkatanna? Orassa indi i'o nassul᷊ungken tou; i'o naola'a ipallal᷊agen taumatan Edom, taumatan Filistin wuṛṛu manga al᷊indongannu waine apan maddantinnu.

⁵⁸ I'o ṛinone matataṛṛangnga susa maola'a pangillul᷊eannu inolaannu apan dal᷊eo wuṛṛu maarantinna udde. I Ya'u Mawu buatte nabbisara.”

Paaire apan ilaggu saran mal᷊annu-l᷊annu

⁵⁹ Mawu Apan Atanggaṛṛanne nabbisara, “I'o sarun Ta'u iṛṛuumanna uasul᷊ungngu inolaannu, ana waugu i'o buatte nassinaadu sasalunu see nilumawangnga pa'aire-U si'o.

⁶⁰ Arawe i Ya'u sarun mannaungnga pa'aire apan buatte Ta'u niola'a ringannu sutempo i'o ta'e dario'a wuṛṛu ma'ola'a paaire ringannu apan ola'anna saran mal᷊annu-l᷊annu.

⁶¹ I'o sarun maanaungnga wuṛṛu maapendamma asasili sutempo manga tuṛṛangngu Ta'u iwelengnga ringannu. I mangitou sarun Ta'u oala'ana ere manga anangngu, salaiwe olangnge udde tawe nasutta sulal᷊ummu pa'aire-U si'o.

⁶² I Ya'u sarun ma'ola'a pa'aire apan bakku ringannu. Ne i'o maasingkatte manungku ete i Ya'u Mawu.

⁶³ I Ya'u sarun mangampunga al᷊awo'u pasasal᷊anu, arawe i'o tawe maabul᷊ine wuṛṛu i'o sarun maapendamma asasili amungkangu mabbisara manga apa. I Ya'u Mawu Apan Atanggaṛṛanne buatte nabbisara.”