WATTI'U MANGA RASUL 5 - WUKE SUSI WATTI'U AL᷊AL᷊USASSA

I Ananias wuṛṛu i Safira

¹ Arawe pia sangkatou aranne i Ananias. I tou ringannu awingnge aranne i Safira, nabal᷊u'u leta'a santampa pussa'a mangitou.

² Roitta wuassu la'unnu leta'a udde, sambageanganna niwa'ungngi tou ipaatta sassane wuṛṛu waine tinantilli tou su manga rasul. I tou na'ola'a udde asingkatannu awingnge.

³ Ne i Petrus nabbisara si tou, “Ananias, anio i'o namalan Setanna namiaṛṛa'u naungngu, na'oman sara i'o nangawusu Ghaṛṛahon Ruata, ringannu mal᷊anna-l᷊annaba nama'ungnga roitta ipaannu sassane sambageanganna roitta la'unnu leta'a udde?

⁴ Leta'a udde pussaanu, ro'en i'o taambe nabal᷊u'a. Wuṛṛu napawe leta'a udde suete niwal᷊u'a, roinne lai ta'e pussaanu. Nariaddi anio i'o pia pandumma ereudde sulal᷊ummu naungngu ma'ola'a pallal᷊agu udde? Wal᷊ine taumata aawusuannu ewe'e Ruata!”

⁵ Aroddi i Ananias naaringikka manga wisara udde, i tou nawantingnga see nate. Anambon taumata apan naaringikka olangnge udde nata'utta.

⁶ Ne manga umbasanna nirumanta wuṛṛu nami'unna winal᷊unanni Ananias see niapidda suliudde wuṛṛu nilabingnga.

⁷ Iraṛṛangngo tallung ka'orassa nal᷊iu, awingnge nirumanta. I tou wagga apa apan wakku nariaddi.

⁸ I Petrus nabbisara si tou, “Annama'a wal᷊oa'a si ya'u: Apa leta'a apan niwal᷊ungngu wuṛṛu awingngu udde, aregane arendi?” “Atonna ereudde aregane,” sasimbakku awingngi Ananias.

⁹ See i Petrus nabbisara si tou, “Anio i'o wuṛṛu awingngu na'ire mannal᷊u'atta Ghaṛṛahon Ruata? Padaringika! Manga taumata apan nallabingngu awingngu nabelengke. I mangitou sarun mangapiddu lai su liudde.”

¹⁰ Orassa udde lai awingngi Ananias nawantingnga wuṛṛu nate su saruanni Petrus. Wuṛṛu su tempo manga umbasanna udde sinumutta, i mangitou naaratingnga si tou natete. See i mangitou nangapiddu winal᷊unanne su liudde see nilabingnga su sandiṛṛannu awingnge.

¹¹ Ne anambon taumata apan mangngimanna udde wuṛṛu manga taumata waine, apan naaringikka arariaddianna udde, nata'utta.

Manga al᷊aṛṛindu'a wuṛṛu manga inolaanna apan bahewalla

¹² Ana waugu pamamanara manga rasul, ne manambo al᷊aṛṛindu'a wuṛṛu manga inolaanna apan wahewalla nariaddi su wallattu lal᷊oṛṛon soa. Ringannu naungnga sambua anambon taumata apan mangngimanna na'ammulla su Panumbal᷊en Salomo su Wal᷊e Mawu.

¹³ Wuṛṛu taumata waine tawedu waṛṛani rumanta ma'ammula ringannu manga taumata apan mangngimanna udde. Arawe manga taumata mangngimanna udde lembon aaddatannu lal᷊oṛṛon soa.

¹⁴ Wuṛṛu mallannu mangke a'atambanna anambone manga taumata apan mangngimanna Mawu – mapia esakka ara'e wawine.

¹⁵ Ewe'e olangnge naola'e aroddi na'oman sara manga taumata marada'a niaddo su lallowanganna ara'e wilatta, see niapidda su lal᷊anna, tadea'u i mangitou salaiwe mattingkatulunga aṛṛinoannu lintaum Petrus, amungkangngu i Petrus sumabbi isudde.

¹⁶ Mangke mangngelekka manga taumata nirumanta wuassu soa maranin Yerusalem. I mangitou mangngapiddu manga taumata marada'a wuṛṛu niasuttannu manga ghaṛṛaho lal᷊eo. Ne manga taumata udde sarangkanambone niapaapia.

Manga rasul pinassansara

¹⁷ Panginsueanne imam wahewa wuṛṛu anambo mallal᷊aṛṛenggenne, eteudde wageangngu manga taumatan Saduki mannattake lullawangnga ana waugu i mangitou pia naungnga lal᷊eo.

¹⁸ Manga rasul udde sinametta, see nitaṛṛo sulal᷊ummu tuttupannu awada'alla.

¹⁹ Arawe ṛabbine, sangkatou mala'ekattu Mawu namu'a manga ngaran tuttupanna, see nangapiddu manga rasul udde sinumabangnga. Mala'ekatta udde nabbisara su manga rasul,

²⁰ “Roote darisikka su Wal᷊e Mawu wuṛṛu pasingkata'a su taumata su ola'u wiakka apan wakku indi.”

²¹ Ne manga rasul udde tinumuṛṛutte tanatan mala'ekatta udde. Ruaallo atonna i mangitou inaite su Wal᷊e Mawu wuṛṛu mannattake mangngaṛṛa'a isudde. Tantal᷊anna udde imam wahewa wuṛṛu mallal᷊aṛṛenggenne nirumanta, see na'ola'a ammullu mallaṛṛuungnga ringannu manga piaṛṛa'u Yahudi. Wua'udde i mangitou nandolokku taumata inai mangal᷊apa manga rasul udde su tuttupanna iapa'apidda sumaruanna si mangitou.

²² Arawe napawe manga taumata nirolokka udde na'omate su tuttupanna, i mangitou tawe naasilo manga rasul isudde. Nariaddi i mangitou nabelengke, see nabal᷊on olangnge udde su mallaṛṛuungnga.

²³ “Su tempo i yami na'omate su tuttupanna,” unni mangitou su mallaṛṛuungnga, “niaratinganni yami ngaran tuttupanna uaṛṛuuda mapia-pia, wuṛṛu manga mandariaga uariaga su ngara. Arawe su tempo i yami namu'a ngara udde, i yami tawe naasilo saran sangkatou sulal᷊umme.”

²⁴ Napawe piaṛṛa'u mandariaga Wal᷊e Mawu wuṛṛu manga imam tembonanne naaringikka alae udde, i mangitou tinumiangnga su ola'u manga rasul wuṛṛu matta'uttu apa apan sarun mariaddi.

²⁵ Wua'udde nirumantate sangkatou esakka uaapiddu watti'a indi, “Daringiṛṛe! Manga taumata apan tinaṛṛangannu manga Tuangnga su tuttupanna udde orassa indi tantal᷊anna mangngaṛṛa'a awadaalla su Wal᷊e Mawu!”

²⁶ Ne piaṛṛa'u mandariaga Wal᷊e Mawu udde su sambau ringannu mandariagane inaite nangal᷊appa manga rasul udde apia. Arawe i mangitou tawe nangal᷊appu araṛṛagissa ana waugu i mangitou matta'uttu taumata nambo; aṛṛengenne taumata nambo udde mamaretam batu si mangitou.

²⁷ Manga rasul udde niapidda sinumutta sinumaruanna mallaṛṛuungnga. See imam wahewa namarikissa si mangitou.

²⁸ I tou nabbisara, “I yami suete naningaddi yamiu tadea'u ariete pangaṛṛa'u arannu taumata udde. Arawe orassa indi pa'ellege apa inolaanni yamiu! I yamiu mannal᷊iawukku al᷊aṛṛa'i yamiu su ahewallu Yerusalem, wuṛṛu i yamiu mangngansilla manungku ete i yami nipandansilanannu papaten taumata udde.”

²⁹ I Petrus wuṛṛu manga rasul apan baine sinumimbakka, “I yami ṛinone tumuṛṛutta Ruata wuṛṛu wal᷊ine tumuṛṛutta taumata.

³⁰ Mawu Yesus, apan niarussang kamiu suete niapaawiakku Ruata iupungngu al᷊amonang kite apia wuassu papate.

³¹ Ruata suete nangonggolu aiananna wuṛṛu taṛṛino apan matanggakka si Tou eteudde Piaṛṛangnge wuṛṛu Punnu Sal᷊amatta; tadea'u walahannu Israel onggol᷊annu tempo mawal᷊u wuassu manga rosane wuṛṛu ampunganna.

³² Ete i yami manga mattatialane su ola'u sarangkanambone udde – yami wuṛṛu lai Ghaṛṛahon Ruata apan nionggolu Ruata su manga taumata apan matuṛṛutta si Tou.”

³³ Su tempo manga Mallaṛṛuungngu Agama naaringikka udde, i mangitou mangke nasa'u, wuṛṛu i mangitou na'irete mamate manga rasul udde.

³⁴ Arawe su wallattu manga Mallaṛṛuungngu Agama udde pia sangkatou Farisi aranne i Gamaliel. I tou hurun agama apan a'addatannu anambon taumata. I tou dirumarisikka see nandolokku taumata niapaapiddu manga rasul udde sinumabangnga su liudde tal᷊ang kadio'a.

³⁵ Wua'udde i tou nabbisara su Mallaṛṛuungngu Agama udde, “Manga tuṛṛangnga manga taumatan Israel! Ṛingiṛṛa'a paapia-pia su ola'u apa apan sarun olaannu manga tuṛṛangnga su saruannu manga taumata indi.

³⁶ Ana waugu dorone suete nirumanta i Teudas, apan mangngantimma i tou taumata wahewa, na'oman sara iraṛṛangngo appatu ṛasutta su atoune tinumantalongnga si tou. Arawe i tou nipate wuṛṛu mallal᷊aṛṛenggenne nassal᷊iawukka wuṛṛu tuddane nawul᷊i.

³⁷ Wua'udde, su tempom pandareengngu aranna, nilumapputa apia i Yudas, taumata wuassu Galilea. Ana waugu sasal᷊ongnge manambo taumata tinumantalongnga si tou. Arawe i tou lai nipate, wuṛṛu anambo mallal᷊aṛṛenggenne nassal᷊iawukka.

³⁸ Nariaddi orassa indi ringannu arariaddianna udde, tatantiro'u eteudde: imbaṛṛangnga ma'ola'a apa-apa su manga taumata indi, wala'e aroddi i mangitou. Ana waugu al᷊aṛṛa'a wuṛṛu tatantiro mangitou indi eteudde wuassu taumata, ne al᷊aṛṛa'a wuṛṛu tatantiro udde sarun mawul᷊i.

³⁹ Arawe amungkangngu udde nirumanta wuassu Ruata, ne manga tuṛṛangnga tawe mapaasal᷊a mangitou. Ewe'e asinungka sarun matualaga manungku manga tuṛṛangnga lullawangnga Ruata.” Al᷊aṛṛa'i Gamaliel udde nisengkammu mallaṛṛuungnga.

⁴⁰ Ne manga rasul udde niwagoante, see nihesekka, wua'udde nisingadda mangaṛṛa'a apia al᷊aṛṛa'u Mawu Yesus. Wua'udde i mangitou nipallosse.

⁴¹ Manga rasul udde nanantangngu Mallaṛṛuungngu Agama ringannu lulluassa ana waugu Ruata suete na'ola'a si mangitou naasomba aal᷊uandaga ana waugu Mawu Yesus.

⁴² Wuṛṛu miallo-miallo su Wal᷊e Mawu see lai su manga wal᷊en taumata, i mangitou sidutu mangngaṛṛa'a wuṛṛu mabatti'a Watti'u Al᷊al᷊uassa su ola'u Mawu Yesus manungku tumba'u i Tou Ratum Punnu Sal᷊amatta apan pina'ire udde.