TITUS 2 - WUKE SUSI WATTI'U AL᷊AL᷊USASSA

Manga pinangianannu al᷊aṛṛa'a apan naṛṛino

¹ Arawe i'o Titus, ṛinone i'o mangaṛṛa'u al᷊aṛṛa'a apan su ṛinone.

² Aṛṛa'ete manga timmadde esakka, tadea'u i mangitou maṛṛaddanna, pande wuṛṛu mabbiakka ere sangkatou taumata apan ṛinone addatanna. Ṛinone lai i mangitou uaaggasa al᷊aṛṛa'a apan su ṛinone wuassu Ruata, mandangngu ringannu ahewallu naungnga wuṛṛu matataṛṛangnga ringannu sabbare.

³ Aroddi lai ṛinone i'o mangaṛṛa'a manga wawine apan timmaddete tadea'u pallal᷊agu mangitou matataṛṛino su taumata apan mabbiakka tumuṛṛuttu apulun Duata sassane. Tawe wotongnge i mangitou mangal᷊uandaga taumata waine, wuṛṛu tawe wotongnge taṛṛa inumma ua'e maawu'anna. Ṛinone i mangitou mangaṛṛa'u manga al᷊aṛṛa'a apan mapia,

⁴ tadea'u ringannu al᷊aṛṛa'a udde i mangitou wotongnge maapangaṛṛa'a manga maṛṛuala mandangngu awingnge wuṛṛu al᷊aṛṛanangnge,

⁵ maola'a pande, mabbiakka susi wuṛṛu maola'a inangnga su lal᷊oṛṛon bal᷊e apan mapia wuṛṛu masallunga awingnge. Ringannu aroddi tawe saran sangkatou apan wotongnge mapaasal᷊an watti'u Ruata.

⁶ Aroddi lai, tantiroi lai manga al᷊aṛṛana'a umbasana tadea'u i mangitou lai masiṛṛungnga.

⁷ Su al᷊awo'u inolaanna ṛinone i'o maola'a tul᷊adan pallal᷊agu apan mapia. Amungkangu i'o mangaṛṛa'a, ṛinone i'o tawe mamahia wuṛṛu atonna-tonna.

⁸ Pappaatten manga wisara mapia, apan tawe iapaasal᷊an taumata, tadea'u manga seennu masili ana waugu tawe inolaanna lal᷊eo apan wotongnge iwatti'i mangitou su ola'i ite.

⁹ Manga allangnga ṛinone masallunga mawune, wuṛṛu maal᷊uassa naungnge sulal᷊ummu al᷊awo'u inolaanna. I mangitou tawe wotongnge manompolla,

¹⁰ ara'e manna'o. Ṛinone i mangitou mapaal᷊iatta'a manungku i mangitou siddutu uatana'a mapia wuṛṛu matammuda, tadea'u ringannu pallal᷊agu mangitou udde taumata maddalo al᷊aṛṛa'u Ruata, Punnu Sal᷊amatti ite.

¹¹ Ana waugu Ruata suete napaal᷊iatta'u darangngu-Ne ipanal᷊amatta anambon taumata.

¹² Darangngun Duata udde mangngaṛṛa'a si ite tadea'u tate lai mabbiakka uapapaṛṛalan apulun Duata wuṛṛu tate tumuṛṛutta apulun runia. I ite niaṛṛaanna mabbiakka sulal᷊ummu runia indi ringannu masingkata manabare, matul᷊ida wuṛṛu matuṛṛuta Ruata.

¹³ Orassa indi i ite tantal᷊anna uaraṛṛaddo Allo apan aantimanni ite udde; su Allo udde runia sarun maasilo awawantugi Yesus Kristus, eteudde Mawu Ahewal᷊anne wuṛṛu Ratun Punnu Sal᷊amatti ite.

¹⁴ I Tou suete nanantillu watangan-Ne ana waugu i ite wuṛṛu ana waugu mamallosi ite wuassu al᷊awo'u al᷊al᷊eo, wuṛṛu na'ola'a si ite sambau walahanna apan nal᷊iu wuassu al᷊awo'u rosa wuṛṛu tumba'u naola'a pussa'a-Ne sassane, wuṛṛu maṛṛimadda ma'ola'a apapia.

¹⁵ Tantiroa'e sarangkanambone udde, wuṛṛu aṛṛa'ete see tagguete manga maddararingikka si'o ringannu saṛṛaungnga. Arie mapaawalan saran sangkatou mangaddio'a si'o.