TITUS 1 - WUKE SUSI WATTI'U AL᷊AL᷊USASSA

¹ Ana'u Titus! I ya'u, Paulus, namoṛṛetu suratta indi ere ola'u sangkatou allangngu Ruata wuṛṛu rasulli Yesus Kristus. I ya'u nipile wuṛṛu nirolokka mantul᷊ungu manga taumata apan nipilen Duata tadea'u maola'a matohassa sulal᷊ummu pangangimanni mangitou. I ya'u lai ṛinone mangehetta si mangitou tadea'u maasingkattu al᷊aṛṛa'a apan naṛṛino niaṛṛa'u agaman kite.

² Al᷊aṛṛa'a udde pinangiananne wuassu antimma manungku i ite sarun manengkamma wiakka tutune wuṛṛu mal᷊annu-l᷊annu. Ruata suete na'iren wiakka udde ro'en panattaṛṛannu runia indi – wuṛṛu tawe mariaddi Ruata mangawusu.

³ Su tempo apan suete nitantunna, Ruata mapaal᷊iatta'u paaire-Ne udde sulal᷊ummu tanata-Ne. Tanata udde suete niwal᷊o si'u, wuṛṛu i ya'u namasingkattu tanata udde ana waugu darolokku Ruata Punnu Sal᷊amatti ite.

⁴ Titus, eteudde i'o atonna-tonna ana'u, ana waugu i'o wuṛṛu i ya'u suaddio'a suete nangimanna si Kristus. I ya'u mangantimma doronganna Ruata Iamangnga wuṛṛu Kristus Yesus Ratum Punnu Sal᷊amatti ite, mangonggolu al᷊amatta wuṛṛu paddarame si'o.

Manaran Titus su Kreta

⁵ I ya'u manantangngu su Kreta tadea'u i'o wotongnge mangatokku manga manara apan ta'e wotongnge iaatokka. Wuṛṛu tadea'u lai i'o mamile manga piaṛṛa'u jamaatta su al᷊awo'u soa. Wuṛṛu paanaunge manga tantiro'u indi:

⁶ Sangkatou piaṛṛa'u jamaatta ṛinone sangkatou apan tawe sal᷊ane; i tou ṛinone tumba'u uatahuanna awingnga sangkatou; manga al᷊aṛṛanangnge ṛinone mangngimanna si Kristus wuṛṛu wal᷊inewe ana'a lal᷊eo wuṛṛu tawe iaatokka.

⁷ Mallal᷊u'ada jamaatta udde taumata apan mangngatokku manaran Duata, tawe wotongnge i tou pia pasasal᷊ane. Tawe wotongnge mawunga ara'e taṛṛa wul᷊o, ara'e taṛṛa wu'anna, ara'e taṛṛa wawul᷊o ara'e wal᷊iun doitta.

⁸ Ṛinone i tou mal᷊uassa manarimmattu taumata su wal᷊ene, maapulu manga inolaanna apan mapia, wotongnge maṛṛadannu aapulun naungnge, matul᷊idda, susi wuṛṛu ma'uddupa.

⁹ I tou ṛinone uaaggasa atonna al᷊aṛṛa'a apan wotongnge apangimananna, ere lai suete niaṛṛa'a si tou. Ringannu aroddi i tou wotongnge manantiro taumata ringannu al᷊aṛṛa'a su ṛinone, wuṛṛu mapaal᷊iatta'u pasasal᷊a manga taumata apan lullawangnga si Tou.

¹⁰ Ana waugu manambo taumata apan maapulu mabbawul᷊o, lembonete manga taumata apan dorone agamane Yahudi; i mangitou mangngawusu taumata waine ringannu aawusu mangitou.

¹¹ Manga taumata ereudde ṛinone sappingana moṛṛonge, ana waugu i mangitou mannongkakku anambon amonanna ringannu manga al᷊aṛṛa'a apan lal᷊eo. I mangitou ma'ola'a udde tumba'u ana waugu maapulu maddea'a auntunganna apan tawe su ṛinone!

¹² Suete su paassa nabi mangitou sassane, inarantanne wuassu Kreta lai, nabbisara, “Manga taumatan Kreta siddutu mangngawusu, wuṛṛu ere winatangnga mal᷊aṛṛaga apan a'ombanganna wuṛṛu wolo'a.”

¹³ Apa apan suete niwisara nabi udde mangke atonna. Ana waugu udde ṛinone i'o managu si mangitou ringannu maṛṛagissa; tadea'u i mangitou siddutu uaagassa al᷊aṛṛa'a su ṛinone,

¹⁴ wuṛṛu tate lai mangngimanna manga watti'u wa'en Yahudi ara'e manga atoranna apan niola'u manga taumata maddirin al᷊aṛṛa'a apan naṛṛino udde.

¹⁵ Sarangkanambone udde susi su manga taumata apan susi. Arawe su manga taumata apan ṛingiranne lal᷊eo wuṛṛu tawe pangangimanne, tawe sambau sarannapa apan susi, ana waugu ṛingiranne wuṛṛu lal᷊ummu naungngi mangitou nalal᷊eote!

¹⁶ I mangitou mabbisara manungku i mangitou maaillal᷊a Ruata, wutte'e inolaanni mangitou massinaaddu Ruata. I mangitou maarantinna, wuṛṛu i mangitou tawe tumuṛṛutta, ete i mangitou udde taumata apan tawe maaola'a manarane apan mapia.