TAHIUL᷊E 6 - WUKE SUSI WATTI'U AL᷊AL᷊USASSA

Tita apan tutune

¹ “I Ya'u nirolokku Mawu Ruatanu iapatantiro anambon tita indi si yamiu tadea'u i yamiu ma'ola'a su wanua apan tate mal᷊annu lai atanaanni yamiu.

² Ṛinone i yamiu wuṛṛu papapulunnu su al᷊o'engngu pabbiaṛṛanna mangaddata Mawu Ruatanu wuṛṛu tuttuṛṛutta anambon tita-Ne apan ta'u niapasingkatta si yamiu tadea'u uukku malo'engnga mabbiakka su wanua udde.

³ Ana waugu udde paddaringikka manga tuṛṛangnga, ola'e udde ringannu matuṛṛutta, tadea'u i yamiu su lal᷊umanna'a wuṛṛu mabbal᷊i walahanna apan bahewalla su wanua apan ala wuṛṛu masuwukka, ere buatte pina'ire Mawu Ruatanu su al᷊amonang kite.

⁴ Tuṛṛa-tuṛṛangnga, naungete! Tumba'u Mawu, wuṛṛu Mawu sassane Ruatan kite!

⁵ Pandangngute Mawu Ruatanu ringannu ahewallu naungngu: Papal᷊iattaa'e udde sulal᷊ummu pabbiaṛṛannu wuṛṛu sulal᷊ummu inolaannu.

⁶ Imbaṛṛangnga saran paassa ma'abul᷊i manga parenta-Ne apan ta'u nionggola si yamiu allo indi.

⁷ Tantiroa'e udde su manga anangngu. Ṛinone udde ihatton kamiu sulal᷊ummu wal᷊en wuṛṛu su liuddu wal᷊en, su tempo mangillol᷊o wuṛṛu su tempo mammanara.

⁸ Wa'isa'e udde su ta'iakku wuṛṛu re'eta'a su pakkannu tadea'u sidutu nanaunganna.

⁹ Woṛṛeta'e udde su diṛṛi ngaran bal᷊enu wuṛṛu su ngaran soanu.”

Iapanaungnga su ola'u lal᷊awangnga

¹⁰ “Mawu Ruatanu naddiandi su iupungngu al᷊amonanu i Abraham, i Ishak wuṛṛu i Yakub manungku i Tou sarun mangonggolu wanua udde si yamiu. Manga soane wahewalla wuṛṛu ala, wuṛṛu wal᷊ine i yamiu napararisikku soa udde.

¹¹ Manga wal᷊ene napenen saranapa apan mapia, wuṛṛu wal᷊ine i yamiu nalloṛṛo. I yamiu sarun maasangkalla manga paṛṛihi, wuṛṛu wal᷊ine i yamiu naal᷊i. I yamiu sarun maasomba manga waillu anggore wuṛṛu zaitun, arawe wal᷊ine i yamiu nassuanna. Napawe Mawu mangapiddi yamiu watukku wanua udde, i yamiu sarun maatahuanna al᷊awo'u iapaapulun kamiu annananna,

¹² paariagai mapia-pia tadea'u imbaṛṛangnga i yamiu maabul᷊in Mawu apan buatte namallosi yamiu wuassu Mesir, su tampa i yamiu niola'a allangnga.

¹³ Pangaddate Mawu Ruatanu, wuṛṛu tumba'u pattaṛṛamawu si Tou, wuṛṛu amungkangngu i yamiu massalu, passalute tumba'u sulal᷊ummu aran-Ne.

¹⁴ Imbaṛṛangnga massubba manga Mawu waine apan sassubbannu manga walahanna apan uatana'a maraninu.

¹⁵ Amungkangngu i yamiu massubba manga monganna waine, ne i yamiu sarun aemaannu asasa'u Mawu Ruatanu wuṛṛu insueanna pateanna, ana waugu Mawu Ruatanu su pattangnganni yamiu maddiri isul᷊ungnga ringannu manga apa waine.

¹⁶ Imbaṛṛangnga manal᷊u'atta Mawu Ruatanu ere buatte niola'i yamiu su Masa.

¹⁷ Paatuṛṛutta anambon tita apan nionggolu Mawu Ruatanu si yamiu.

¹⁸ Pa'ola'e apa apan tumuṛṛuttu Mawu mapia wuṛṛu matul᷊idda, ne i yamiu sarun su lal᷊umanna'a. Leta'a masuwukka apan pina'iren Mawu su iupungngu al᷊amonanu sarun maola'a pussaanu,

¹⁹ wuṛṛu i yamiu sarun mallimbuakka manga seennu ere buatte pina'iren Mawu.

²⁰ Su allo sal᷊immurine manga anangngu sarun maiwal᷊o si'o, ‘Anio Mawu Ruatan kite nandolokki ite tadea'u tumuṛṛutta anambon parenta udde?’

²¹ Ne i yamiu ṛinone sumimbakka arendi, ‘Dorone i ite naola'a allangngu ratun Mesir, ana see namallossi ite ringannu atatohassa apan bahewalla.

²² Yami sassane ual᷊ellega Mawu na'ola'a manga al᷊aṛṛindu'a wuṛṛu manga inolaanna apan maata'utta taumatan Mesir wuṛṛu ratun mangitou wuṛṛu anambon tembonanne.

²³ I Tou namallossi ite wuassu Mesir, wuṛṛu nangapiddi ite isindi, wuṛṛu leta'a indi nionggola si ite ere buatte nipa'ire-Ne su iupungngu al᷊amonan kite.

²⁴ Mawu Ruatan kite nandolokki ite tumuṛṛutta anambon tita udde wuṛṛu mangaddata si Tou. Amungkangngu inolaanni ite aroddi, i Tou sidutu mammadul᷊i walahanni ite tadea'u sidutu mabbiakka su al᷊al᷊uassa.

²⁵ Amungkangngu i ite ringannu maṛṛimadda tuttuṛṛuta al᷊awo'a apan nirolokku Mawu Ruatan kite, ne i Tou sarun maṛṛundinganna si ite.’ ”