TAHIUL᷊E 5 - WUKE SUSI WATTI'U AL᷊AL᷊USASSA

Mapul᷊o Titan Mawu Ruata

¹ I Musa nangammulu anambon balahanna Israel, ana see nabbisara si mangitou, “Manga tuṛṛangnga, paddaringikke manga tita apan ta'u ionggola allo indi. Urumete manga tita udde, wuṛṛu paatuṛṛutte ringannu maadunna.

² Su Wowon Sinai Mawu Ruatan kite na'ola'a sambau pa'aire,

³ wal᷊ine tumba'u ringannu al᷊amonan kite, arawe si ite sarangkanambone lai isindi.

⁴ Wuassu putungnga su puiddu wowone udde Mawu mappulu maggahatto uahahati si yamiu.

⁵ Arawe ana waugu i yamiu matta'uttu putungnga wuṛṛu matal᷊o suma'a su wowone, ne i ya'u tempo udde uarisikka su wallati yamiu wuṛṛu Mawu tadea'u mamasingkattu wisaran Mawu si yamiu. Mawu nabbisara,

⁶ ‘Ete i Ya'u Mawu Ruatanu apan nangapiddi yamiu sinumabbangnga wuassu Mesir, su tampa i yamiu mattaṛṛuallanga.

⁷ Imbaṛṛangnga massubba manga paal᷊uana waine. Passubbate si Ya'u sassane.

⁸ Imbaṛṛangnga i yamiu ma'ola'a paal᷊uanna apan uasul᷊ungngu saranapa su langitta, su runia ara'e sulal᷊ummu ua'e su winangunanna.

⁹ Imbaṛṛangnga massubba paal᷊uanna ereudde ana waugu i Ya'u Mawu Ruatanu maddiri isul᷊ungngu anambon al᷊awo'u saranapa. Manga taumata apan maddanting-Ku Ta'u iṛṛuumanna maddatingngu papapulunne atallune wuṛṛu aiappatu ṛawanne.

¹⁰ Arawe i Ya'u mapal᷊iatta'u darangngu-U su ṛiwune papapulunne wuassu manga taumata apan mandangngu si Ya'u wuṛṛu matuṛṛutta parenta-U.

¹¹ Imbaṛṛangnga walate asaggonen arang-Ku, ana waugu i Ya'u, Mawu Ruatanu, makkuumannu taumata apan walate asagone arang-Ku.

¹² Laghua'e allon Sabat wuṛṛu addate allo udde maola'a sambau allo na'ukkassa, ana waugu ete i Ya'u Mawu Ruatanu apan nandolokki yamiu.

¹³ I yamiu Ta'u inonggol᷊annu annumu allo ipammanara,

¹⁴ arawe su allo apitune uddewe allo pangillol᷊oanna apan niṛṛae ipangaddata si Ya'u, Mawu Ruatanu. Su allo udde imbaṛṛangnga pia sangkatou mammanara, mawae i yamiu, manga anangngu, manga allangngu, manga winatangngu ara'e taumata raho apan uatana'a su wanuanu. Manga allangngu ṛinone mangillol᷊o ere lai yamiu sassane.

¹⁵ Paanaunge manungku i yamiu dorone niallangnga su Mesir, ana see nipallosu Mawu Ruatanu ringannu atatohassa apan bahewalla. Ana waugu udde i yamiu Ta'u niparentanna mallaghun allon Sabat.

¹⁶ Pangaddata wuṛṛu pamadul᷊ite iamangngu wuṛṛu inangngu; uddewe parenta-U, Mawu Ruatanu, tadea'u i yamiu su lal᷊umanna'a wuṛṛu tatuwone iapal᷊o'e su wanua apan Ta'u ionggola si yamiu.

¹⁷ Imbaṛṛangnga mamate.

¹⁸ Imbaṛṛangnga sumandaga.

¹⁹ Imbarangnga manna'o.

²⁰ Imbaṛṛangnga mattialan bahia su ringannu taumata.

²¹ Imbaṛṛangnga numemma pussa'an taumata waine: wal᷊ene, letangnge, awingnge, manga allangnge, manga winatangnga papadul᷊iananna, keledaine ara'e al᷊awo'u saranapa apan tatahuananne.’

²² Eteudde manga parenta apan nionggolu Mawu si yamiu su tempo i yamiu uasemodda su wowone. Su tempo i Tou nabbisara ringannu tingikka ruddallu'a wuassu putungnga wuṛṛu winabbawa maapala, i Tou nangonggolu manga parenta udde, wuṛṛu wal᷊ine parenta waine. Ana see i Tou namoṛṛetta su ruan kul᷊appa watu wuṛṛu nionggola si ya'u.”

Taumatan Israel matta'utta

²³ “Napawe ahewallu wowone udde niṛṛumenggama wuṛṛu i yamiu naaringikka tingikka wuassu ararandumma, anambon piaṛṛa'u ṛuangannu wuṛṛu piaṛṛa'u tumana'u soa nirumanta ringangku.

²⁴ Unni mangitou, ‘Mawu Ruatan kite buatte namasilon ahahewalla wuṛṛu awawantu-Ge su tempo yami naaringikka si Tou mabbisara wuassu putungnga. Allo indi yami naasilote manungku wotongnge taumata sidutu mabbiakka, salaiwe Mawu Ruata buatte nabbisara si tou.

²⁵ Arawe anio yami ṛinone mangonggolu niawan kami? Putungnga apan bahewalla udde sarun mamate si yami! Yami mangimanna manungku yami sarun mate napawe maaringikka tingikku Mawu Ruata mabbisara apia.

²⁶ Apa piate taumata apan sidutu wiakka napawe naaringikka Mawu Ruata apan biakka udde mabbisara wuassu putungnga?

²⁷ Ana waugu udde, roote Musa, daringiṛṛete al᷊awo'u wisaran Mawu Ruatan kite, ana see pasingkata'e si yami wisara apan niapasingkatu Mawu udde si'o. Yami sarun maddaringikka wuṛṛu tumuṛṛutta.’

²⁸ Naaringikka udde, Mawu nabbisara si ya'u, ‘I Ya'u naaringikke wisaran balahanna udde, wuṛṛu wisaran mangitou atonna.

²⁹ Ore amungkangngu i mangitou sidutu uapendamma aroddi! Ore amungkangngu i mangitou sidutu mangngadatta si Ya'u wuṛṛu tuttuṛṛutta anambon tita-U, na'oman sara i mangitou wuṛṛu papapulunni mangitou su al᷊al᷊uassa saran mal᷊annu-l᷊annu!

³⁰ Orassa indi roote wuṛṛu doloṛṛa'a walahanna udde mabelengnga su rasannu sangkatou-sangkatou.

³¹ Arawe i'o Musa, pabelengke wuṛṛu atana'e isindi suadio'a ringang-Ku; i'o sarun Ta'u onggol᷊annu tita wuṛṛu parenta-U. Tantiroa'a si mangitou, tadea'u i mangitou tuttuṛṛutta su wanua apan Ta'u ionggola si mangitou.’

³² Tuṛṛa-tuṛṛangku, paatuṛṛutta ringannu mapia al᷊awo'u parentan Mawu Ruatanu si'o. Imbaṛṛangnga lumawangnga saran sambau wuassu manga parenta udde.

³³ Ola'e sarangkanambone apan nititan Mawu Ruatanu si yamiu tadea'u i yamiu su lal᷊umanna'a wuṛṛu sidutu mattatana'a su wanua apan sarun atanaanni yamiu.”