TAHIUL᷊E 32 - WUKE SUSI WATTI'U AL᷊AL᷊USASSA

¹ “Padaringikke, ore langitta, i ya'u ma'apulu mabbisara; ei runia, pantaingken tal᷊inga!

² Antimanna al᷊aṛṛa'u sumossokka naal᷊ihidda uranna, wuṛṛu manga wisara'u tuttannissa ere wal᷊angngukka, naal᷊ihidda uṛṛintingnga su wowon nannal᷊o, wuṛṛu uranna masassaga su wowon manga sasuanna.

³ I Ya'u sarun maddalo Mawu. Wattia'e awawantugu Ruatan kite!

⁴ Mawu mallal᷊u'addu apan matohassa, manara-Ne nasuungnga, wuṛṛu anambon dal᷊anne matul᷊idda. Ruatanu matammuda, tawe pallal᷊inga si Tou, I tou ma'ola'a apapia wuṛṛu mangke suṛṛinone.

⁵ Arawe ete i yamiu walahanna apan mal᷊awangnga, wuṛṛu tate lai sulal᷊anne maola'a al᷊aṛṛanang-Nge, walahanna apan napenen pallal᷊inga wuṛṛu rosa.

⁶ Ete aroddi yamiu mabbal᷊issa apapian Mawu, ei manga taumata longonna wuṛṛu tawe ṛingiranne? Wal᷊inewe i Tou Iamangngu, Mandariadinu, apan na'ola'a si yamiu sambau walahanna?

⁷ Paanaungete tempo dorone panutukke tempon manga taumata apan nangkal᷊iu. Iwal᷊oite su hagurangngu, tadea'u i mangitou mamasingkatta si yamiu.

⁸ Su tempo Apan Atanggaṛṛanne nattahia leta'a, suapan balahanna nitantunna wageangngu letangnge ringannu sambau Mawu maola'a matataṛṛinone.

⁹ Arawe papapulunni Yakub indi nipile Mawu hunan batangan-Ne sassane.

¹⁰ I Tou naaratingnga si mangitou tantal᷊anna lullalele su tampa apan mal᷊annaba su wadda'a mal᷊alangnga. Ana see i Tou nallu'adda wuṛṛu nappadul᷊i si mangitou wuṛṛu nandiaga si mangitou naal᷊ihidda pussaa-Ne.

¹¹ Naal᷊ihidda ere asiaṛṛe mangngaṛṛa'a anangnge tuttalla'a sinamenna su papaidde apan uawilatta wuṛṛu niandangnge su liudde roso su manga papaidde,

¹² aroddi Mawu sassane namiaṛṛa'u al᷊aṛṛanang-Nge, tawe Mawu waine apan uatantalongnga si tou.

¹³ I Tou na'ola'a si mangitou uataṛṛino manga wowone; i mangitou u'anna hessin manga wawail᷊anna wuṛṛu ma'inumma pul᷊an ahuranganna wuassu wuiddu watu. I mangitou naasomba lana wuassu punnu alun zaitun apan tinumuwo su leta'a wabbatuanna.

¹⁴ sapi wuṛṛu ambinga domba mangitou napasabbangngu manambo susu; winatangngi mangitou apianne, gandumma wuṛṛu ua'e anggori mangitou lembon apianne.

¹⁵ Mawu nabbal᷊i ala, arawe apulune lullawangnga, i mangitou mangkatawa, nal᷊aiddu anna. Ana see i mangitou nanantangngu Ruata, Mandariadine, wuṛṛu nanol᷊a'u Mananal᷊amatti mangitou apan matohassa.

¹⁶ I mangitou massubba paal᷊uanna, na'oman sara Mawu nasa'u, asasa'u-Ne nawitta ana waugu al᷊al᷊eo udde.

¹⁷ I mangitou mangngonggolu sasamba su manga ghaṛṛaho lal᷊eo apan bal᷊ine Ruata, su manga Mawu apan awagananni mangitou, manga Mawu wakku apan tawe iata'uttu al᷊amona mangitou.

¹⁸ I mangitou tawe mappandumma Mananal᷊amatti mangitou apan matohassa, maabul᷊in Duata mangitou apan mangngonggolu wiakka.

¹⁹ Naasilo olangnge udde, Mawu nabbal᷊i nasa'u, wuṛṛu nanol᷊a'u al᷊aṛṛanang-Nge.

²⁰ Wisara-Ne, ‘I Ya'u maddirite mantul᷊ungngi mangitou apia; walate Ta'u ellehanna tanne ereapa panginsueanni mangitou. Ana waugu walahanna udde maatikka puane wuṛṛu mangke tawe tumuṛṛutta.

²¹ I mangitou na'ola'a i Ya'u nasa'u su saranapa apan wal᷊ine Ruata, wuṛṛu massa'u su paal᷊uanna sassubbanni mangitou. Ne i Ya'u na'ola'a manga al᷊aṛṛana-U nasa'u su apa apan wal᷊ine walahanna, wuṛṛu nasa'u su walahanna apan longonna.

²² Asasa'u-U sarun sumawudda naal᷊ihidda putungnga apan nanoṛṛobba naddatingngu runian taumata nate. Putungnga udde nanutungnga runia wuṛṛu al᷊awo'u lal᷊oṛṛone, wuṛṛu manga wowone na'oman sara manga ṛamunne.

²³ Mangke sidutu Ta'u iapparanta asasilaka. Ta'u ipiti'a anambon anaang-Ku si mangitou.

²⁴ I mangitou sarun mate ana waugu sal᷊iubba wuṛṛu al᷊al᷊unussa, wuṛṛu ana waugu radda'a apan ma'ata'utta. Ta'u iwala i mangitou aṛṛatannu winatangnga mal᷊aṛṛaga, wuṛṛu pul᷊isannu atoanna mawisa.

²⁵ Pangalo sarun mangapiddu papate su manga lal᷊anna; atata'utta sarun maṛṛia'a su manga taumata su wal᷊en. Umbasanna wuṛṛu maṛṛuala sarun pateanna, wuṛṛu lai ana'a maradio'a see lai taumata timmadete.

²⁶ I Ya'u maapulu manginsue si mangitou tawe lambene, tadea'u i mangitou tate lai naunganna.

²⁷ Arawe i Ya'u maddiri seettu Israel mamarabunga; aṛṛengenne i mangitou massal᷊a sunna wuṛṛu mabbisara manungku i mangitou namaddon al᷊aṛṛana-U,’ wutte'e ete i Ya'u apan na'ola'a.

²⁸ Israel sambau walahanna apan tawe maṛṛingidda asuene; i mangitou tawe pasasunna.

²⁹ Unnu wisara i mangitou pande, i mangitou sarun maasunna, wuṛṛu maṛṛingiddu panguddusannu allon mangitou.

³⁰ Ereapa wotongnge sangkatou ma'aenggenna saṛṛiwu su atoune, wuṛṛu ruan katou maaola'a mapul᷊o ṛiwu su atoune tumal᷊angnga? Mawu, Ruata mangitou, buatte nabbal᷊u'i mangitou; i mangitou tinantangken Duata apan matohassa.

³¹ Seettu Israel masingkatta manungku mallal᷊u'addi mangitou tawe ere Ruata mallu'addu Israel.

³² Ana waugu i mangitou lal᷊eo ere Sodom wuṛṛu Gomora, ere punnu anggore apan mapetta wuṛṛu wuane ma'apate.

³³ Ua'en anggori mangitou eteudde pasangkaddu atoanna mawisa.

³⁴ Mawu uanaungnga inolaannu manga seen-Ne wuṛṛu sarun makkuumanni mangitou su tempone.

³⁵ Mawu sarun mabbal᷊issa wuṛṛu makkuumanni mangitou, tate mal᷊annu lai i mangitou mate; napawe tempo papaten mangitou udde rumantate.

³⁶ Mawu sarun manal᷊amatta al᷊aṛṛanang-Nge wuṛṛu umakkannu manga allang-Nge, napawe i Tou maasilo i mangitou lomete wuṛṛu niasueanten atatohassa.

³⁷ Ne Mawu sarun maiwal᷊o al᷊aṛṛanang-Nge, ‘Suapate manga Mawu matohassa apan tantaṛṛimanni yamiu?’

³⁸ I mangitou u'inassa tawa apan nionggoli yamiu, wuṛṛu ma'inumma anggore apan nionggoli yamiu. Doloṛṛa'e i mangitou mantul᷊ungngi yamiu, wala'e i mangitou maola'a mandariaganu.

³⁹ Pa'ellege, i Ya'u Ruata Apan Tinggassa, tawe Duata wal᷊ine tumba'u i Ya'u. I Ya'u mammate wuṛṛu mappaawiakka mallessa wuṛṛu mangngapia. Napawe i Ya'u mammanarate, tawe saran sangkatou apan botongnge lumawangnga.

⁴⁰ Ringannu arang-Ku sassane, Ruata apan biakka, Iwatte lima-U wuṛṛu massalu:

⁴¹ I Ya'u sarun mandampassu hal᷊ele-U apan lullendappa, wuṛṛu mappaamattu pallaṛṛuumanna. Ta'u wal᷊isanna anambon se'e-U wuṛṛu Ta'u iṛṛuumanna anambon apan maddanting-Ku.

⁴² Manga anaang-Ku sarun mappeta'u daṛṛan mangitou; sarangkanambone apan mannal᷊are si Ya'u Ta'u pateannu hel᷊ele-U, Tawe Ta'u iwala pia sangkatou apan lumawangnga si Ya'u; taumata tataṛṛanganna wuṛṛu nal᷊al᷊essa sarun mate lai.

⁴³ Wette manga walahanna, paddalote al᷊aṛṛana'u Mawu, ana waugu Mawu makkuumannu sarangkanambone apan namate si mangitou. I Tou nabbal᷊issa taddu'u naungnga su manga se'en-Ne arawe nangampungnga rosan manga al᷊aṛṛanang-Nge.”

⁴⁴ I Musa wuṛṛu i Yosua ana'i Nun nangantarin antari indi, na'oman sara taumatan Israel sarangkanambone naaringikka antari udde.

I Musa nangonggolu manga tatantiro panginsueanne

⁴⁵ Napawe buatte namasingkattu manga al᷊aṛṛa'u Mawu su walahannu Israel,

⁴⁶ i Musa nabbisara, “Panutukke anambon parenta apan Ta'u nionggola si yamiu allo indi. Tantiroa'a su al᷊aṛṛanangngu, tadea'u i mangitou ringannu matammuda mappaamattu anambon titan Mawu.

⁴⁷ Al᷊aṛṛa'a udde wal᷊inewe manga wisara wawahia, ewe'e udde maawiakka sio. Paatuṛṛutte su anambon parenta udde, tadea'u uukka mal᷊o'engnga su wanua apan tate mal᷊annu lai atanaanni yamiu su samba'an Sal᷊ukku Yordan.”

⁴⁸ Su allo udde lai Mawu nabbisara si Musa,

⁴⁹ “Roote watukku Panenteannu Abarim su wanua Moab su samba'an soan Yerikho. Ana see saate watukku Wowon Nebo wuṛṛu pa'ellege leta'u Kanaan apan tate mal᷊annu lai Ta'u itantilla su walahannu Israel.

⁵⁰ I'o sarun mate su puiddu wowone udde, ere lai i Harun tuṛṛangngu nate su Wowon Hor.

⁵¹ Iraddua tawe maatuṛṛutta si Ya'u wuṛṛu tawe mangaddata si Ya'u su saruannu walahannu Israel su tempo i yamiu na'omate su al᷊imatan ua'en Meriba, maranin soan Kades, su wadda'u Zin.

⁵² Ana waugu udde i'o tawe wotongnge sumutta su wanua apan Ta'u ionggola su walahannu Israel; i'o tumba'u wotongnge ma'ellega ro'en marau.”