TAHIUL᷊E 3 - WUKE SUSI WATTI'U AL᷊AL᷊USASSA

Israel namaddon Datun Og

¹ “Wua'udde i ite inaite watukku sawannaka mattuddan bageangngu leta'u Basan. I Og, ratun Basan inaite lai ringannu anambon tantarane mamangalo si ite maranin soan Edrei.

² Arawe Mawu nabbisara si ya'u, ‘Arie pa'ata'utti tou, Musa. I Ya'u sarun manantilli tou, tantarane wuṛṛu ahewallu wageangngu letangnge si'o. Ola'e i tou ere lai buatte Ta'u niola'a si Sihon, ratun Amori apan uaparenta su Hesybon.’

³ Nariaddi Mawu Ruatan kite lai nanantilli Ratu Og wuṛṛu tumanangnge si ite, wuṛṛu i mangitou sarangkanambone niawaddang kite.

⁴ Su tempo udde i ite naapangaṛṛo anambon soane, tawe saran ambau apan natantangnga. Sarangkanambone annumu pul᷊o soa apan niaaṛṛo su ahewallu wageangngu leta'u Argob, apan paparentanni Ratu Og wuassu Basan.

⁵ Anambon soa udde nitohassu manga darandungnga apan matanggakka, manga ngarane wuṛṛu manga papal᷊e ngara ipaṛṛuuddu manga ngara udde. Wal᷊ine wua'udde lai manambo soa waine apan tawe darandungnge.

⁶ Anambon soa udde nihohakki ite, wuṛṛu anambon taumata esakka, wawine wuṛṛu al᷊aṛṛana'i mangitou nipaten kite, ere lai niola'i ite su manga soan Datu Sihon wuassu Hesybon.

⁷ Winatangnga papadul᷊iananni mangitou anuanni ite wuṛṛu manga soa udde niaṛṛong kite saranapane.

⁸ Su tempo udde i ite nanganu wuassu ruang katou ratun Amori udde leta'a su samba'a da'in Sal᷊ukku Yordan wuṛṛu Sal᷊ukku Arnon maddatingngu Wowon Hermon.

⁹ (Wowon Hermon isassago Siryon ṛatangannu taumatan Sidon, wuṛṛu Senir unnu taumatan Amori.)

¹⁰ I ite nanganu ahewallu wageangngu leta'i Ratu Og wuassu Basan: manga soane su wuidda, wuṛṛu wageangngu leta'u Gilead wuṛṛu Basan, masal᷊a watukku ra'i araune sara soa Salkha wuṛṛu Edrei.”

¹¹ (I Ratu Og uddewe taumatan Refaim panginsueanne. Wasungnge biola'a wuassu watu, al᷊o'engnge appata su meterene wuṛṛu al᷊alakke maranin darua su meterene tumuṛṛuttu uuṛṛanna apan nitantunna. Saran orassa indi ta'e wotongnge ellehanna su Raba, soan taumatan Amon.)

Manga ṛuanganna apan natana'a su wageangngu leta'a samba'an da'in Sal᷊ukku Yordan

¹² “Napawe leta'a udde naola'e pussa'ang kite, i ya'u nangonggola su ṛuanganni Ruben wuṛṛu i Gad wageangngu leta'a su samba'an sawannaku soan Aroër maranin Sal᷊ukku Arnon, wuṛṛu sambageanganna wuassu leta'u wuiddu Gilead nasutta lai manga soane.

¹³ Su sambageanganna ṛuanganni Manasye i ya'u nangonggolu lamben leta'u Gilead, wuṛṛu lai wageangngu leta'u Basan apan wua niparentanni Og; eteudde ahewallu wageangngu leta'u Argob.” (Basan tinumelengnga naola'a wanuan taumatan Refaim.

¹⁴ I Yair wuassu ṛuanganni Manasye nanganu ahewallu wageangngu leta'u Argob, eteudde wuassu Basan maddatingngu passarannu Gesur wuṛṛu Maakha. Manga ampungnga udde nisaggon tou tumuṛṛuttu aranne sassane, wuṛṛu naddatingngu orassa indi ta'e tinumelengnga manga ampungngi Yair.)

¹⁵ “Wageangngu leta'u Gilead ta'u nionggola su ṛuanganni Makhir wuassu ṛuanganni Manasye.

¹⁶ Wuṛṛu su ṛuanganni Ruben wuṛṛu i Gad ta'u nionggol᷊annu wageangngu leta'a suwallatu Gilead wuṛṛu Sal᷊ukku Arnon. Pattangngannu sal᷊ukka udde maola'a passaranni mangitou su samba'an timukka, ewe'e su sawannakka passaranni mangitou Sal᷊ukku Yabok, wuṛṛu sambageanganna lai maola'a passarannu wanuan taumatan Amon.

¹⁷ Su samba'an baṛṛatta, wageangngu leta'i mangitou uawannadda maddatingngu Sal᷊ukku Yordan, Wuassu Ranon Galilea su sawannakka maddatingngu Tahal᷊oangnga Nate su samba'an timukka, masal᷊a watukku wawal᷊annu Wowon Pisga su samba'an ra'i.

¹⁸ Tempo udde i ya'u nangonggolu parenta indi si mangitou: Mawu Ruatanu nangonggola si yamiu wageangngu leta'a su samba'a ra'in Sal᷊ukku Yordan maola'a tampaatatanaannu. Arawe manga tantaranu ṛinone pia lutangnge wuṛṛu malliu Sal᷊ukku Yordan malliu dorone manga ṛuangannu Israel waine.

¹⁹ Tumba'u ana'a awingngu see lai winatangnga papadul᷊ianannu apan botongnge matana'a su manga soa apan ta'u nionggola si'o.

²⁰ Passumbalate manga taumata sambalahannu ma'oman sara i mangitou maatana'a su leta'a apan sarun ionggolu Mawu Ruatanu si mangitou su samba'an baṛṛatu Sal᷊ukku Yordan, wuṛṛu ma'oman sara Mawu mamalan mangitou mabbiakka ringannu matammuda poiaroddi, ere lai niola'i Tou isindi. Wua'udde wotongngete mabelengnga watukku letangngu apan buatte ta'u nionggola sio.

²¹ Ana see i ya'u nabbisara si Yosua: I'o buatte naasilo sarangkanambone apan buatte niola'u Mawu Ruatanu si Sihon wuṛṛu si Og, ruan katou ratu udde. Aroddi lai i Tou sarun ma'ola'a manga ratu apan letangnge anuanni yamiu.

²² Imbaṛṛangnga mata'utti mangitou, ana waugu Mawu Ruatanu sidutu uarundinganna si yamiu.”

I Musa tawe niwala sumutta su Kanaan

²³ “Su tempo udde i ya'u sinumal᷊ande su Mawu:

²⁴ Oh Mawu Apan Atanggaṛṛanne, i ya'u masingkatta manungku nipasilonu si ya'u indi tumba'u panattaṛṛannu al᷊awo'u inolaanna apan bahewalla wuṛṛu ma'atiangnga. Tawe Mawu wal᷊ine sulangitta ara'e su runia apan ere I'o wotongnge ma'ola'a inolaanna apan waluwalla.

²⁵ Wala'awe i ya'u inai malliu Sal᷊ukku Yordan, oh Mawu, inai ma'ellega wanua apan masuwukka su samba'ane, leta'u panenteanna apan maṛṛamaga wuṛṛu Panenteannu Libanon.

²⁶ Arawe ete i yamiu naaola'a Mawu nasa'u si ya'u na'oman sara i Tou maddirite maddaringikka sasal᷊ande'u. Arawe Mawu nabbisara, ‘Wotongngete, Musa, ariete hatto udde isul᷊enu apia!

²⁷ Roote watukku puiddu Wowon Pisga wuṛṛu pa'ellege watukku sawannakka wuṛṛu watukku timukka, watukku ra'i wuṛṛu watukku waṛṛatta. Ellehete paapia-pia apa niasiloannu udde, ana waugu i'o tawe maal᷊iu Sal᷊ukku Yordan.

²⁸ Onggol᷊ete manga tatantiro i Yosua. Paatanaa'a naungnge, ana waugu ete i tou apan mamiaṛṛa'u walahanna udde watukku samba'a wuṛṛu mangintaṛṛo su wanua apan aellehannu udde.’

²⁹ Ne i ite natana'e su wawal᷊anne su samba'an soa Bet-Peor.”