TAHIUL᷊E 29 - WUKE SUSI WATTI'U AL᷊AL᷊USASSA

¹ Indiwe manga wisaran pa'aire wuassu parentan Mawu apan niola'i Musa su walahannu Israel su tempo i mangitou su leta'u Moab. Pa'aire udde maola'a tatimune wuassu pa'aire apan niola'u Mawu si mangitou su Wowon Sinai.

Mannaungnga apia apapian Mawu wuṛṛu pa'aire-Ne

² I Musa nandolokku anambon taumatan Israel niapaammula, ana see nabbisara si mangitou, “I yamiu naasilote sassane inolaannu Mawu su saruannu ratun Mesir, manga mammamanarane wuṛṛu ahewallu wanuane.

³ I yamiu lai naasilote manga asasusa wuṛṛu manga al᷊aṛṛindu'a apan niola'u Mawu.

⁴ Arawe naddatingngu allo indi i Tou taambe namalan kamiu massunna sarangkanambone apan niapendamanni yamiu udde.

⁵ Appatu pul᷊o su tonnane al᷊annune Mawu uapiaṛṛa'i yamiu u'amatta su wadda'a, arawe laungngu wuṛṛu silopenu tawe nal᷊al᷊eo.

⁶ I yamiu tawe roti annananna, ua'e anggore ara'e ua'e ma'awu'anna, arawe Mawu nangonggolu al᷊awo'u apa pappan pappandumanni yamiu tadea'u i yamiu masingkatta manungku ete i Tou Mawu Ruatanu.

⁷ Wuṛṛu su tempo i ite na'omate su tampa indi, Ratun Sihon wuassu Hesybon wuṛṛu Ratu Og wuassu Basan nirumanta namangalo si ite. Arawe i ite namaddon mangitou.

⁸ Leta'i mangitou niaṛṛon kite wuṛṛu tinahian kite su ṛuanganni Ruben, i Gad wuṛṛu sambageanganna ṛuanganni Manasye.

⁹ Ne i yamiu ṛinone matammuda tuttuṛṛuta al᷊awo'u pa'aire-Ne indi tadea'u i yamiu mahessi su al᷊awo'u inasaharannu.

¹⁰ Allo indi yamiu uarisikke su saruannu Mawu Ruatanu, anambon tembonannu ṛuanganna, timmadu wanua, piaṛṛa'u tantara, anambon taumata esakka,

¹¹ wawine, al᷊aṛṛana'a, wuṛṛu anambon taumata raho apan uatana'a su wallati yamiu wuṛṛu nallal᷊ima si yamiu nanuwangnga alu wuṛṛu namasanna ua'e.

¹² Mawu Ruatanu na'ola'a pa'aire ringanni yamiu, wuṛṛu i yamiu sarangkanambone uasemodda isindi nabaiddu pa'aire udde ana see nanengkamma manga manara apan ala'anna.

¹³ Ringannu pa'aire udde Mawu allo indi mannohassa si yamiu maola'a walahan-Ne, wuṛṛu i Tou maola'a Mawu Ruatanu ere buatte nipa'ire-Ne si yamiu wuṛṛu su iupungngu al᷊amonanu Abraham, Ishak wuṛṛu Yakub.

¹⁴ Pa'aire udde ringannu al᷊awo'u manarane niola'u Mawu wal᷊ine tumba'u si yamiu sassane,

¹⁵ arawe ringannu al᷊awo'u taumata apan su allo indi uarisikka isindi, su saruannu Mawu Ruatan kite, wuṛṛu ringannu papapulunni ite su tempo apan addantane.”

Pangillul᷊eannu tawe tumuṛṛutta Mawu

¹⁶ “I yamiu ta'e ma'anaungnga ereapa i ite mabbiakka su Mesir wuṛṛu ereapa i ite u'amatta sinumabbi wanuan manga walahanna waine.

¹⁷ I yamiu buatte naasilo manga paal᷊uanna sassubbanni mangitou apan ma'arantinna niola'a wuassu alu, watu, sal᷊a'a wuṛṛu wul᷊awanna.

¹⁸ Nariaddi paatehamma imbaṛṛangnga pia sangkatou suwallati yamiu, esakka ara'e wawine, tuṛṛangnga ara'e ṛuanganna apan uarisikka isindi, tumal᷊iudda Mawu Ruatan kite wuṛṛu massubba manga Mawu balahanna waine. Inolaanna udde naal᷊ihidda ṛamutta apan tinumuwo naola'a sasuanna mapetta wuṛṛu ere pasangkada.

¹⁹ Suwallatti yamiu apan naaringikka atoranna apan masahadda udde, imbaṛṛangnga piaddu maṛṛingidda manungku ola'u pabbiaṛṛanne sidutu mapia, salaiwe i tou ringannu apulun naungnge niumamatta su lal᷊anne sassane. Olangnge udde sarun maawinasa si yamiu sarangkanambone, manga taumata lal᷊eo ara'e lai taumata mapia.

²⁰ Mawu tawe mangampungnga taumata ereudde. Arawe i tou sarun aṛṛinoannu asasa'um Mawu apan ahewal᷊anne, wuṛṛu al᷊awo'u asasusa apan uawoṛṛetta sulal᷊ummu wuke indi sarun maṛṛia'a si tou, na'oman sara i tou pateannu Mawu.

²¹ I tou sarun olaannu Mawu maola'a sambau tul᷊adda su anambon ṛuangannu Israel, wuṛṛu maṛṛuumanni tou ringannu wontoga apan isassago sulal᷊ummu pa'aire apan uawoṛṛetta sulal᷊ummu wuke indi, wuke Titan Mawu.

²² Su allo addantane, papapulunnu wuṛṛu taumata raho wuassu wanua marau sarun maasilo manga asasilaka wuṛṛu asasusa apan niaparantan Mawu su wanuanu.

²³ Manga wawail᷊annu sarun maola'a wadda'a lol᷊okka tataapannu belerangnga wuṛṛu asimma. Letangnge tate asuananna wuṛṛu manga ahuranganna maddirite tumuwo isudde. Wanuanu sarun maola'a ere manga soa Sodom wuṛṛu Gomora, Adma wuṛṛu Zeboim apan nihohakku Mawu su tempo i Tou mangke nasa'u.

²⁴ Ne ahewallu runia sarun maiwal᷊o, ‘Anio Mawu na'ola'a aroddi su wanua mangitou? Anio ana waugu i Tou aroddi ahewalle nasa'u?’

²⁵ Wuṛṛu sasimbakke eteudde, ‘Ana waugu i mangitou tinumal᷊iudda pa'airen Mawu, Mawu Ruatan iupungngu al᷊amona mangitou; pa'aire apan niolang-Nge ringanni mangitou su tempo i Tou nangapiddi mangitou sinumabbangnga wuassu Mesir.

²⁶ I mangitou mattaṛṛamawu manga Mawu apan awagananni mangitou, sumbal᷊i Mawu manningaddi mangitou massubba manga monganna udde.

²⁷ Ana waugu udde Mawu nasa'u su al᷊aṛṛanang-Nge wuṛṛu nandanta su wanua mangitou anambon asasusa apan uawoṛṛetta sulal᷊ummu wuke indi.

²⁸ Asasa'u Mawu mangke sinumopa, wuṛṛu sulal᷊ummu asasa'u-Ne apan bahewalla udde i Tou nallimbuakka walahannu Israel wuassu leta'i mangitou wuṛṛu nangapidi mangitou watukku wanua apan awagananna, na'oman sara i mangitou natana'e poiaroddi.’

²⁹ Pia manga pira hatto apan iaadappingngu Mawu Ruatan kite; arawe tita-Ne buatte niapal᷊iatta'a si ite, wuṛṛu i ite see papapulunni ite ṛinone tumuṛṛutta saran mal᷊annu-l᷊annu.”