TAHIUL᷊E 28 - WUKE SUSI WATTI'U AL᷊AL᷊USASSA

Al᷊amatta su taumata apan matuṛṛutta

¹ “Amungkangngu i yamiu matuṛṛutta Mawu Ruatanu wuṛṛu ringannu matammuda mammanara al᷊awo'u parenta apan ta'u nionggola allo indi, ne i Tou sarun ma'ola'a si yamiu sambau walahanna apan ahewal᷊anne wuṛṛu tumelengke su runia.

² Paatuṛṛutta Mawu Ruatanu, ne anambon al᷊amatta indi sarun ionggola si yamiu:

³ Nial᷊amatante manga soa wuṛṛu manga wawail᷊annu.

⁴ Nial᷊amatante i yamiu, ma'oman sara manga anangngu manambo, hessin letangngu lumambalanna wuṛṛu sapi see lai ambingnga dombanu anambone a'atambanna.

⁵ Nial᷊amatante pangangitingnga gandumma see lai anna apan niola'i yamiu wuassu gandumma udde.

⁶ Nial᷊amatante al᷊awo'u inasaharannu.

⁷ Amungkangngu i yamiu pangaloanna, Mawu sarun mamaddon seennu. I mangitou sarun mamangalo ringannu uaatokka, arawe tumal᷊angnga ringannu uasongkakka.

⁸ Mawu Ruatanu sarun mangal᷊amatta inasaharannu wuṛṛu malloṛṛo wal᷊ingkakku ringannu gandumma. I Tou sarun mangal᷊amatta si yamiu su wanua apan nionggoli Tou si yamiu.

⁹ Amungkangngu i yamiu matuṛṛutta Mawu Ruatanu wuṛṛu ma'ola'a al᷊awo'u tita-Ne, i yamiu sarun olaanna al᷊aṛṛanang-Nge sassane, ere buatte niriandi-Ne.

¹⁰ Ne anambon balahanna su runia sarun maasilo manungku i yamiu balahanna apan nipilen Mawu, ne i mangitou sarun mangantagi yamiu.

¹¹ I yamiu sarun onggol᷊annu manambo ana'a. Winatangnga papadul᷊ianannu manambo wuṛṛu hessin letangngu nilumambalanna su wanua apan nipa'iren Mawu su iupungngu al᷊amonanu apan ionggola si yamiu.

¹² Mawu sarun manossokku uranna su tempone wuassu tampa aradoanne su langitta. I Tou sarun mangal᷊amatta al᷊awo'u inasaharannu, na'oman sara i yamiu wotongnge mapawallassa su anambon balahanna, arawe i yamiu sassane tawe mabballassa.

¹³ Mawu Ruatanu sarun ma'ola'a si yamiu mamamiaṛṛa'a suwallatu manga walahanna, wuṛṛu wal᷊ine mallal᷊aṛṛenggena. Amungkangngu i yamiu maaddunna tuttuṛṛutta anambon parentan Mawu apan ta'u nionggola si yamiu allo indi, i sarun lembon su lal᷊umanna'a wuṛṛu tawe sarun paassa sumoṛṛotta.

¹⁴ Arawe imbaṛṛangnga saran paassa maabul᷊in manga parenta udde salaiwe ringannu ereapa olangnge. Imbaṛṛangnga lai massubba wuṛṛu mattaṛṛamawu su manga mawu waine.”

Inul᷊eannu manga lal᷊awangnga

¹⁵ “Arawe amungkangngu i yamiu tawe tumuṛṛutta Mawu Ruatanu, wuṛṛu tawe matammuda tuttuṛṛutta al᷊awo'u parenta wuṛṛu manga tita-Ne apan ta'u nionggola si yamiu allo indi, ne al᷊awo'u wontoga indi sarun maṛṛia'a si yamiu:

¹⁶ Niawontohante manga soa wuṛṛu wawail᷊annu.

¹⁷ Niawontohante pangangitingnga gandumma wuṛṛu anna apan niola'i yamiu wuassu gandumma udde.

¹⁸ Niawontohante i yamiu, na'oman sara tumba'u matul᷊u anangngu, hessin letangngu, see lai ambinga dombanu.

¹⁹ Niawontohante al᷊awo'u inasaharannu.

²⁰ Amungkangngu i yamiu pia pallal᷊agu lal᷊eo wuṛṛu mannol᷊a'u Mawu, i Tou sarun mandantan asasusa, pattatatiakka wuṛṛu asasahadda su al᷊awo'u inolaanni yamiu, ne su tempo apan mal᷊ihakka i yamiu pateanna abbi.

²¹ Radda'a see lai radda'a sarun maṛṛia'a si yamiu, ma'oman sara panginsueanne tawe saran sangkatou apan ta'e uatana'a su wanua apan wawanuanni yamiu udde.

²² Mawu sarun makkuumanni yamiu ringannu radda'a apan ma'al᷊iu, manga hanne, wuṛṛu sal᷊iubba. I Tou sarun mandantan paddisa tadea'u leta'a mamara wuṛṛu anginna apan mal᷊oso ma'oman sara pangangitingngu mal᷊al᷊eo. Manga asasusa udde sidutu maṛṛia'a si yamiu ma'oman sara i yamiu mate.

²³ Uranna tawe manguranna wuṛṛu letangngu mabbal᷊i maatikka ere atta'a.

²⁴ Mawu tawe manossokku uranna ua'e, ewe'e uranna awu wuṛṛu anne ma'oman sara i yamiu mate.

²⁵ Amungkangngu i yamiu tawe maddaringikka Mawu Ruatanu, i Tou sarun ma'ola'a si yamiu mawaddo su manga seennu. I yamiu sarun mamangalo ringannu uaatokka arawe tumal᷊angnga ringannu uasongkakka. Anambon balahannu su runia sarun maapendamma atata'utta maasilo asasusanu.

²⁶ Amungkangngu i yamiu mate, winal᷊unannu maola'a inassu manga manu'u winalanganna wuṛṛu winatangnga mal᷊aṛṛaga, wuṛṛu taweddu mallimbuakka manga winatangnga udde.

²⁷ Mawu sarun makkuumanni yamiu ringannu manga pinsulla ere lai buatte niolangnge su taumatan Mesir. Wadangngu sarun mapenen ibbongnga wuṛṛu akke apan maatilla, arawe tawe undamme.

²⁸ Mawu sarun ma'ola'a si yamiu mabbewa, wuta wuṛṛu umal᷊iwu.

²⁹ Su allo allatune i yamiu uasasaṛṛipo naal᷊ihidda taumata wuta arawe tawe maasangkalla lal᷊anna. Al᷊awo'u inasaharannu tawe maola'a. I yamiu sidutu iassasa'a wuṛṛu paṛṛampassanna, wuṛṛu taweddu mangontolla si yamiu.

³⁰ Amungkangngu i yamiu tawe tumuṛṛutta Mawu Ruatanu, manga inolaanna indi sarun maṛṛia'a si yamiu: I yamiu sarun mattatunanga arawe taumata waine ma'awingngu tunanganu udde. I yamiu sarun mapararisikku wal᷊en, arawe tawe atanaanna. I yamiu sarun massuanna waillu anggore, arawe tawe maanna manga wuane.

³¹ Sapinu sarun pototanna su saruannu matanu, arawe i yamiu tawe maa'inassa. Manga keledainu sarun inai iapidda tantal᷊anna aellehanni yamiu wuṛṛu sarun tawe iul᷊e. Manga dombanu sarun ionggola su manga seennu wuṛṛu taweddu mangontolla si yamiu.

³² Su saruannu matanu manga al᷊aṛṛanangngu sarun ionggola su taumata raho maola'a allangnga. Miallo-miallo matanu mapal᷊atta maddea'a manga anangngu, arawe sahaddu udde tawe gunane, ana waugu i mangitou tate mabelengnga.

³³ Walahanna raho sarun manahuanna anambon hessin leta'a apan niasombanganni yamiu ringannu mammanara masahadda, arawe i yamiu sassane tawe maasomba manga apa tumba'u sidutu naiola'a allangnga wuṛṛu papparentanna ringannu maṛṛagissa.

³⁴ I yamiu sarun mabbewa ana waugu sarangkanambone apan niapendamanni yamiu.

³⁵ Mawu sarun ma'ola'a leddanu mapenen ibbongnga apan mahiadda wuṛṛu tawe mapia, wuassu ledda maddatingngu pentakku puanu mapenen manga pinsulla.

³⁶ I yamiu wuṛṛu ratunu sarun iapiddu Mawu watukku wanua apan awagananni yamiu wuṛṛu awaganannu iupungngu al᷊amonanu. Isudde i yamiu sarun mattaṛṛamawu manga Mawu apan niola'a wuassu alu wuṛṛu watu.

³⁷ Su manga wanua tampan kamiu nisal᷊iawukku Mawu, manga taumata sarun mata'utta maasilo si yamiu; yamiu sarun al᷊uandahanna wuṛṛu ilagge mangitou.

³⁸ Manambo wualanna apan niasi'i yamiu, arawe matul᷊unga hessine apan asombanganni yamiu, ana waugu sasuannu nasuete ni'annu saṛṛappalanna.

³⁹ I yamiu sarun massuanna manga wawail᷊annu anggore wuṛṛu mappadul᷊i, arawe tawe maati'o wuan anggore udde wuṛṛu ma'inumma ua'ene, ana waugu punnu anggore udde nasuete niannu ul᷊idda.

⁴⁰ Su ahewallu wanuanu tumuwo punnu zaitun, arawe manga wuane sarun matontongnga, ma'oman sara i yamiu tawe mausomba lanane.

⁴¹ I yamiu sarun maasomba ana'a esakka wuṛṛu wawine, arawe i mangitou iasametta su pangalo, ma'oman sara i yamiu awul᷊ianni mangitou.

⁴² Anambon alu wuṛṛu sasuannu sarun masue annanannu ul᷊idda.

⁴³ Manga taumata raho apan uatana'a su wanuanu sarun lembon mattohassa, arawe atatohannu lembon magaingnga.

⁴⁴ I mangitou uatahuanna roitta iapawallassa si yamiu, arawe i yamiu tawe saranapa iapawallassa si mangitou. Wuṛṛu panginsueanne i yamiu massuṛṛubawa si mangitou.

⁴⁵ Al᷊awo'u silaka udde sarun maṛṛia'a si yamiu wuṛṛu sidutu mannal᷊awa'i yamiu ma'oman sara i yamiu mate, ana waugu i yamiu tawe tumuṛṛutta manga tita apan nionggola si yamiu.

⁴⁶ Manga asasusa udde maola'a sambau tiala wuassu titan Mawu si yamiu wuṛṛu papapulunnu saran mal᷊annu-l᷊annu.

⁴⁷ I yamiu buatte nial᷊amatannu Mawu Ruatanu sulal᷊ummu al᷊awou manaranu, arawe i yamiu maddiri mattaṛṛamawu si Tou ringannu naungnga matul᷊idda wuṛṛu mal᷊uassa.

⁴⁸ Ana waugu udde i yamiu ṛinone mattaṛṛamawu manga seennu apan nirolokku Mawu iaparoappa si yamiu. I yamiu sarun amal᷊unusanna, marou wuṛṛu matantol᷊e wuṛṛu sidutu awussa sulal᷊ummu al᷊awo'u inolaanna. Mawu sarun makkuumanni yamiu ringannu maṛṛagissa ma'oman sara i yamiu mate.

⁴⁹ Sambau walahanna apan tawe asunnanni yamiu wisarane sarun iaparantan Mawu wuassu pentakku runia iaparoappa si yamiu. Naal᷊ihidda manu'a iamba i mangitou mangametta si yamiu.

⁵⁰ I mangitou mal᷊aṛṛaga wuṛṛu tawe aakkanne su manga timmade wuṛṛu al᷊aṛṛana'a.

⁵¹ I mangitou sarun manginsue winatangnga papadul᷊ianannu wuṛṛu hessin letangngu, wuṛṛu tawe manantangngu gandumma si yamiu, ua'e anggore, lanan zaitun ara'e sapi wuṛṛu ambingnga dombanu ma'oman sara i yamiu mate amal᷊unusanna.

⁵² I mangitou sarun mamangalo al᷊awo'u soa apan nionggolu Mawu Ruatanu si yamiu, ma'oman sara darandungnge apan matanggakka wuṛṛu matohassa ipamungan kamiu udde sarun maṛṛa'a.

⁵³ Tantal᷊anna manga seennu uapal᷊iwutta manga soanu, naungngi yamiu sarun maadio'a ana waugu ammal᷊unusanna, na'oman sara i yamiu niuminassa manga anangngu sassane, manga ana'a apan nionggolu Mawu Ruatanu si yamiu.

^54-55 Ewe'e lai taumata papunna apan pallal᷊agune mapia sarun maadio'a naungnge su tempon pangalo udde, ma'oman sara i tou uminassa anangnge sassane ana waugu tate anna wal᷊ine. Tawe saran addio'a i tou nagonggolla su tuṛṛangnge ara'e awingnge apan arangnguanne ara'e manga anangnge apan ta'e wiakka.

^56-57 Ewe'e lai wawine papunna apan lembon apianne pallal᷊agune wuṛṛu lembon ala taambe tawe saran paassa niumamattu ledda, sarun ma'ola'a aroddi lai. Su tempo seetta mamangalo soa, wawine udde sarun maadio'a naungnge ana waugu mal᷊unussa, na'oman sara i tou ringannu ma'imbuni uminassa anangnge apan wakkute niasungkanga wuṛṛu wabbal᷊ine. Tawe saran addio'a i tou nangonggola su awingnge apan arangnguanne ara'e su manga anangnge.

⁵⁸ Amungkangngu i yamiu tawe tumuṛṛutta anambon titan Mawu Ruatanu apan uawoṛṛetta sulal᷊ummu wuke indi wuṛṛu tawe mangaddata Mawu Ruatanu apan mawantuga wuṛṛu ma'atiangnga,

⁵⁹ Mawu sarun mandanta si yamiu wuṛṛu papapulunnu manga radda'a apan tawe mapia wuṛṛu manga riwutta apan masahadda pangundamanne.

⁶⁰ Manga radda'a ma'ata'utta apan niasiloanni yamiu su Mesir sarun maṛṛia'a si yamiu, wuṛṛu i yamiu tate mapia.

⁶¹ Mawu lai sarun mandantan al᷊awo'u radda'a wuṛṛu riwutta apan tawe niwoṛṛetta sulal᷊ummu wuke indi, wuken Titan Mawu. Ana see i yamiu sarun pateanna.

⁶² Salaiwe reengannu anambone erete anumpitanna su langitta, tumba'u matul᷊unga suwallatti yamiu apan ta'e wiakka, ana waugu i yamiu tawe tumuṛṛutta Mawu Ruatanu.

⁶³ Ere lai Mawu mal᷊uassa mangonggolu lal᷊umanna'a si yamiu wuṛṛu mannimu reengannu, i Tou sarun mal᷊uassa mamate wuṛṛu manginsue si yamiu. I yamiu sarun limbuaṛṛanna wuassu wanua apan tate mal᷊annu lai atanaanni yamiu.

⁶⁴ Mawu sarun manal᷊iawukki yamiu suwallatu manga walahanna su ahewallu runia. Poiaroddi yamiu sarun massubba manga Mawu apan niola'a wuassu alu wuṛṛu watu, manga Mawu apan awagananni yamiu wuṛṛu awaganannu iupungngu al᷊amonanu.

⁶⁵ Suwallatu manga walahannu udde i yamiu tawe maasomba atatammudda, wuṛṛu tawe apan botongnge isaggo pussaanu; Mawu sarun ma'ola'a si yamiu sussal᷊impawakka wuṛṛu naungnga maadio'a tawe antimma.

⁶⁶ Wiakku sidutu raṛundingannu asasusa. Allo ṛabbi yamiu maapendamma atata'utta wuṛṛu matta'uttu mate.

⁶⁷ Su tempo maasilo al᷊awo'u saranapa, pappusonu rudadalla ana waugu matta'utta. Marua'allo i yamiu uaantimma ṛabbi, wuṛṛu ṛabbi-ṛabbi yamiu uaantimma marua allo.

⁶⁸ Mawu sarun mandolokki yamiu apia watukku Mesir ringannu uasa'e apalla, salaiwe i Tou buatte nabbisara manungku i yamiu tawe mabelengnga apia poiaroddi. Poiaroddi yamiu sarun mattinsahadda mabbal᷊u'u watangannu maola'a allangnga su seennu, arawe tawe saran sangkatou apan mamalli si yamiu.”