TAHIUL᷊E 27 - WUKE SUSI WATTI'U AL᷊AL᷊USASSA

Manga titan Duata niwoṛṛetta su watu

¹ Wua'udde suadio'a ringannu piaṛṛa'u Israel, i Musa namasingkatu tanata indi su walahanna udde, “Paatuṛṛutta su al᷊awo'u parenta apan ta'u nionggola si yamiu allo indi.

² Su allo i yamiu tinumumbe Sal᷊ukku Yordan inai sumutta watukku wanua apan nionggolu Mawu Ruatanu si yamiu, i yamiu ṛinone mapararisikku manga pira watu wahewalla ana see wuṛṛanna.

³ Woṛṛeta'a su manga watu udde suapan bisara wuassu manga tita indi. Napawe i yamiu nasuttate su wanua apan ala wuṛṛu masuwukka apan pina'iren Mawu, Mawu Ruatan iupungngu al᷊amonanu si yamiu,

⁴ wuṛṛu i yamiu su sambaaten Sal᷊ukku Yordan, i yamiu ṛinone inai watukku Wowon Ebal. Isudde i yamiu ṛinone mapararisikka wuṛṛu mamuṛṛa manga watu udde, ere buatte ta'u nirolokka si yamiu allo indi.

⁵ Su tampa udde lai yamiu ṛinone ma'ola'a meddan sasamba su Mawu Ruatanu wuassu watu apan saran paassa taambe nimaran manga sarannapa atta'a,

⁶ ana waugu suapan mezbah apan nipararisikka hunan Mawu Ruatanu ṛinone olaanna wuassu watu apan matohassa. Su wowon mezbah udde ṛinone i yamiu mangonggollu manga sasamba itattambunna.

⁷ Onggol᷊a'e lai sasamban paddaramenu wuṛṛu ante lai isudde ana see lalluasse su saruannu Mawu Ruatanu.

⁸ Su wowon manga watu apan niwuṛṛanna udde ṛinone iwoṛṛetti yamiu ringannu masemakka suapan bisara wuassu manga titan Duata.”

⁹ Wua'udde suadio'a ringannu manga imam Lewi, i Musa nabbisara su anambon balahannu Israel, “Tuṛṛa-tuṛṛangnga, panutukke wuṛṛu paddaringikke! Allo indi yamiu naola'a al᷊aṛṛana'u Mawu Ruatanu.

¹⁰ Ana waugu udde paatuṛṛutte Mawu Ruatanu wuṛṛu daringiṛṛete anambon parenta-Ne apan ta'u nionggola si yamiu allo indi.”

Wontoga su taumata apan tawe tumuṛṛutta

¹¹ Ana see i Musa nabbisara su walahannu Israel,

¹² “Napawe i yamiu buatte tinumumbe Sal᷊ukku Yordan, ṛuanganni i Simeon, i Lewi, i Yehuda, i Isakhar, i Yusuf wuṛṛu i Benyamin ṛinone rumarisikka su puiddu Wowon Gerizim su tempo mangal᷊amatta walahanna indi.

¹³ Su tempo mabbisaran wawontoga, ṛuanganni Ruben, i Gad, i Asyer, i Zebulon, i Dan wuṛṛu i Naftali ṛinone rumarisikka su puiddu Wowon Ebal.

¹⁴ Manga taumatan Lewi ṛinone mabbisara manga wisara ere indi ringannu tingikka ma'ikkata wuṛṛu taumatan Israel ṛinone sumimbakka, ‘Amin’.

¹⁵ Manga taumatan Lewi: ‘Niawontohante taumata apan ma'ola'a paal᷊uanna wuassu watu, alu ara'e atta'a, wuṛṛu massubba si tou ringannu ma'imbuni; Mawu maddantinnu pasasubba paal᷊uanna!’ Anambon tumana'u soa: ‘Amin!’

¹⁶ ‘Niawontohante taumata apan tawe mangaddata hagurangnge wuṛṛu namalan mangitou tawe padul᷊iananna.’ ‘Amin!’

¹⁷ ‘Niawontohante taumata apan mannese'u passarannu leta'u al᷊indonganne.’ ‘Amin!’

¹⁸ ‘Niawontohante taumata apan mangngal᷊iwun taumata wuta.’ ‘Amin!’

¹⁹ ‘Niawontohante taumata apan mangngaṛṛo pussa'an taumata raho, ana'a asisintimpal᷊ussa, wuṛṛu wawine wal᷊u.’ ‘Amin!’

²⁰ ‘Niawontohante taumata apan mangadio'a hagurangnge ana waugu nassawa suwallatu sangkatou awingngu iamangnge.’ ‘Amin!’

²¹ ‘Niawontohante taumata apan nassawa winatangnga.’ ‘Amin!’

²² ‘Niawontohante taumata apan nassawa tuṛṛangnge wawine apan hagurangnge sambau, ara'e tuṛṛangnge iamangnga wuṛṛu inangnga sambau.’ ‘Amin!’

²³ ‘Niawontohante taumata apan nassawa inangnga la'iananna.’ ‘Amin!’

²⁴ ‘Niawontohante taumata apan ma'ola'a pamamate ringannu ma'imbuni.’ ‘Amin!’

²⁵ ‘Niawontohante taumata apan mannengkamma roitta aonggola tadea'u ipamate taumata apan tawe sal᷊ane.’ ‘Amin!’

²⁶ ‘Niawontohante taumata apan tawe tumuṛṛutta tita wuṛṛu al᷊aṛṛa'u Mawu Ruata ringannu pallal᷊aggu.’ ‘Amin!’ ”