TAHIUL᷊E 26 - WUKE SUSI WATTI'U AL᷊AL᷊USASSA

Sasamba wuassu hessin pangitinganna

¹ “Napawe i yamiu nasuttate su wanua apan nionggolu Mawu Ruatanu si yamiu wuṛṛu uatana'e isudde,

² ne hessi paarorone wuassu al᷊awo'u sasuanna apan niammuli yamiu wuassu letangngu ṛinone itaṛṛo su so'anna, wuṛṛu apira'i yamiu watukku tampa apan nipilen Mawu Ruatanu.

³ Roote ringannu imam apan mammanara orassa udde wuṛṛu wal᷊oa'a si tou, ‘I ya'u mamasingkatta Mawu Ruatanu manungku i ya'u na'omate su wanua apan buatte nipa'ire-Ne su iupungngu al᷊amonan kite apan ionggola si ite.’

⁴ Imam sarun manengkamma so'anna udde wuassu limanu wuṛṛu iaddo su saruannu meddan sasamban Mawu Ruatanu.

⁵ Wua'udde su saruannu Mawu Ruatanu, i'o ṛinone mabbisara manga wisara indi: ‘Oh Mawu, iupungngu al᷊amona'u sangkatou taumatan Aram apan lullalele. I tou nangapiddu amonanne watukku Mesir natana'a poiaroddi ere tumatal᷊angnga. Su tempo inai poiaroddi reenganni mangitou tumba'u addio'a, arawe i mangitou naola'a walahanna apan bahewalla wuṛṛu matohassa.

⁶ Taumatan Mesir na'ola'a si yami ringannu maṛṛagissa, wuṛṛu mammata'i yami mammanara ere sangkatou allangnga.

⁷ Ana see yami sinumal᷊ande maiontolla Si'o, Mawu, Ruatan iupungngu al᷊amonan kami. I'o naddaringikka sasal᷊anden kami wuṛṛu na'ellega asasahadda, wuṛṛu asasusa see asasansaran kami.

⁸ Ringannu taṛṛino wuṛṛu atatohassa apan bahewalla I'o namallosi yami wuassu Mesir. I'o na'ola'a manga tanda ma'atiangnga wuṛṛu manga al᷊aṛṛindu'a wuṛṛu manga arariadianna apan maata'utta seetta.

⁹ Wua'udde I'o nangapiddi yami isindi wuṛṛu nangonggolu leta'a apan ala wuṛṛu masuwukka indi si yami.

¹⁰ Ana waugu udde, oh Mawu, ta'u ionggola orassa indi hessine paarorone wuassu leta'a apan nionggolu Mawu si ya'u.’ Ana see addoa'e so'anna su saruannu Mawu Ruatanu, wuṛṛu passubbate si Tou.

¹¹ Pa'adiangkamante su al᷊awo'u wiakka apan nionggolu Mawu Ruatanu si yamiu wuṛṛu su amonannu. Aheite taumatan Lewi wuṛṛu taumata raho apan uatana'a suwallati yamiu apan uatantalongnga sulal᷊ummu ramea udde.

¹² Suapan tonna atallune i yamiu ṛinone mangonggolu sasamba sepere mapul᷊o, eteudde sepere mapul᷊o wuassu hessin letangngu su imam Lewi, taumata raho, ana'a asisintimpal᷊ussa wuṛṛu inawal᷊uanna, ma'oman sara suapan soanu i mangitou maasomba anna apan pappandumanni mangitou. Amungkangngu buatte,

¹³ pabbisarate su Mawu Ruatanu, ‘Wuassu sepere mapul᷊o hessin leta'a apan ṛinone ionggola Si'o, Mawu, tawe saran addio'a apan natantangnga su wal᷊e'u; sarangkanambone buatte ta'u nionggola su taumatan Lewi, taumata raho, ana'a asisintimpal᷊ussa wuṛṛu inawal᷊uanna, ere buatte nirolokku Mawu Ruata'u si ya'u. Wuassu parentan Mawu su ola'u sasamba sepere mapul᷊o tawe ta'u nilawanganna.

¹⁴ Wuassu sasamba udde tawe saran addio'a apan ta'u nianna su tempo i ya'u lullal᷊o, ara'e ta'u niapidda su liuddu wal᷊en su tempo i ya'u na'ola'a al᷊al᷊eo, ara'e ta'u nionggola maola'a wiakku taumata nate. I ya'u matuṛṛutta Si'o, oh Mawu; al᷊awo'u parenta-Nu buatte ta'u niola'a.

¹⁵ Wuassu tampa-Nu apan na'ukkassa su surga sal᷊andeanna I'o mangintanno mata-Nu wuṛṛu mangal᷊amatta Israel; al᷊amate lai wanua apan ala wuṛṛu masuwukka apan buatte nionggolu Mawu si yami ere lai su paaire-Nu su iupungngu al᷊amonan kami.’ ”

Al᷊aṛṛana'a nipilen Mawu

¹⁶ “Allo indi Mawu Ruatanu namarenta si yamiu iapatuṛṛutta al᷊awo'u parenta indi; ola'e sarangkanambone udde ringannu matuṛṛutta wuṛṛu ringannu ahewallu naungngu.

¹⁷ Allo indi yamiu manga'ute Mawu maola'a Mawu Ruatanu. I yamiu buatte naddiandi matuṛṛutta si Tou wuṛṛu mappaamattu al᷊awo'u tita wuṛṛu parenta-Ne.

¹⁸ Allo indi Mawu nanengkamma si yamiu maola'a al᷊aṛṛanang-Nge sassane, ere buatte nipa'ire-Ne si yamiu, wuṛṛu i Tou namarenta si yamiu iapatuṛṛutta al᷊awo'u parenta-Ne.

¹⁹ Mawu sarun ma'ola'a si yamiu maggewal᷊anna wuassu anambon balahanna wal᷊ine apan buatte niriadi-Ne, wuṛṛu i yamiu sarun raloanna wuṛṛu adatanna. I yamiu sarun maola'a al᷊aṛṛana'u Mawu Ruata ere buatte nipa'ire-Ne.”