TAHIUL᷊E 23 - WUKE SUSI WATTI'U AL᷊AL᷊USASSA

Manga taumata apan tawe nasutta al᷊aṛṛana'u Mawu

¹ “Taumata apan buatte niwutu ara'e niponggo'a palline tawe wotongnge mawal᷊i maola'a al᷊aṛṛana'u Mawu.

² Taumata apan nariaddi su suliuddu awingnga wuṛṛu anambon papapulunne sara appul᷊one rawanne, tawe maola'a al᷊aṛṛana'u Mawu.

³ Taumatan Amon wuṛṛu Moab see lai papapulunni mangitou maddatingngu appul᷊one ṛawanne tawe wotongnge maola'a al᷊aṛṛana'u Mawu,

⁴ ana waugu i mangitou maddiri mangonggolu anna wuṛṛu ua'e si yamiu su tempo i yamiu sulal᷊ummu amatanna sumabbangnga wuassu Mesir. Ewe'e lai i mangitou nanewa si Bileam, ana'i Beor wuassu soan Petor su Mesopotamia iapawontoga si yamiu.

⁵ Arawe Mawu Ruatanu maddiri madaringikka si Bileam. Ewe'e lai nawal᷊i'a i Tou namal᷊u wontoga udde nabbal᷊i al᷊amatta, ana waugu i Tou marangngu si yamiu.

⁶ Su al᷊annune i yamiu mabbiakka wuṛṛu saran mal᷊annu-l᷊annu, imbaṛṛangnga mantul᷊ungu manga walahanna udde ara'e ma'ola'a si mangitou su lal᷊umanna'a.

⁷ Imbaṛṛangnga mangadio'a taumatan Edom ana waugu i mangitou udde tuṛṛangngu. Imbaṛṛangnga lai mangadio'a taumatan Mesir, ana waugu i yamiu buatte natana'a su wanuan mangitou.

⁸ Manattaka wuassu pal᷊laṛṛawanna attallune wuṛṛu manansunna wuassu papapulunni mangitou wotongnge maola'a al᷊aṛṛana'u Mawu.”

Mallu'adda awawaresi paddasanannu tantara

⁹ “Su tempo i yamiu tantal᷊anna uapapangalo, i yamiu ṛinone mallinda'u al᷊awo'a apan ma'alal᷊eo si yamiu.

¹⁰ Amungkangngu sangkatou nalal᷊eo ana waugu napasabbangngu sari'a su tempo i tou mattiilla, i tou ṛinone manantangngu paddasananna wuṛṛu matana'a su liudde.

¹¹ Su orassu mabbawallo i tou ṛinone mandeno wuṛṛu su tempo matannallo umattupe i tou wotongngete mabelengnga su paddasananna.

¹² I yamiu ṛinone manaddi'a tampan onassa ara'e pandammeannu ua'e su liuddu paddasannanna.

¹³ Amungkangngu i yamiu inaite mandammen ua'e, apira'e lai wal᷊ine wuassu saranapanu, alu sampadi ipaal᷊i loṛṛangnga tampa auruanna wuṛṛu ipangombo.

¹⁴ Mawu Ruatanu uarundinganna si yamiu sulal᷊ummu paddasanannu, mallu'adda si yamiu wuṛṛu mangonggolu auntunganna wuassu manga seennu. Ne paariagaite paddasanannu tadea'u sidutu waresi. Imbaṛṛangnga asombanganna pia sambau apan tawe natataṛṛino si yamiu, tadea'u Mawu tawe manantangngi yamiu.”

Al᷊awo'u atoranna

¹⁵ “Amungkangngu sangkatou allangnga nassal᷊iu nanantangngu mawune ana see rumanta ringanni yamiu maiontolla, arie mandollokki tou iapapul᷊e.

¹⁶ I tou wotongnge matana'a suwallatu sambau soanu tumuṛṛuttu apulune, wuṛṛu imbaṛṛangnga i yamiu maṛṛagissa si tou.

¹⁷ Sangkatou taumatan Israel, mawae esaka ara'e wawine, tawe wotongnge maola'a masandaga su manga tampan pasasubbanna.

¹⁸ Wuṛṛu lai roitta ina'ul᷊e sinumandaga imbaṛṛangnga iapidda su Wal᷊en Mawu Ruatanu ipamaekka riandi, ana waugu Mawu Ruatanu maddantinnu sumasandaga su tampan pasasubbanna wuṛṛu roitta wawaekku sussandaga.

^19-20 Amungkangngu i yamiu mapawallasu roitta su taumata raho, i yamiu wotongnge madorongnga wungane. Arawe amungkangngu i yamiu mapawallasu roitta ara'e anna ara'e saranapa wal᷊ine su taumata walahanna sambau, awallassa udde ia'ul᷊e ringannu tawe bungane. Paatuṛṛutta parenta udde, ne Mawu Ruatanu mangal᷊amatta al᷊awo'u manaranu su wanua apan wawanuanni yamiu.

²¹ Amungkangngu i yamiu maddiandin sambau saranapa su Mawu Ruatanu, imbaṛṛangnga isoṛṛotta manipussa riandi udde, ana waugu Mawu Ruatanu sidutu mannusi, wuṛṛu i yamiu narosate amungkangu tawe manipussa.

²² I yamiu tawe marosa amungkangngu tawe naddiandin Mawu.

²³ Arawe amungkangngu i yamiu ringannu apulun naungngu maddiandin Mawu Ruatanu ṛinone i yamiu manipussa riandi udde.

²⁴ Amungkangngu i yamiu tantal᷊anna u'amatta su waillu anggoru taumata waine, i yamiu wotongnge umanna wuan anggore walate apulun kamiu, arawe imbaṛṛangnga mangalludda itaṛṛo su so'anna.

²⁵ Amungkangngu i yamiu tantal᷊anna u'amatta sussabbi waillu gandummu taumata waine, i yamiu wotongnge umanna gandumma apan niitingngu limanu kamiu, arawe tawe wotongnge itingannu hal᷊ele.”