TAHIUL᷊E 22 - WUKE SUSI WATTI'U AL᷊AL᷊USASSA

¹ Amungkangngu sapi ara'e domba pussa'an sangkatou sambalahannu nial᷊iwune wuṛṛu i yamiu naasilo winatangnga udde, ariewe maielembaga, arawe apira'e winatangnga udde wuṛṛu welenga'e su tatahuanne.

² Amungkangngu tatahuanne marau wal᷊ene, ara'e i yamiu wagga tanne isai tatahuanne, apira'e winatangnga udde su wal᷊enu. Amungkangngu tatahuanne rumanta maddea'a, tantil᷊a'e si tou.

³ Ola'e aroddi lai amungkangngu i yamiu naasangkala keledai, samparassa laubba, ara'e al᷊awo'u saranapan taumata sambalahanni yamiu.

⁴ Amungkangngu sambau keledai ara'e sapin taumata sambalahannu nawantingnga su lal᷊anna, arie maielembagga, arawe tul᷊unga'a i tou mapararisikku winatangnga udde apia.

⁵ Wawine imbaṛṛangnga malluṛṛen laubbu esakka wuṛṛu esakka imbaṛṛangnga malluṛṛen laubbu wawine, ana waugu inolaannu taumata aroddi ipaddantinnu Mawu Ruatanu.

⁶ Amungkangngu i yamiu naasangkalla sambau sal᷊akku manu'u winalanganna su aaluanna ara'e su leta'a ringannu inangnge apan uararaṛṛi tallukke ara'e suadio'a ringannu anangnge, imbaṛṛangnga manganu manu'a udde.

⁷ I yamiu wotongnge manganu ana'u manu'a udde, arawe wala'e inangnge tumalla'a, tadea'u uukki yamiu mal᷊o'engnga wuṛṛu mabbiakka su lal᷊umanna'a.

⁸ Amungkangngu i yamiu ma'ola'a wal᷊en, i yamiu ṛinone ma'ola'a paggala uapal᷊iwutta wiwikku atumme. Ne i yamiu pasasal᷊an tawe salane pia taumata nanawo wuassu atuppa udde ana see nate.

⁹ Imbaṛṛangnga massuannu sasuanna wal᷊ine su waillu anggore, tumba'u uarundussa anggore. Amungkangngu i yamiu massuanna lai, i yamiu tawe mapanganu hessin bailla udde, mawae ete anggore, aroddi lai sasuanna waine.

¹⁰ Imbaṛṛangnga mamasen sambau sapi wuṛṛu sambau keledai su pajeko sambau.

¹¹ Imbaṛṛangnga malluṛṛen laubba apan niola'a wuassu wolla wuṛṛu linen apan niraddu'a suadio'a.

¹² Laungngu ola'ete wawungkelene su wuune appata.”

Atoranna su ola'u paapulun esakka wuṛṛu wawine

¹³ “Unnu wisara sangkatou esakka na'awingngu sangkatou maṛṛuala, wuṛṛu wua'udde i tou maddirite lai.

¹⁴ I tou na'ola'a aansilla awusu manungku awingnge tate lai perawanna su tempo itarua naawingnga.

¹⁵ Sulal᷊ummu olangnge udde hagurangngu wawine ṛinone manganu laubba nipa'awingnga apan pia lanna'u daṛṛane, apan ipattiala manungku ana'i mangitou su tempo udde ta'e perawanna. Nasa udde ṛinone iapasilon mangitou su manga tembonannu soa su tampa pamamarikisanna.

¹⁶ Iamangngu maṛṛuala udde ṛinone mabbisara si mangitou, ‘I ya'u buatte nanantillu ana'u su taumata indi maola'a awingnge, arawe orassa indi i tou maddirite.

¹⁷ I tou na'ola'a aansilla awusu ringannu nabbisara manungku awingnge wal᷊ine perawanna su tempo itarua na'awingnga. Arawe indi tatialane manungku ana'u su tempo udde ta'e perawanna. Pa'ellege lanna'u daṛṛa su laubba nipa'awingnga indi!’

¹⁸ Ne manga timmaddu soa udde ṛinone mamago manga esakka iapapuulla si tou.

¹⁹ I mangitou lai ṛinone mapawaekka si tou maṛṛasutta roitta sal᷊a'a wuṛṛu manantillu roitta udde su la'ianannane, anna waugu i tou buatte nandal᷊eo arannu sangkatou wawinen Israel. Wuṛṛu lai wawine udde sidutu maola'a awingnge, wuṛṛu imbaṛṛangnga sindoanna su al᷊o'engngu pabbiaṛṛanne.

²⁰ Arawe unnu wisara aansilla udde atonna wuṛṛu tawe tatialane manungku awingnge udde ta'e perawanna su tempo na'awingnga,

²¹ ne wawine udde ṛinone iapidda watukku ngaran wal᷊en hagurangnge. Su tampa udde manga esakka wuassu soa udde ṛinone manuntungngu watu si tou ma'oman sara mate. Wawine udde buatte na'ola'a inolaanna apan ma'asili walahanni ite ana waugu natatamba taambe na'awingnga su tempo i tou ta'e uatana'a ringannu iamangnge. Ringannu makkumanni tou i yamiu mangnginsue al᷊al᷊eo udde.

²² Amungkangngu sangkatou esakka niataappa i tou uatatamban awingngu taumata waine, itarua ṛinone iṛṛuumanna pateanna. Ringannu aroddi yamiu mangnginsue al᷊al᷊eo udde.

²³ Unnu wisara sulal᷊ummu soa pia sangkatou esakka niaratinganna uatatamban sangkatou maṛṛuala apan buatte natatamban taumata waine.

²⁴ Sulal᷊ummu hatto udde i mangitou ṛinone iapidda su liuddu soa wuṛṛu tuntungannu watu ma'oman sara mate. Maṛṛuala udde ṛinone pateanna ana waugu i tou tawe niumui maiontolla, ana waugu olangnge udde nariaddi sulal᷊ummu soa, suapan aintul᷊ine wotongnge iaringikka. Wuṛṛu esakka udde ṛinone pateanna ana waugu i tou natatamban maṛṛuala apan piate parene. Ringannu nakkuumanni tarua, i yamiu mangngisue al᷊al᷊eo udde.

²⁵ Arawe baine lai olangnge amungkangngu su wailla sangkatou esakka nakkampassa sangkatou maṛṛuala apan piate tanangane waine. Sulal᷊ummu olangnge udde tumba'u esakka udde apan ṛinone iṛṛuumanna pateanna.

²⁶ Maṛṛuala udde tawe botongnge iṛṛuumanna ana waugu tawe inolaanne apan wotongnge maaṛṛuumanna si tou. Hatto udde naal᷊ihidda hatton sangkatou apan nango'a taumata waine wuṛṛu nipate.

²⁷ Paṛṛaṛṛampassa udde nariaddi su wailla, wuṛṛu salaiwe maṛṛuala udde mangngintul᷊i ma'iontolla, arawe tawe taumata nangontolla si tou.

²⁸ Unnu wisara pia sangkatou esakka niaratinganna tantal᷊anna maṛṛampassa sangkatou wawine apan taambe tungane.

²⁹ Sulal᷊ummu olangnge udde i tou ṛinone mamaekka su hagurangngu maṛṛuala udde wul᷊awunnu awingnga aregane liman pul᷊o roitta sal᷊a'a. Maṛṛuala udde ṛinone maola'a awingnge ana waugu i tou niwata'a mattatamba wuṛṛu su al᷊o'engngu pabbiaṛṛanne i tou tawe wotongnge sindoanna.

³⁰ Tawe saran sangkatou apan botongnge mangal᷊uandaga hagurangnge ringannu matiilla suwallatu sangkatou awingngu hagurangnge.”