TAHIUL᷊E 20 - WUKE SUSI WATTI'U AL᷊AL᷊USASSA

Atoranna su ola'u pangalo

¹ “Amungkangngu i yamiu inai mapapangalo mandoappa manga seennu, imbaṛṛangnga mata'utta maasilo keretan pangalo wuṛṛu awal᷊on mangitou apan manambo see lai tantaran mangitou apan reenganne nilumebbe wuassu reenganni yamiu. Mawu Ruatanu apan namallossi yamiu wuassu Mesir sarun mantul᷊ungngi yamiu.

² Tantal᷊anna taambe manattakka mapapangalo, sangkatou imam ṛinone umamatta dorone wuṛṛu mabbisara si yamiu arendi,

³ ‘Tuṛṛa-tuṛṛangnga, paddaringikka! Allo indi yamiu inaite mapapangalo. Imbaṛṛangnga mata'utta ara'e maadio'a naungngu ara'e ial᷊iwune.

⁴ Mawu Ruatanu sarun tumantalongnga mantul᷊ungngi yamiu, wuṛṛu i Tou sarun mangonggolu auntunganna si yamiu.’

⁵ Wua'udde manga tembonannu tantara ṛinone mamasingkattu manga wiasara indi si yamiu, ‘Piatewe apa pia taumata su wallati yamiu apan wakkute napararisikku wal᷊en, arawe taambe nallaghu pamamaattu wal᷊en udde? Amungkangngu pia, i tou wotongngete mapul᷊e. Ana waugu amungkangngu i tou niapate sulal᷊ummu pangalo, taumata wal᷊ine sarun matana'a su wal᷊ene.

⁶ Apa pia taumata su wallati yamiu apan wakkute nassuanna waillu anggorene wuṛṛu taambe napani'o manga wuan anggorene? Amungkangngu pia, i tou wotongngete mapul᷊e. Ana waugu amungkangngu i tou niapate sulal᷊ummu pangalo, taumata wal᷊line sarun mallal᷊umanna'u ua'en anggorene.

⁷ Apa suwallati yamiu pia taumata apan uaa'apulu wuṛṛu ma'awingke? Amungkangngu pia i tou wotongngete mapul᷊e. Ana waugu amungkangngu i tou niapate sulal᷊ummu pangalo, taumata wal᷊ine sarun ma'awingnga ringannu tunangane.’

⁸ Manga tembonannu tantara lai ṛinone mamasingkattu indi si yamiu, ‘Apa suwallati yamiu pia taumata apan itattangngone wuṛṛu matal᷊o? Amungkangngu pia, i tou wotongngete mapul᷊e, tadea'u i tou tawe maaurangnga naungngu taumata wal᷊ine.’

⁹ Napawe manga tembonannu tantara buatte nabbisara manga tantara, ṛinone ita'e lai manga piaṛṛa'u manga wuntuanna.

¹⁰ Amungkangngu i yamiu inaite mamangalo sambau soa, onggol᷊eten tempone asuene manga tumanangnge manantillu watanganne.

¹¹ Amungkangngu i mangitou namu'essa manga ngaran soa wuṛṛu nanantillu watanganne, i mangitou sarangkanambone ṛinone maola'a allangngi yamiu wuṛṛu mattaṛṛuallangnga si yamiu.

¹² Arawe amungkangngu tumana'u soa udde maddiri manantillu watanganne wuṛṛu lembon mappulu mapapangalo, i yamiu ṛinone mangaṛṛo soa udde.

¹³ Wua'udde napawe Mawu Ruatanu mamalan kamiu mangaṛṛo soa udde, i yamiu ṛinone mamate anambon tumanangnge esakka.

¹⁴ Arawe i yamiu wotongnge mangapiddu wawine, al᷊aṛṛana'a, winatangnga wuṛṛu al᷊awo'u lal᷊oṛṛon soa udde. Al᷊awo'u darotongngu manga seennu udde wotongnge ipaatti yamiu. Mawu Ruatanu manantillu udde si yamiu.

¹⁵ Etearoddi apan ṛinone olaanni yamiu su manga soa apan marau wuassu wanua atatanaannu.

¹⁶ Arawe amungkangngu soa udde addone sulal᷊ummu wageangngu leta'a apan nionggolu Mawu Ruatanu si yamiu, tumanangnge sarangkanambone ṛinone pateanna.

¹⁷ Ere buatte nirolokku Mawu Ruatanu, i yamiu ṛinone mamate manga taumatan Het, Amori, Kanaan, Feris, Hewi wuṛṛu Yebus.

¹⁸ Patete i mangitou, tadea'u i mangitou tawe maarosa si yamiu su saruannu Mawu Ruatanu wangu i mangitou mangaṛṛa'a si yamiu ma'ola'a manga inolaanna apan ma'arantinna wuassu manga mawun mangitou.

¹⁹ Napawe i yamiu mamangalo sambau soa wuṛṛu wotongnge iaaṛṛo su tempo apan mal᷊annu, imbaṛṛangnga manuwangnga alu apan pia buane isudde. Ante manga wuane, arawe arie pattuwangnga alune, ana waugu manga alune udde wal᷊inewe seennu.

²⁰ Aaluanna waine wotongnge tuwanganni yamiu olanna tanda'a lal᷊indumma seetta ma'oman sara soa udde manawote.”