TAHIUL᷊E 2 - WUKE SUSI WATTI'U AL᷊AL᷊USASSA

¹ Panginsueanne i ite nabelengnga su wadda'a sinumabbi lal᷊anna apan mattuddan Eṛṛesannu Akaba, ere buatte nirolokku Mawu. Mal᷊annu i ite mammal᷊intaddu wageangngu panenteannu Edom.

² Ana see Mawu nabbisara si ya'u

³ manungku mal᷊annute i ite mammal᷊intaddu wageangngu leta'a udde. Nariaddi i ite ṛinone watukku sawannakka.

⁴ Wua'udde i ya'u nirolokku Mawu niapaonggolu manga tatantiro indi si yamiu, ‘Tate mal᷊annu lai yamiu sumuttate su wanua Edom, wageangngu leta'u manga tuṛṛangngu, papapulunni Esau. I mangitou sarun mata'utti yamiu,

⁵ arawe i yamiu tawe wotongnge mamangalo si mangitou, ana waugu wuassu leta'i mangitou sara sarang kadio'a lai tawe Ta'u ionggola si yamiu, ana waugu wageangngu leta'u Edom buatte Ta'u nionggola su papapulunni Esau.

⁶ I yamiu wotongnge mamalli anna wuṛṛu ua'e wuassi mangitou.’

⁷ Paanaungete ereapa Mawu Ruatanu buatte nangal᷊amatta si yamiu su al᷊awo'u manaran kamiu. I Tou nappaddul᷊i tantal᷊anna mammal᷊intaddu wadda'a apan mal᷊alangnga indi. I Tou ual᷊u'adda si yamiu al᷊annune appatu pul᷊o su tonnane indi, wuṛṛu nangonggolu saranapa apan pappandumanni yamiu.

⁸ Wua'udde i ite nanassukku amatanna, nanantangngu lal᷊anna apan sumabbi manga soan Elat wuṛṛu Ezion-Geber mattudan watukku Tahal᷊oangnga Nate, ana see mabbeṛṛo watukku lawassiitta mattuddan wadda'u Moab.

⁹ Mawu nabbisara si ya'u, ‘Taumatan Moab papapulunni Lot, imabaṛṛangnga i yamiu manal᷊awa'a si mangitou. Imbaṛṛangnga lai mamangalo si mangitou. Wanua Ar buatte Ta'u nionggola si mangitou wuṛṛu wuassu leta'i mangitou sarang kadio'a lai tawe Ta'u ionggola si yamiu.’ ”

¹⁰ (Dorone Ar wawanuannu taumatan Emim. I mangitou wahahewalla wa'ikke, nassul᷊ungngu taumatan Enak, wuṛṛu lai walahannu wawalla.

¹¹ Ere lai taumatan Enak, i mangitou lai isassago taumatan Refaim, arawe i mangitou nisaagon taumatan Moab aranne taumatan Emim.

¹² Dorone taumatan Hori uatana'a su Edom, arawe nilimbuaṛṛanna wuṛṛu nipaten papapulunni Esau, apan sal᷊immurine namanua su leta'i mangitou; aroddi lai walahannu Israel apan sal᷊immurine nallimbuakka manga seenne wuassu leta'a apan nionggolu Mawu si mangitou.)

¹³ “Wua'udde i ite nalliute Sal᷊ukku Zered ere buatte nirolokku Mawu si ite.

¹⁴ Udde nariaddi tallun pul᷊o ual᷊u su tonnane napawe i ite nanatangngu Kades-Barnea. Anambon tantara wuassu su tempo udde natte ere buatte niwal᷊on Mawu.

¹⁵ Mawu sidutu lullawangnga si mangitou na'oman sara i mangitou sarangkanambone nate.

¹⁶ Napawe i mangitou sarangkanambone natete,

¹⁷ Mawu nabbisara si ite,

¹⁸ ‘Allo indi yamiu umamatta su wageangngu leta'u Moab, sumabbi wanua Ar.

¹⁹ Ne i yamiu na'omate maranin leta'u taumatan Amon, papapulunni Lot. Imbaṛṛangnga manal᷊asa'i mangitou ara'e mamangalo si mangitou, ana waugu wuassu leta'a apan buatte Ta'u nionggola si mangitou, sarang kadio'a tawe Ta'u ionggola si yamiu.’ ” (

²⁰ Wageangngu leta'a udde lai tinumelengnga aranne wanua Refaim, arannu walahanna apan dorone uatana'a isudde; ṛatangannu taumatan Amon i mangitou nisaggo taumatan Zamzumim.

²¹ Ere lai taumatan Enak, i mangitou wahahewalla wa'ikke. I mangitou matohassa, wuṛṛu reenganne manambo. Arawe Mawu namate si mangitou, na'oman sara taumatan Amon naapangaṛṛo leta'a udde, wuṛṛu namanuate isudde.

²² Aroddi lai niola'u Mawu su taumatan Edom, papapulunni Esau, apan uawanua su wageangngu leta'u panenteannu Edom. Mawu namate taumatan Hori, na'oman sara taumatan Edom nangaṛṛo leta'a udde wuṛṛu nangintaṛṛo isudde, ana see namanuate isudde naddatingngu orassa indi.

²³ Leta'a su al᷊o'engngu Tahal᷊oangngu Tangngane wawanuannu manga taumata wuassu taṛṛanusan Kreta. I mangitou buatte namate taumatan Awi, tumana'u leta'a udde tutune, ana see natana'a su leta'a udde naddatingngu timukka araune sara soa Gaza.)

²⁴ “Napawe i ite buatte sinumabbi leta'u Moab, Mawu nabbisara si ite; ‘Orassa indi roote i yamiu lumiu Sal᷊ukku Arnon. I Ya'u sarun manantilli Sihon si yamiu, ratun Amori apan uaparenta su Hesybon, suadio'a ringannu wanuane. Pangaloite i tou, ana see atana'ete letangnge.

²⁵ Manattakka allo udde i Ya'u sarun ma'ola'a si yamiu ia'ata'uttu manga walahanna su al᷊awo'u tampa. Suapan taumata sarun mangiladdu atata'utta napawe maaringikka su ola'i yamiu.’ ”

Israel namaddon Datun Sihon

²⁶ “Wua'udde i ya'u nandolokku daroloṛṛanna wuassu wadda'u Kedemot inai ringanni Ratu Sihon wuassu Hesybon iapapasingkattu darorongngu paddarame indi;

²⁷ ‘Wala'awe yami sumabbi wanuan Tuangku. Yami tawe umotongnga wuṛṛu tawe sumewadda wuassu lal᷊anna wahewalla.

²⁸ Yami sarun mamaekka anna apan anananni yami wuṛṛu ua'e apan inumanni. Yami tumba'u mappandumma sumabbi su wanua indi,

²⁹ ma'oman sara yami lumewessa Sal᷊ukku Yordan inai sumutta watukku wanua apan nionggolu Mawu Ruatan kami si yami. Papapulunni Esau apan uatana'a su Edom wuṛṛu taumatan Moab apan uatana'a su Ar buatte lai namalan kami sumabbi leta'i mangitou.’

³⁰ Arawe i Ratu Sihon tawe namalan kite sumabbi wanuane udde. Mawu Ruatanu napa'aattiku naungnge wuṛṛu mappandumma tadea'u i ite wotongnge mamaddon i tou. Wageangngu letangnge ta'e datanaanni ite naddatingngu orassa indi.

³¹ Wua'udde Mawu nabbisara si ya'u, ‘I Ratu Sihon wuṛṛu wanuane Ta'u itantilla si yamiu; anute wuṛṛu atana'e su wanua udde.’

³² Ne i Sihon nirumantate ringannu anambon tantarane inai mamangalo si ite maranin soan Yahas.

³³ Arawe Mawu Ruatan kite nanantilli tou si ite, ana see i ite namaddon tou suadio'a ringannu al᷊aṛṛanangnge wuṛṛu anambon tantarane.

³⁴ Su tempo udde lai i ite nangaṛṛo wuṛṛu naṛṛimunsa'a anambon soa, wuṛṛu namate anambon tumanangnge, esakka, wawine wuṛṛu al᷊aṛṛana'a. Taweddu niwala ta'e wiakka.

³⁵ I ite nanganu winatangngi mangitou wuṛṛu manga soane niaṛṛon kite.

³⁶ Ringannu tul᷊ungannu Mawu, i ite wotongnge naapangaṛṛo anambon soa udde, manatakka wuassu Aroër, su pentakku Wawal᷊annu Arnon, wuṛṛu soa su pattangngannu wawal᷊anna udde, maddatingngu wageangngu leta'u Gilead. Tawe soa apan darandungnge matohassa si ite.

³⁷ Arawe i ite tawe nangundanin wageangngu leta'u taumatan Amon ara'e su wiwikku Sal᷊ukku Yabok ara'e manga soa su wageangngu panenteanna ara'e al᷊awo'u tampa waine apan isassingaddu Mawu Ruata si ite.”