TAHIUL᷊E 19 - WUKE SUSI WATTI'U AL᷊AL᷊USASSA

Manga soa tatal᷊anganna

¹ “Napawe manga walahanna udde buatte nipaten Mawu Ruatanu wuṛṛu wanuane nionggola si yamiu, wuṛṛu napawe i yamiu buatte nanganu manga soa wuṛṛu manga wal᷊en mangitou wuṛṛu natana'e isudde,

^2-3 leta'a ṛinone tahianni yamiu maola'a tatallu kaddoanna sambau-sambau ringannu sambau soa tatal᷊anganna apan mal᷊uassa pattudanne tadea'u suapan taṛṛa pate wotongnge tumal᷊angnga poiaroddi.

⁴ Amungkangngu sangkatou ringannu tawe nipattudda buatte namate taumata waine apan bal᷊ine seenne, i tou wotongnge tumal᷊angnga suwallatu sambau soa udde wuṛṛu wotongnge sidutu uatatana'a wiakka.

^5-6 Sontone Ere-ere pia ruan katou suadio'a sinumuṛṛi su mahurangnge inai manuwangnga alu. Tantal᷊anna sangkatou mannuwangnga alu, wal᷊iungnga napallosa wuassu pul᷊une wuṛṛu naṛṛino su hawene na'oman sara nate. Ne taumata apan buatte namate ringannu tawe nipattudda udde tawe sal᷊ane wuṛṛu wotongnge tumal᷊angnga suwallatu sambau wuassu tatallu soa tatal᷊anganna udde, tadea'u masal᷊amatta. Unnu wisara tumba'u sambau soa tatal᷊anganna, wuṛṛu asinungka amatanne inai tumaniten marau, wuṛṛu manga tuṛṛangnge apan mappulu mabbal᷊issa pamamate udde wotongnge maaenggennasi tou wuṛṛu sulal᷊ummu asasa'une i tou mamate taumata apan tawe sal᷊ane udde.

⁷ Ana waugu udde i ya'u mamarenta si yamiu tadea'u manadia tatalu soa.

⁸ Napawe Mawu Ruatanu buatte nanggewalla wanuanu ere buatte nipa'ire-Ne su al᷊amonanu, wuṛṛu ahewallu wanua udde buatte nionggola si yamiu,

⁹ i yamiu ṛinone mamile apia tatallu soa tatal᷊anganna. (Wanua udde sarun ionggola si yamiu amungkangngu i yamiu tuttuṛṛutta al᷊awo'u parenta'u si yamiu allo indi, wuṛṛu amungkangngu i yamiu mandangngu Mawu Ruatanu wuṛṛu mabbiakka tumuṛṛutta al᷊arang-Nge.)

¹⁰ Ola'e udde tadea'u i yamiu tawe marosa ana waugu namalan taumata apan tawe sal᷊ane nipate su wanua apan nionggolu Mawu Ruatanu si yamiu.”

¹¹ “Arawe wal᷊ine lai amungkangngu sangkatou nangampanga seenne wuṛṛu ringannu nipattudda wuṛṛu naungnga lal᷊eo namate si tou, ana see tinumal᷊angnga su wallatu sambau soa tatal᷊anganna madea'a piaddu mongontolla.

¹² Sulal᷊ummu olangnge udde manga piaṛṛa'u soane ṛinone taumata udde wagoanna, ana see i tou itantilla su manga tuṛṛangnge apan mappulu mabbal᷊issa pamamate udde, tadea'u i tou wotongnge pateanna.

¹³ Imbaṛṛangnga umakkanni tou. Paal᷊iua'a Israel wuassu pamamate udde, tadea'u i yamiu su lal᷊umanna'a.”

Sasingadda manesse'u passarannu leta'a

¹⁴ “Amungkangngu i yamiu na'omate su wanua apan nionggolu Mawu Ruatanu si yamiu, imbaṛṛangnga manese'u passarannu leta'u al᷊indongannu apan buatte tinantunna ro'en tempo dorone.”

Atoranna su ola'u matatiala

¹⁵ “Tumba'u sangkatou matatiala tawe ipaatta mapal᷊iatta'u sangkatou niansil᷊anna udde nassal᷊a; mattingkatul᷊unga ruan katou pappandumanna su hatto udde.

¹⁶ Amungkangngu sangkatou mappulu mapaasal᷊an taumata waine ringannu aansila awusu su mallaṛṛuungnga, ne

¹⁷ itarua ṛinone inai su tampan pattataṛṛamawuanna apan tinantunnu Mawu, tadea'u parikisannu manga imam, wuṛṛu mallaṛṛuungnga apan mammanara orassa udde.

¹⁸ Manga mallaṛṛuungnga ṛinone manutukka hatto udde ringannu mapia-pia, wuṛṛu amungkangngu niadapatanna taumata udde buatte nangadio'a sansul᷊ungnge taumatan Israel,

¹⁹ i tou ṛinone iṛṛuumanna tumuṛṛutto su pandumma hunan roamme udde. Ringannu aroddi yamiu mangnginsue al᷊al᷊eo udde.

²⁰ Anambon taumata sarun maaringikka olangnge udde wuṛṛu mabbal᷊i mata'utta, na'oman sara tate lai taumata ma'ola'a al᷊al᷊eo udde.

²¹ Arie umakkanna sulal᷊ummu manga hatto ereudde. Ṛuumanne eteudde: Niawa hantiannu niawa, mata hantiannu mata isi hantiannu isi, lima hantiannu lima wuṛṛu ledda hantiannu ledda.”