TAHIUL᷊E 18 - WUKE SUSI WATTI'U AL᷊AL᷊USASSA

Wageangngu manga imam

¹ “Anambon ṛuanganni Lewi nionggol᷊annu manara maola'a imam, ana waugu udde tawe wotongnge manengkamma tahian leta'a su Israel. I mangitou ṛinone mabbiakka wuassu manga aonggola wuṛṛu manga sasamba wal᷊ine apan nionggolu Mawu.

² I mangitou tawe wotongnge manahuanna leta'a ere manga ṛuanganna wal᷊ine, ana waugu ete Mawu apan mangonggolu pussa'a mangitou ere buatte pina'iren Mawu si mangitou.

³ Amungkangngu sangkatou mangonggolu sasamba sapi ara'e domba, ne palangngu monane, ol᷊ane wuṛṛu tiannu winatangnga udde ṛinone ionggola su manga imam maola'a wageangngi mangitou.

⁴ Wuanne paaororone wuassu gandumma, ua'en anggore, lanan zaitun wuṛṛu wambul᷊un domba, udde lai maola'a wageangngi mangitou.

⁵ Wuassu anambon ṛuanganna su Israel, Mawu Ruatanu buatte namile ṛuanganni Lewi maola'a imam saran mal᷊annu-l᷊annu.

⁶ Amungkangngu sangkatou taumatan Lewi apan darantane wuassu al᷊awo'u soa su Israel nirumanta su tampa apan nipilen Mawu wuṛṛu mappulu matana'a isudde,

⁷ i tou wotongnge mangimbe Mawu Ruatane maola'a sangkatou imam ere lai manga taumatan Lewi waine apan mammanara su tampa udde.

⁸ I tou lai ṛinone manengkamma anna apan uasul᷊ungnga anambone ere lai manga imam bal᷊ine, apan niasombanganne wuassu amonanne, udde lai wageangngi tou.”

Manga inolaanna apan isassingadda

⁹ “Amungkangngu i yamiu nasuttate su wanua apan nionggolu Mawu Ruatanu si yamiu, ariewe mattanno al᷊al᷊eo apan a'olaannu manga walahanna isudde.

¹⁰ Suwallati yamiu imbaṛṛangnga piaddu mangonggolu manga anangnge maola'a sasamba itattambunna. Wuṛṛu ariewe lai pia sangkatou apan maola'a taṛṛa si'atta, maddea'a manga tatiala, mappaattu daroa ara'e

¹¹ apanden wal᷊iimmata, ara'e uahahatto manga ṛimuuddu taumata nate.

¹² Taumata apan ma'ola'a inolaanna lal᷊eo udde ia'arantinnu Mawu Ruatanu, wuṛṛu ana waugu udde manga walahanna udde nilimbuaṛṛan-Ne wuassu saruannu.

¹³ Nariaddi ṛinone i yamiu mattaṛṛamawu Mawu Ruatanu ringannu ahewallu lal᷊ummu naungngu.”

Mawu na'ire mandolokku sangkatou nabi

¹⁴ Wua'udde i Musa nabbisara, “Manga walahanna su wanua apan wawanuanni yamiu udde maddaringikka tatantiron taṛṛa si'atta wuṛṛu maddea'a manga tatiala. Arawe Mawu Ruatanu tawe mamalan kamiu ma'ola'a pallal᷊aghu udde.

¹⁵ Ewe'e mawal᷊i'a lai waussu walahanni ite sassane sarun mandolokku sangkatou nabi ere i ya'u indi, wuṛṛu i yamiu ṛinone maddaringikka si tou.

¹⁶ Su tempo i yamiu uaammula su Wowon Sinai, i yamiu sinumal᷊ande tadea'u i yamiu tate lai maddaringikka Mawu Ruatanu mabbisara wuṛṛu tate lai maasilo daranta-Ne sulal᷊ummu putungnga apan lukkenggama, ana waugu i yamiu matta'uttu mate.

¹⁷ Ana waugu Mawu nabbisara si ya'u, ‘Darorongngi mangitou udde mapia.

¹⁸ Wuassu walahanni mangitou sassane i Ya'u sarun mandolokka inai ringanni mangitou sangkatou nabi ere lai i'o. I Ya'u sarun mamasingkatta si tou apa apan ṛinone iwisarane, ana see i tou sarun mamasingkatta su walahanna udde apa apan Ta'u nirolokka.

¹⁹ I tou sarun mabbisara sulal᷊ummu arang-Ku, wuṛṛu i Ya'u sarun makkuumannu taumata apan maddiri maddaringikka si tou.

²⁰ Arawe amungkangngu sangkatou nabi waṛṛani mamasingkattu sambau tanata wuassu arang-Ku sumbal᷊i Ya'u tawe nandolokki tou ma'ola'a aroddi, i tou ṛinone mate; aroddi lai suapan nabi apan mabbisara ringannu arannu manga Mawu waine udde ṛinone mate.’

²¹ Asinungka i yamiu maiwal᷊o sulal᷊ummu naungngu, ‘Ereapa yami masingkata apa tanatan sangkatou nabi udde darantane wuassu Mawu ara'e tawe?’

²² Amungkangngu sangkatou nabi mabbisara ringannu arannu Mawu, arawe wisarane udde tawe nariaddi, ne sasi'atta udde wal᷊ine wuassu Mawu. Nabi udde mabbisara ringannu aranne sassane wuṛṛu i yamiu ariete mata'utti tou.”