TAHIUL᷊E 16 - WUKE SUSI WATTI'U AL᷊AL᷊USASSA

Allo Wahewan Paskah

¹ “Laghua'e Paskah sulal᷊ummu wul᷊anna Abib ipangaddata Mawu Ruatanu, ana waugu sulal᷊ummu wul᷊anna udde, su tempo ṛabbi, i Tou namallossi yamiu wuassu Mesir.

² Roote watukku tampa apan nipilen Mawu inai mamototta suwallatu sambau wuassu ambinga domba ara'e sapinu, maola'a sasamban Paskah ipangaddata Mawu Ruatanu.

³ Sasamban Paskah udde ṛinone landinannu roti tawe ragine. Pitu allo al᷊annune i yamiu ṛinone u'anna roti apan tawe ragine, ere lai su tempo i yamiu nanantangngu leta'u Mesir ringannu uasasaṛṛawutta. Ante roti udde, roti apan isassago roti pattataṛṛanga, tadea'u su al᷊o'engngu pabbiaṛṛannu i yamiu maanaungnga allo su tempo i yamiu nanantangngu Mesir, su tampa i yamiu uatataṛṛanga.

⁴ Al᷊annune pitu allo su ahewallu wanuanu tawe saran sangkatou apan botongnge manahinunna ragi su wal᷊ene. Ṛemessu winatangnga apan nipototta alloarane su paarorone ṛinone inasanna wuṛṛu insueanna ṛabbi udde lai.

^5-6 Winatangnga apan pateanna su Ramea Paskah ṛinone pototanna su tampa apan nipilen Mawu Ruatanu, wuṛṛu tawe wotongnge su tampa waine su ahewallu wanua apan nionggoli Tou si yamiu. Olangnge udde ṛinone olaanni yamiu su tempo matannallo umattuppe, ere lai su tempo i yamiu nanantangngu Mesir.

⁷ Lahate ṛemessa udde wuṛṛu inasse su tampa apan nipilen Mawu Ruatanu, ana see apul᷊ete watukku wal᷊enu tiṛṛabbine marua'allo.

⁸ Al᷊anune annumu allo manansunna, i yamiu ṛinone umanna roti tawe ragine. Su allo appitune i yamiu ṛinone ma'ammula massubba Mawu Ruatanu. Imbaṛṛangnga mammanara su allo udde.”

Andeangngu Pangangitinga

⁹ “Reenga'e pitun kamisa manattaka wuassu allo paarorone i yamiu mangitingnga gandumma,

¹⁰ wua'udde paddameaten Andeangngu Pangangitinga ipangaddata Mawu Ruatanu. Su allo udde apira'e sasamba apulun lal᷊ummu naungngu si Tou, tumuṛṛutu anambone al᷊amatta apan buatte nionggoli Tou si'o.

¹¹ Su saruannu Mawu Ruatanu su tampa apan buatte nipile-Ne, i yamiu ṛinone lulluassa susampunna ringannu manga anangngu, manga allangngu wuṛṛu taumatan Lewi, taumata raho, ana'a asisitimpal᷊ussa wuṛṛu manga inawal᷊uanna apan uatana'a su manga soanu.

¹² Paatuṛṛute anambon parenta-Ne ringannu maṛṛimadda, wuṛṛu arie paabul᷊iane manungku dorone i yamiu allangnga su Mesir.”

Andeangngu Rasannu Rongnga

¹³ “Napawe anambon gandumma buatte niitingnga wuṛṛu anambon wuan anggore buatte nipakka, i yamiu ṛinone maddamean Andeangngu Rasannu Rongnga al᷊annune pitu allo.

¹⁴ Lallala'e suadio'a ringannu manga anangngu, manga allangngu, taumatan Lewi, taumata raho, ana'a asisitimpal᷊ussa, manga wawine wal᷊u apan uatana'a su manga soanu.

¹⁵ Pitu allo al᷊annune i yamiu ṛinone maddamean Andeangnga udde ipangaddata Mawu Ruatanu su tampa apan nipilen Mawu. Lalluasse, ana waugu Mawu Ruatanu buatte nangal᷊amatta inasaharannu wuṛṛu manaranu.

¹⁶ Anambon esakku taumatan Israel rinone rumanta massubba Mawu Ruatanu su tampa apan buatte nipile-Ne paatallu santonna, eteudde su Allo Ramean Paskah, su Andeangngu Pangangitinga wuṛṛu Andeangngu Rasannu Rongnga. Suapan taumata ṛinone mangapiddu sasambane,

¹⁷ tumuṛṛuttu asombange, uasul᷊ungngu anambon wiakka apan nionggolu Mawu Ruatanu si tou.”

Ola'u mappaamattu atatul᷊idda

¹⁸ “Su al᷊awo'u soa apan nionggolu Mawu Ruatanu si yamiu, i yamiu ṛinone mamile manga mallaṛṛuunga wuṛṛu manga mamanarane waine ipakkungngu tumana'u soa ringannu atatul᷊idda.

¹⁹ Sulal᷊ummu makkawessu hatto, i mangitou tawe wotongnge walate apulu mapaasal᷊a ara'e mangempen samba'a. I mangitou lai tawe wotongnge manengkamma roitta, ana waugu roitta udde maawuta taumata, ewe'e lai su taumata pande wuṛṛu matul᷊idda, na'oman sara i mangitou makkawessu hatto tawe su atatul᷊idda.

²⁰ I yamiu ṛinone sidutu su atatul᷊idda, tadea'u wotongnge mamanua wuṛṛu mabbiakka su lal᷊umanna'a su leta'a apan nionggolu Mawu Ruatanu si yamiu.

²¹ Amungkangngu i yamiu ma'ola'a mezbah Mawu Ruatanu, imbaṛṛangnga mangaddon paal᷊uanna sassubbanna wuassu alu hahambaranni Asyera su sambaane,

²² wuṛṛu imbaṛṛangnga mapararisikku diṛṛi ipassubba monganna, ana waugu Mawu Ruatanu maddantinnu pallal᷊agu udde.