TAHIUL᷊E 10 - WUKE SUSI WATTI'U AL᷊AL᷊USASSA

I Musa su aruane nanengkamma Mapul᷊o Titan Duata Ruata

¹ “Wua'udde Mawu nabbisara si ya'u, ‘Musa, pamaangke ruan kul᷊appa watu ere iapa dorone, wuṛṛu pa'ola'e lai sambau wantalla alu maola'a tampane, ana see rantate ringang-Ku su puiddu wowone.

² Su manga watu udde sarun Ta'u iwoṛṛetta manga wisara apan uasul᷊ungnga ere suwatu apan buatte nipesangngu; wua'udde manga watu udde ṛinone sahipunannu sulal᷊ummu wantalla udde.’

³ Ana see i ya'u na'ola'a wantalla wuassu alu akasia wuṛṛu namaangnga darua watu ere dorone wuṛṛu niapidda watukku puiddu wowone.

⁴ Su watu udde Mawu namoṛṛettu mapul᷊o parenta uasul᷊ungngu paarorone, eteudde manga tita apan nionggoli Tou si yamiu, su tempo i Tou nabbisara wuassu pattangngannu putungnga su allo i yamiu na'ammula su wawal᷊annu wowone. Wua'udde Mawu nangonggolu watu niwoṛṛetanna udde si ya'u

⁵ wuṛṛu i ya'u nabelengke sinumossokka wuassu wowone. Ana see ringannu parenta Mawu, watu darua udde nitaṛṛo sulal᷊ummu wantala apan buatte ta'u niola'a – wuṛṛu nanattakka orassa udde naddatingngu orassa indi darua watu niwoṛṛetanna udde ta'e uraddo isudde.” (

⁶ Wua'udde taumatan Israel inaite niumamatta wuassu manga paṛṛihi taumatan Yaakan, wuṛṛu nattuda watukku Mosera. Isudde i Harun nate wuṛṛu nilabbinga. I Eleazar anangnge nallol᷊ossa si tou naola'a imam.

⁷ Wua'isudde i mangitou inaite watukku Gudgod, ana see nasal᷊a watukku Yotbata, wageangngu leta'a apan manambo ua'ene.

⁸ Su wowone udde Mawu naṛṛaen taumatan Lewi iapal᷊u'adda Wantallu Pa'aire wuṛṛu mangimbe Mawu, wuṛṛu mangal᷊amatta ringannu aran-Ne. Eteudde manaran mangitou sara orassa indi.

⁹ Ana waugu udde ṛuanganni Lewi tawe nanengkamma leta'a pussa'a ere manga ṛuanganna wal᷊ine, ana waugu ete Mawu wageangnga pussa'an mangitou, ere buatte niwal᷊on Mawu Ruatanu si mangitou.)

¹⁰ “Appatu pul᷊o su allone wuṛṛu appatu pul᷊o su ṛabbine i ya'u uatana'a su puiddu wowone ere lai ta'u niola'a dorone. Paassa lai Mawu naddaringikka si ya'u, wuṛṛu i tou niumire tadea'u tawe mamate si yamiu.

¹¹ Ana see i ya'u nirolokki Tou inai mamiaṛṛa'i yamiu tadea'u i yamiu wotongnge manahuanna leta'a apan pina'ire-Ne su iupungngu al᷊amonanu.”

Darorongngu Mawu

¹² “Orassa indi manga tuṛṛangnga, paddaringikke apa darorongngu Mawu Ruatanu wuassi yamiu: Pangaddate Mawu Ruatanu wuṛṛu paatuṛṛutte su al᷊awo'u parenta-Ne. Pandangngute si Tou wuṛṛu pattaṛṛamawute si Tou ringannu ahewallu lal᷊ummu naungngu.

¹³ Paatuṛṛute al᷊awo'u parentan Mawu apan allo indi iwabbal᷊oru si yamiu ana wa'augu apapianu sassane.

¹⁴ Mawu Ruatanu uatahuanna langitta atanggaṛṛanne; runia lai tatahuanan-Ne suadio'a ringannu lal᷊oṛṛone.

¹⁵ Arawe darangngun Mawu su al᷊amonanu aroddi ahewalle, na'oman sara wuassu al᷊awo'u walahanne, ete i yamiu apan nipile-Ne, wuṛṛu na'oman sara orassa indi lai yamiu ta'e al᷊aṛṛanang-Nge apan nipile-Ne.

¹⁶ Nariaddi manattakka orassa indi yamiu ṛinone matuṛṛutta su Mawu wuṛṛu puanu tate mangattikka lai.

¹⁷ Mawu Ruatanu roso su wowon al᷊awo'u Mawu wuṛṛu nilumebbe wuassu al᷊awo'u taṛṛino. I Tou Mawu Ruata mawantuga wuṛṛu mataṛṛino apan ṛinone subbanna. I Tou tawe mangempe wuṛṛu tawe lai manengkamma aonggola sasal᷊o'a.

¹⁸ I Tou uasamba'a asisi timpal᷊ussa wuṛṛu inawal᷊uanna tadea'u i mangitou olaanna lai ringannu matul᷊idda; I Tou mandangngu taumata raho apan mabiakka suadio'a ringannu walahanni ite wuṛṛu nangonggolu anna wuṛṛu laubba si mangitou.

¹⁹ Ne i yamiu lai ṛinone mapal᷊iatta'u darangngunu su manga taumata raho udde, ana waugu dorone lai yamiu taumata raho su Mesir.

²⁰ Pangaddata Mawu Ruatanu wuṛṛu tumba'u pattaṛṛamawu si Tou sassane. Ṛinone i yamiu sidutu matuṛṛutta si Tou wuṛṛu massalu ringannu aran-Ne sassane.

²¹ Paddalote si Tou, ana waugu i Tou Mawu Ruatanu. Ringannu mata wuṛṛu puanu sassane i yamiu naasilote manga inolaanna apan bahewalla wuṛṛu ma'ata'utta apan niola'i Tou si yamiu.

²² Su tempo iupungngu al᷊amonanu inaite watukku Mesir, reenganni mangitou tumba'u pitun pul᷊o su atoune. Arawe Mawu Ruatanu buatte na'ola'a reengannu anambone ere anumpitanna su langitta.”