TAHIUL᷊E 1 - WUKE SUSI WATTI'U AL᷊AL᷊USASSA

Panattaṛṛanne

¹ Wuke indi lal᷊oṛṛoannu manga wisara apan niapasingkati Musa su walahannu Israel su tempo i mangitou uatana'a su wadda'a su Wawal᷊annu Yordan. Wawal᷊anne udde addone su samba'an ra'in Sal᷊ukku Yordan, maranin soa Suf, suwallatu soa Paran wuṛṛu su samba'ane, wuṛṛu manga soa Tofel, Laban, Hazerot wuṛṛu Di-Zahab su samba'ane waine. (

² Wuassu Wowon Sinai maddatingngu Kades-Barnea sumabbi wageangngu panenteannu Edom, amatanne mapul᷊o assa su allone al᷊annune.)

³ Su allo paarorone wul᷊anna mappul᷊o assane sulal᷊ummu tonna aiappatu pul᷊one napawe i mangitou buatte nanantangngu Mesir, i Musa namasingkatta su walahanne udde sarangkanambone apan nirolokku Mawu iapawal᷊o si mangitou.

⁴ Udde nariaddi napawe i Musa mamaddon Sihon, ratun taumatan Amori, apan uaparenta su soa Hesybon, wuṛṛu Og, ratun Basan, apan uaparenta su manga soa Asytarot wuṛṛu Edrei.

⁵ Nariaddi, su samba'an ra'in Yordan su wageangngu leta'u Moab, i Musa su paarorone nanal᷊a'a manga tita wuṛṛu manga parentan Mawu. Unni Musa,

⁶ “Su tempo i ite su Wowon Sinai, Mawu Ruatan kite nabbisara, ‘i yamiu mal᷊annute uatana'a su wowone indi.

⁷ Orassa indi hohaṛṛa'e paddasanannu wuṛṛu roote watukku wageangngu panenteannu taumatan Amori wuṛṛu su ahewallu wageangngu leta'a maranine, eteudde Wawal᷊annu Yordan, wageangngu wuidda wuṛṛu leta'a ratakke, wageangngu leta'a su samba'an timukka wuṛṛu su apannu Tahal᷊oangngu Tangngane. Inaite pamanua su leta'u Kanaan wuṛṛu Panenteannu Libanon maddatingngu sal᷊ukka wahewalla Efrat.

⁸ I Ya'u, Mawu, buatte naddiandin ahewallu leta'a udde su al᷊amonanu i Abraham, i Ishak wuṛṛu i Yakub see lai papapulunni mangitou. Nariaddi roote pamanua su leta'a udde.’ ”

I Musa napatentegu manga mallaṛṛuungnga

⁹ I Musa nabbisara su walahanna udde, “Su tempo i ite uatana'a su Wowon Sinai, i ya'u nabbisara si yamiu; Manara ipamiaṛṛa'i yamiu tumaniten mawakkatta si ya'u. I ya'u tawe maapamanara sassane, ana waugu

¹⁰ Mawu Ruatanu buatte na'ola'a reengannu a'atambana anambone ere anumpitanna su langitta.

¹¹ Antimanna Mawu, Ruatan iupungngu al᷊amonanu sidutu mannamba anambonu ma'oman sara paasaṛṛiwu lappuanna anambone, wuṛṛu ma'ola'a si yamiu walahanna apan ala ere lai buatte nipa'ire-Ne!

¹² Arawe ereapa wotongnge i ya'u sassane mamasanna manara apan mawakkata su ipanginsue anambon hattonu?

¹³ Pamilete wuassu apan ruanganna manga pira esakka apan pande, piate asingkatta su manara wuṛṛu pia pasasunna, tadea'u i ya'u mapatenegi mangitou iapapiaṛṛa'a si yamiu.

¹⁴ Darorongnga udde ṛinone sengkamanni yamiu ringannu mapia.

¹⁵ Ana waugu udde suwallatu manga piaṛṛa'anga apan nipilen kamiu, manga piran katou apan pande, pia asingkatta su manara, ta'u anuanna wuṛṛu ta'u itenega maola'a tembonanni yamiu. Siri pira olaanna piaṛṛa'u saṛṛiwu su atoune, wuṛṛu ingana'a waine maṛṛasutta su atoune, su liman pul᷊o su atoune, wuṛṛu su mapul᷊o su atoune. I ya'u lai mapatenegu manga piaṛṛangnge waine iapal᷊u'adda manga ṛuangannu.

¹⁶ Su tempo udde i ya'u nangatokki mangitou arendi: Paatutuṛṛe manga pabbawawul᷊o apan lumapputa suwallatu walahannu. Onggol᷊eten laṛṛawessa apan matul᷊idda, mawae sulal᷊ummu hatto ringannu taumata sambalahannu ara'e ringannu taumata raho apan uatana'a suwallati yamiu.

¹⁷ Makkawessa arie mangempen samba'a; suapan taumata ṛinone parikisanni yamiu ringannu olangnge apan uasul᷊ungnga, ringannu tawe mamile taumata udde. Arie pa'ata'utta su saruanni sai-sai, ana waugu laṛṛawessa apan niola'i yamiu udde darantane wuassu Ruata. Amungkangngu sambau hatto tumaniten masahadda si'o, apira'e ringang-Ku, tadea'u i ya'u wotongnge makkawessa.

¹⁸ Su tempo udde lai ya'u mangonggolu manga tatantiro si yamiu su ola'u manga manara wal᷊ine apan ṛinone olaanni yamiu.”

Matataṛṛaso'o nirolokka wuassu Kades-Barnea

¹⁹ “Ana see uasul᷊ungngu parentan Mawu Ruatan kite, i ite manantangngu Wowon Sinai wuṛṛu umamatta sumabbi wadda'a apan mal᷊alangnga wuṛṛu masahadda mattuddan wageangngu panenteannu taumatan Amori. Su tempo i ite na'omate su Kades-Barnea,

^20-21 i ya'u nabbisara: Orassa indi yamiu na'omate su wageangngu panenteannu taumatan Amori, leta'a apan nionggolu Mawu Ruatan kite wuṛṛu Ruata iupungngu al᷊amonan kite. Pa'ellega, su saruannu uawannadda leta'a udde. Roote pamanua ere buatte nirolokku Mawu. Imbaṛṛangnga mapapaddua ara'e mata'utta.

²² Arawe i yamiu nirumanta ringangku wuṛṛu nabbisara, ‘Mappianne i ite mandolokku siri pira taumata iapal᷊iu ṛoro si ite iapaparikissa wanua udde, tadea'u i mangitou mamasingkatta si ite lal᷊anna suapa apan ṛinone amatanni ite wuṛṛu ereapa manga soa apan rantanni ite.’

²³ Darorongnga udde nitarimma'u, ana waugu udde i ya'u mamile siri mapul᷊o dua sangkatou wuassu sambau ṛuanganna.

²⁴ I mangitou niumamatta su wageangngu panenteanna udde araune ere su Wawal᷊annu Eskol, ana see namal᷊intaddu leta'a udde.

²⁵ Wua'udde i mangitou nabelengnga ringanni ite nangapiddu manga wuan aaluanna apan niasombanganni mangitou poiaroddi wuṛṛu mabbal᷊o manungku wanua apan ionggolu Mawu Ruatan kite udde tumaniten masuwukka.

²⁶ Arawe i yamiu nilumawangnga parentan Mawu Ruatanu wuṛṛu maddiri sumutta su wanua udde.

²⁷ I yamiu sussamboṛṛe arendi, ‘Mawu maddantinni ite. Ne i Tou nangapiddi ite sinumabbangnga wuassu Mesir tadea'u manantilli ite sulal᷊ummu liman taumatan Amori tadea'u i mangitou mamate si ite.

²⁸ Nariaddi, ipa'ura i ite mai poiaroddi? Manga taumata apan nirolokki ite poiaroddi ewe'e naata'utta si ite ringannu nabbal᷊o manungku walahanna udde mattohasanna wuṛṛu mabbaṛṛanianna wuassi ite, wuṛṛu manungku i mangitou uatana'a su manga soa pia darandungnge atanggakke sara langitta. I mangitou naasilo wawalla poiaroddi!’

²⁹ Arawe i ya'u nabbisara: Imbaṛṛangnga mata'uttu manga taumata udde.

³⁰ Mawu Ruatanu sarun mamiaṛṛa'i yamiu wuṛṛu mangehetta si yamiu ere lai buatte niapendamanni yamiu sassane su Mesir,

³¹ wuṛṛu su wadda'a. I yamiu naasilo ereapa Mawu Ruatanu nangapiddi yamiu ringannu sal᷊amatta su al᷊o'engngu amatanna udde naddatingngu tampa indi, tawe paddaṛṛalanne naal᷊ihidda sangkatou iamangnga uasal᷊uru anangnge.

³² Arawe salaiwe i ya'u buatte nabbisara aroddi, yamiu lai taambe mangimanna Mawu Ruatanu,

³³ apan u'amatta su saruannu maddea'a tampan paddasananni yamiu. I Tou mammantingiddu lal᷊anna si yamiu su tempo ṛabbi sulal᷊ummu pal᷊iaṛṛannu putungnga wuṛṛu su tempo allo sulal᷊ummu pal᷊iaṛṛannu winabbawa.”

Mawu nakkuumannu Israel

³⁴ “Mawu naaringikka sasal᷊iomannu ana see nabbal᷊i nasa'u. I Tou nassalu,

³⁵ ‘Tawe saran sangkatou wuassu ammul᷊annu taumata indi apan maasutta su wanua masuwukka apan Ta'u pina'ire su iupungngu al᷊amonanu.

³⁶ Tumba'u i Kaleb, ana'i Yefune sarun maasutta, ana waugu i tou sidutu matuṛṛutta si Ya'u. Si Kaleb wuṛṛu papapulunne sarun Ta'u onggol᷊annu wanua apan buatte niamatanne udde.’

³⁷ I yamiu lai naaola'a Mawu nasa'u si ya'u wuṛṛu nabbisara, ‘Musa, i'o lai sarun tawe maasutta su wanua udde.

³⁸ Arawe paatana'a naungngu masasumbalanu, i Yosua ana'i Nun. Ete i tou apan sarun mamiaṛṛa'u Israel mangaṛṛo leta'a udde.’

³⁹ Ana see Mawu nabbisara si ite sarangkanambone, ‘Manga anangngu ta'e maradio'a wagga mapaddaṛṛalan suapa mapia wuṛṛu suapa lal᷊eo, al᷊aṛṛana'a apan tumuṛṛuttu wisaranu sarun sametannu manga seennu, ete si mangitou Ta'u ionggola leta'a udde, wuṛṛu i mangitou sarun matana'a su leta'a udde.

⁴⁰ Arawe i yamiu, pabelengke watukku wadda'a sumabbi lal᷊anna mattudan Eṛṛesannu Akaba.’

⁴¹ I yamiu sinumimbakka, ‘Musa, yami buatte na'ola'a rosa su saruannu Mawu. Arawe orassa indi yami ma'apulu inai mapapangalo ere buatte nirolokku Mawu Ruatan kite.’ Ana see sangkatou-sangkatou suwallati yamiu nandiahite inai mapapangalo, ringannu antimma manungku ringannu mamangalo wageangngu leta'u panenteanna udde manara maṛṛanna.

⁴² Arawe Mawu nabbisara si ya'u, ‘Arie iwalanu i mangitou mapapangalo, ana waugu i ya'u tawe rumandinganna si mangitou, wuṛṛu i mangitou sarun iawaddon seetti mangitou.’

⁴³ I ya'u mamasingkatta si yamiu wisaran Mawu, arawe i yamiu maddiri maddaringikka. I yamiu mannal᷊are parentan Mawu, wuṛṛu ringannu mawunga inai watukku wageangngu leta'u penenteanna udde.

⁴⁴ Ana see manga taumatan Amori apan uatana'a su wageangngu leta'u panenteanna udde sinumabbangnga nandoappa si yamiu. I mangitou tumaniten manambo, naal᷊ihidda ammul᷊annu attimpua. I mangitou nangenggenna si yamiu araune sara Horma, ana see namaddon kamiu su wageangngu leta'u panenteannu Edom.

⁴⁵ Wua'udde i yamiu nabelengnga wuṛṛu sinumal᷊ande su Mawu maiontolla, arawe i Tou maddiri maddaringikka ara'e ma'ellega si yamiu.”

Manga tonna su wadda'a

⁴⁶ “Wua'udde i ite natana'e su Kades tumaniten mal᷊annu.