SONDAPPA 5 - WUKE SUSI WATTI'U AL᷊AL᷊USASSA

Lul᷊unnu wuke wuṛṛu Ana'u Domba

¹ Wua'udde i ya'u naasilo sambau lul᷊unnu wuke su liman i Tou apan ua'ianna su adderan araratuanna udde. Wuke udde napenem woṛṛetta su ruam baane wuṛṛu nireetannu pitum bau segele.

² See i ya'u naasilo sangkatou mala'ekatta apan matohassa u'al᷊iata ringannu tingikka apan ma'ikkatta. “Isai wotongnge mamesangnga manga segele indi wuṛṛu mamu'a wuke indi?”

³ Arawe mapia ete su surga ara'e su runia, ara'e su wantan runia tawe niasombanganna saran sangkatou apan wotongnge maawu'a wuke udde, wuṛṛu ma'ellega lal᷊umme.

⁴ Ne i ya'u nilumuai atonna-tonna ana waugu tawe saran sangkatou apan wotongnge maawu'a wuke udde, wuṛṛu ma'ellega lal᷊umme.

⁵ See sangkatou wuassu manga piaṛṛange udde nabbisara si ya'u, “Arie palluai! Pa'ellege! Singa wuassu walahannu Yehuda, papapulunni Daud apan wahewalla, suete naauntunga! I tou wotongnge mamesangnga pitu segele udde wuṛṛu mamu'a wuke udde.”

⁶ Wua'udde i ya'u naasilo sambau Ana'u Domba apan uarisikka supattangngannu adderan araratuanna udde, papal᷊iwutannu sire appata riadianna wuṛṛu anambon piaṛṛange. Ana'u Domba udde aellehanna naal᷊ihida ere suete nipototta. I tou pia pitu tatandu'a wuṛṛu pitu mata; eteudde pitu Ghaṛṛahon Ruata apan suete nirolokka su ahewallu runia.

⁷ Wua'udde Ana'u Domba udde inumamatta wuṛṛu nanganu lul᷊unnu wuke udde wuassu lima uanannu taumata apan ua'ianna su adderan araratuanna udde.

⁸ Tantal᷊anna Ana'u Domba udde ma'ola'a aroddi, inumaruutta sire appata riadianna udde wuṛṛu sire ruam pul᷊o appata piaṛṛange udde su saruan-Ne. I mangitou sangkatou-sangkatou uaaggasa kecapi wuṛṛu mangko wul᷊awanna lal᷊oṛṛoannu amania, eteudde manga aal᷊iomannu walahannu Ruata.

⁹ I mangitou mangngantarin sambau antari apan bakku: “I'o wotongnge manganu wuke udde wuṛṛu mamesangnga manga segelene. Ana waugu I'o suete nipate, wuṛṛu ringannu papate-Nu, taumata wuassu al᷊awo'u ṛuanganna wahasa, araratuanna, wuṛṛu walahanna suete niwallian-Nu hunane su Ruata.

¹⁰ I'o suete nandiaddi si mangitou sambau walahannu manga imam sassane, tadea'u i mangitou mangimbe Ruatang kite, wuṛṛu mamarenta su wowon runia.”

¹¹ Wua'udde i ya'u naasilo lai. I ya'u naaringikka tingikku mala'ekatta su ṛiwune wuṛṛu su jutane anambone. I mangitou uarisikka uapal᷊iwutta adderan araratuanna wuṛṛu sire appata riadianna see manga piaṛṛange udde,

¹² Wuṛṛu i mangitou mangngantari ringannu tingikka apan ma'ikkatta, “Ana'u Domba apan suete nipototta udde, ṛinone manengkama taṛṛino, pa'a'ala, apande wuṛṛu atattohassa; I Tou ṛinone addatanna, wantuhanna wuṛṛu raddaloanna!”

¹³ See i ya'u naaringikka al᷊awo'u riadianna su langitta, su runia, su wantan runia wuṛṛu sulal᷊ummu tahal᷊oangnga – aunne al᷊awo'u riadianna su ul᷊ilim pati'uppa indi – mangngantari, “I Tou apan ua'ianna su adderan araratuanna, wuṛṛu Sangkatou Ana'u Domba udde, mangke raddaloanna wuṛṛu a'addatanna see awantuhanne wuṛṛu uataṛṛino saran mal᷊annu-l᷊annu!”

¹⁴ Ne sire appata riadianna udde sinumimbakka, “Amin!” Wuṛṛu manga piaṛṛa'a udde inumaruuta wuṛṛu nassubba.