SONDAPPA 22 - WUKE SUSI WATTI'U AL᷊AL᷊USASSA

¹ Mala'ekatta udde namantingida si ya'u sal᷊ukka apan ua'ene mangngonggolu wiakka. Sal᷊ukka udde sussal᷊endapa naal᷊ihidda kristal wuṛṛu mangngelekka wuassu adderan araratuannu Ruata wuṛṛu Ana'u Domba udde,

² su pattangngannu lal᷊anna su soa udde. Su winggin sal᷊ukka udde, su ruam baane pia alu punnu wiakka, apan mabbua paapul᷊o dua santonna, eteudde paassa sambul᷊anna. Rongngane ipappaatta ipangngundama manga walahanna.

³ Sulal᷊ummu soa udde tawe saran sambau sarannapa apan niaṛṛinoannu wontogu Ruata. Adderan araratuannu Ruata wuṛṛu Ana'u Domba udde sarun iaddo sulal᷊ummu soa udde. Manga allang-Nge sarun mattaṛṛamawu si Tou,

⁴ wuṛṛu ma'ellega hati-Ne. Aran-Ne sarun iwoṛṛeta su pakkani mangitou.

⁵ I mangitou tate mappandumma sol᷊o ara'e semakku matannallo, ana waugu tate ṛabbi lai, wuṛṛu Mawu Ruata sassane sarun manemakka si mangitou. Ne i mangitou sarun mamarenta ere sangkatou ratu saran mal᷊annu-l᷊annu.

Daranta Mawu Yesus

⁶ See mala'ekatta udde nabbisara si ya'u, “Manga wisara indi atonna wuṛṛu wotongnge apangimananna. Mawu Ruata apan nangonggolu Ghaṛṛaho-Ne su manga nabi, suete nandolokku malaekan-Ne mamantingida su manga allang-Nge apa apan sarun mal᷊ihakke mariaddi.”

⁷ “Panutukke indi!” wisara Mawu Yesus, “I Ya'u sarun mal᷊ihakka rumanta. Lal᷊umanna'a su taumata apan tuttuṛṛuta manga ṛengetanna sulal᷊ummu wuke indi!”

⁸ I ya'u Yohanes, suete naaringikka wuṛṛu naasilo sarangkanambone indi. Napawe i ya'u suete naaringikka wuṛṛu naasilo udde, i ya'u inumaruutta su saruannu mala'ekatta apan suete namantingiddu sarangkanambone udde si ya'u, wuṛṛu i ya'u ṛinone massubba si tou,

⁹ arawe i tou nabbisara si ya'u, “Arie! Arie massubba si ya'u! Passubate Ruata! Ana waugu i ya'u lai allangnga ere i'o, wuṛṛu ere manga tuṛṛangnga manga nabi wuṛṛu anambon taumata apan tuttuṛṛuta manga tanata sulal᷊ummu wuke indi!”

¹⁰ See i ya'u nabbisara apia, “Imbaṛṛanga mangadappingu manga papatta sulal᷊ummu wuke indi, ana waugu tempone maranite sarangkanambone indi sarun mariaddi.

¹¹ Taumata apan dal᷊eo, sidutu ma'ola'a al᷊al᷊eo; taumata ia'arantina wala'e i tou mapaarantinu watanganne; taumata apan tuttuṛṛuta apulun Ruata, wala'e sidutu i tou tuttuṛṛuta apulun Ruata, wuṛṛu taumata apan mabbiakka tumba'u hunane su Ruata sassane, wala'e sidutu mabbiakka hunane su Ruata sassane.”

¹² “Panutukke indi” wisara Mawu Yesus, “Tate mal᷊annu lai I ya'u sarun rumanta ringannu uaapiddu lal᷊antakke ipabbal᷊issa al᷊awo'u taumata tumuṛṛuttu inolaannu sambau-sambau.

¹³ Ete i Ya'u apan paarorone wuṛṛu pangudusanne; Ete i Ya'u Mawu apan Panattaṛṛanne ma'oman sara Panginsueanne.”

¹⁴ Lal᷊umanna'a su taumata apan nabbansala jubahne na'oman sara nawaresi, ana waugu i mangitou wotongnge umanna wuassu alum pabbawiakka wuṛṛu sumutta sulal᷊ummu soa udde sumabbi ngarane.

¹⁵ Arawe manga taumata apan ma'ola'a pallal᷊agu lal᷊eo, taṛṛa wal᷊i'i mata, manga taumata sussandaga, taṛṛa pate, masasubba paal᷊uanna, wuṛṛu manga taumata taṛṛa wahia, mapia ringannu wisara ara'e lai ringannu pallal᷊agu, anambon taumata udde tampane su liuddu soa udde.

¹⁶ “I Ya'u, Mawu Yesus, suete nandolokku malaeka-U si yamiu tadea'u i tou mamasingkatu manga olangnge indi su manga jamaatta. I Ya'u indi papapulunni Daud; ete i Ya'u aṛṛusuallo apan masemakka udde.”

¹⁷ Ghaṛṛahon Ruata wuṛṛu Ma'a'awingnga Wawine nabbisara, “Wette!” Suapan taumata apan naaringikka indi ṛinone lai mabbisara, “Wette!” Isai apan marou, ṛinone i tou rumanta! Wuṛṛu isai apan maapulu, ṛinone i tou manganu ua'e apan mangonggolu wiakka udde ringannu tawe bawaekke.

Pangudusanne

¹⁸ Su al᷊awo'u taumata apan naaringikka manga wisara papatta sulal᷊ummu wuke indi, ya'u, Yohanes, mangonggolu pananaunganna indi: amungkangu pia taumata manamba manga wisara su papatta indi, ne Ruata sarun manamba lai ṛuumannu taumata udde ringannu manga asasusa apan niwoṛṛeta sulal᷊ummu wuke indi.

¹⁹ Wuṛṛu amungkangu taumata nanggaingnga salaiwe sampaddi wuassu manga wisaran papatta indi, ne Ruata lai sarun manggaingnga wageangnge apan niwoṛṛeta sulal᷊ummu wuke indi – eteudde wageangnge wuassu punnu wiakka wuṛṛu wuassu soa susi udde.

²⁰ I Tou apan namasingkatu anambon watti'a indi nabbisara, “Atonna, i Ya'u mal᷊ihakke rumanta!” Amin! Rantate, o Mawu Yesus!

²¹ Sal᷊andeanna Mawu Yesus sarun mangonggolu al᷊aman-Ne su anambon al᷊aṛṛana'u Ruata!