SONDAPPA 21 - WUKE SUSI WATTI'U AL᷊AL᷊USASSA

Langitta wakku wuṛṛu runia wakku

¹ See i ya'u naasilo langitta apan bakku wuṛṛu runia wakku. Langitta paarorone wuṛṛu runia paarorone nawul᷊ite, wuṛṛu tahal᷊oangnga lai nawul᷊i.

² Ne i ya'u naasilo soa susi udde, eteudde Yerusalem wakku, nonto'a wuassu surga wuassu Ruata. Soa udde suete nissaddia ere sangkatou ma'a'awingnga wawine nipeddetanna iapasasomba ma'a'awingnga esakka.

³ See i ya'u naaringikka wuassu adderan araratuanna udde mabbisara ma'ikkatta, “Orassa indi tampa atatanaannu Ruata suadio'a ringannu taumata! I Tou sarun mabbiakka suadio'a ringanni mangitou, wuṛṛu i mangitou sarun maola'a al᷊aṛṛanang-Nge. Ruata sassane sarun matana'a ringanni mangitou wuṛṛu maola'a Ruata mangitou.

⁴ I tou sarun mamappasa alawo'u allo mata wuassu mata mangitou. Papate sarun tate lai, asasusa, lal᷊uai, ara'e al᷊aṛṛusa'itta tate lai. Manga inolaanna tabbe nawul᷊ite!”

⁵ See i Tou apan ua'ianna su adderan araratuanna udde nabbisara, “Orassa indi sarangkanambone Ta'u olaanna wakku!” I Tou nabbisara lai si ya'u, “Woṛṛetta'a indi, ana waugu manga wisara indi atonna, wuṛṛu wotongnge apangimananna.”

⁶ See i Tou nabbisara, “Nasuete! Ete i Ya'u paarorone wuṛṛu pangudusanne; ete i Ya'u Mawu apan wuassu Panattaṛṛanne ma'omam Panginsueanne. Suapan taumata marou, Ta'u iapa'inumma ringannu tawe bawaekke, wuassu al᷊imatan ua'e apan mangngonggolu wiakka.

⁷ Manga taumata apan naauntunga sarun manengkama manga wawal᷊issu inolaanne udde wuassia-U. I Ya'u sarun maola'a Ruatane, wuṛṛu i tou sarun maola'a ana-U.

⁸ Arawe taumata matal᷊o, taumata mandalal᷊eo, taumata mawunga, taṛṛa pate, taumata masandaga, taumata apan mappaattu wal᷊i'i mata, massubba paal᷊uanna, wuṛṛu taṛṛa wahia, sarun iramme sulal᷊ummu tahal᷊oangngu putungnga wuṛṛu belerangnga apan lukkenggama, eteudde papate aruane.”

Yerusalem wakku

⁹ Sangkatou wuassu wallatu sire pitu mala'ekatta apan suete nangagassa manga cawanna napenem pitu asasusa panginsueanne udde nirumanta ringangku wuṛṛu nabbisara, “Wette! I Ya'u sarun mamamtingiddu Ma'a'awingnga si'o eteudde awingngu Ana'u Domba.”

¹⁰ Ne Ghaṛṛahon Ruata nangintaṛṛo si ya'u, wuṛṛu mala'ekatta udde nangapi'u watukku wowone apan tumaniten matanggaka. I tou namantingiddu Yerusalem si ya'u, soa susi udde, soa udde nonto'a wuassu surga, wuassu Ruata,

¹¹ ringannu araṛṛamaga wuṛṛu awawantugu Ruata. Soa udde sussal᷊endapa naal᷊ihidda watu permata, naal᷊ihidda watu baiduri pandan apan matilangnga naal᷊ihidda kristal.

¹² Darandunge uapal᷊iwutta matanggaka wahewalla, ringannu ngarane mapul᷊o dua, wuṛṛu rariagannu sire mapul᷊o dua mala'ekatta. Suapan ngarane uawoṛṛetta manga arannu mapul᷊o dua walahannu Israel.

¹³ Pia tatallu ngara apan uasaruanna suapan punnu anginna: tatallu su samba'an ra'i, tatallu su samba'an timukka, tatallu su samba'an sawannaka, wuṛṛu tatallu su samba'an waṛṛata.

¹⁴ Darandungu soa udde niapararisikka su wowo mapul᷊o dua watu rapappake. Su manga watu rapappake udde uawoṛṛetta manga arannu sire mapul᷊o dua rasullu Ana'u Domba udde.

¹⁵ Mala'ekatta apan uahahatto'u udde pia tatumma'inna auukka wuassu wul᷊awanna, ipanguukka soa udde, manga ngarane wuṛṛu darandunge.

¹⁶ Soa udde uataṛṛa wu'u appata – al᷊o'engnge nassul᷊ungngu al᷊alakke. Ne mala'ekatta udde nanguukka soa udde ringannu tatumma'ina auukke; inauranna al᷊o'engnge 2400 kilo metere; al᷊alakke wuṛṛu atanggake nassul᷊ungngu alo'engnge.

¹⁷ Su tempo mala'ekatta udde nanguukka darandunge, inauranna atanggaku darandunge udde annumu pul᷊o su meteṛṛene. Uuṛṛana apan nipaattu mala'ekatta udde eteudde uuṛṛana apan ipappaattu taumata lai.

¹⁸ Darandungu soa udde niola'a wuassu watu baiduri pandan, arawe soane sassane wuassu wul᷊awanna tutune, matilangnga naal᷊ihidda kaca.

¹⁹ Manga watu rapappaku soa udde niloggaku al᷊awo'u watu permata. Watu rapappake apan paarorone niola'a wuassu watu baiduri pandan, aruane wuassu watu nilam, atallune wuassu watu yakut, aiappane wuassu watu zamrud,

²⁰ al᷊imane wuassu watu baiduri sepah, aiannume wuassu watu delima, appitune wuassu watu ratna cempaka, aual᷊une wuassu watu pirus, assione wuassu watu topas, appul᷊one wuassu watu krisopras, appul᷊one assa wuassu watu lazuardi, wuṛṛu appul᷊one dua wuassu watu kecubung.

²¹ Mapul᷊o dua ngarane niola'a wuassu mapul᷊o dua mutiara, sambau-sambau niola'a wuassu sambau mutiara. Lal᷊anna su soa udde niola'a wuassu wul᷊awanna tutune, matilangnga naal᷊ihidda kaca apan sussal᷊endapa.

²² I ya'u tawe naasilo Wal᷊en Ruata su soa udde, ana waugu Wal᷊en Ruatane eteudde Mawu sassane, Ruata Lembon Taṛṛino, wuṛṛu Ana'u Domba udde.

²³ Soa udde tate mappandumma semakku matannallo ara'e semakku wul᷊anna, ana waugu awawantugu Ruata mananemakke, wuṛṛu eteudde Ana'u Domba sol᷊one.

²⁴ Manga walahanna su runia sarun umamatta sulal᷊ummu asasemakke, wuṛṛu manga ratu lai sarun mangapiddu pa'a'ala mangitou watukku soa udde.

²⁵ Manga ngaran soa udde wawu'anna miallo-miallo; tawe iṛṛuuda, ana waugu isudde tawe ṛabbine.

²⁶ Awawantuga wuṛṛu paa'ala manga walahanna sarun iapidda watukku lal᷊ummu soa udde.

²⁷ Arawe taumata apan inolaanne ma'arantina, ara'e taumata taṛṛa wahia – aunne al᷊awo'u alal᷊eo, tawe maasutta sulal᷊umme. Apan botongnge maasutta tumba'u taumata apan aranne uawoṛṛetta sulal᷊ummu Wuken Taumata Wiakka, Wuken Ana'u Domba udde.