SONDAPPA 20 - WUKE SUSI WATTI'U AL᷊AL᷊USASSA

Su ola'u tempo saṛṛiwu su tonnane

¹ Napawe wua'udde i ya'u naasilo sangkatou mala'ekatta sinumossoka wuassu surga. Su limane uaaggasa a'unsin rampisu papate wuṛṛu sambau ṛaṛṛapussa apan masallaka.

² See i tou nanametta naga udde, atoanna timmade, – eteudde Setanna ara'e Ghaṛṛaho Lal᷊eo udde – wuṛṛu niṛṛapussa saṛṛiwu su tonanne al᷊annune.

³ Wua'udde mala'ekatta udde nandammen naga udde watukku rampisu papate, see nangunsin rampisa udde, wuṛṛu nisegele tadea'u naga udde tate lai maapangawusu manga walahanna tantal᷊anna tempo saṛṛiwu su tonnane udde taambe nasue. Wua'udde i tou ṛinone ipallosa sulal᷊ummu tempo apan mal᷊ihakka.

⁴ See i ya'u naasilo manga adderan araratuanna, wuṛṛu manga taumata apan ua'ianna su manga adderan araratuanna udde inonggol᷊annu taṛṛino ipangema'u ṛuumanna. I ya'u lai naasilo manga ṛimuuddu taumata apan suete niponggo'a puane ana waugu i mangitou mattiala su ola'u Mawu Yesus, wuṛṛu mammasingkatu tanata Ruata. Manga taumata udde tawe massubba winatangnga, ara'e lai paal᷊uanne. I mangitou lai tawe saran paassa nanengkama tatiala manga winatangnga udde su pakkana ara'e su lima mangitou. Ne i mangitou nabbiakka apia wuṛṛu namarenta ere sangkatou ratu suadio'a ringanni Kristus saṛṛiwu su tonnane al᷊annune.

⁵ Ete indi panattaṛṛannu taumata nate niapaawiakka apia. (Arawe manga taumata nate waine tawe niapaawiakka apia sulal᷊ummu saṛṛiwu su tonnane udde.)

⁶ Lal᷊umanna'a su manga taumata apan niapaawangunna apia su panattaṛṛanne udde. I mangitou wotongnge maola'a pussa'an Ruata. Papate aruane tawe maataṛṛino si mangitou. I mangitou sarun maola'a manga imammu Ruata wuṛṛu manga imammi Kristus; wuṛṛu i mangitou sarun mamarenta suadio'a ringanni Tou saṛṛiwu su tonnane al᷊annune.

Setanna niapaarugi

⁷ Napawe nasuete tempon saṛṛiwu su tonnane udde, Setanna sarun ipallosa wuassu tattupanne,

⁸ wuṛṛu i tou sarun inai mangawusu walahanna apan uasal᷊iawukka su ahewallu runia, eteudde Gog wuṛṛu Magog. Setanna nangammuli mangitou inai mapapangalo, sambau ammul᷊anna apan wahewalla atonna, ere anne su tahal᷊oangnga.

⁹ Ne i mangitou nassal᷊iawukke su ahewallu runia, see nattalliwunte atatana'annu al᷊aṛṛana'u Ruata wuṛṛu soa arangnguannu Ruata. Arawe putungnga nonto'a wuassu langitta wuṛṛu namate si mangitou.

¹⁰ See Setanna apan nangawusu si mangitou udde, tinuntunga sulal᷊ummu tahal᷊oangngu putungnga wuṛṛu belerangnga. Ete isudde tampane winatangnga wuṛṛu nabi awusu udde niramme paarorone. I mangitou sarun sansaranna allo ṛabbi saran mal᷊annu-l᷊annu.

Ṛuumanna panginsueanne

¹¹ Napawe wua'udde i ya'u naasilo sambau adderan araratuanna mawira apan bahewalla wuṛṛu i Tou apan ua'ianna su wowone. Langitta wuṛṛu runia nawul᷊i wuassu saruan-Ne na'oman sara tate lai iasilo.

¹² Wuṛṛu i ya'u naasilo manga taumata nate, timmade dario'a, uarisikka su saruannu adderan araratuanna udde. Ne manga wuke niwu'ate. See sambau wuke apan baine niwu'ate, eteudde Wuken Taumata Wiakka. Wua'udde ṛuumanna niema'a su taumata nate, uasul᷊ungngu pallal᷊agune tumuṛṛuttu apan uawoṛṛetta sulal᷊ummu manga wuke udde.

¹³ See tahal᷊oangnga nanantillu manga taumata nate sulal᷊umme. Papate wuṛṛu Runiam Papate lai nanantillu manga taumata nate sulal᷊ummi tou. Wuṛṛu manga taumata nate sarangkanambone udde niṛṛuumanna uasul᷊ungngu pallal᷊agu mangitou.

¹⁴ Wua'udde Papate wuṛṛu Runiam Papate tinuntunga sulal᷊ummu tahal᷊oangngu putungnga. (Tahal᷊oangngu putungnga indi eteudde papate aruane.)

¹⁵ Manga taumata apan aranne tawe uawoṛṛetta sulal᷊ummu Wuken Taumata Wiakka, iramme sulal᷊ummu tahal᷊oangngu putungnga.