SONDAPPA 19 - WUKE SUSI WATTI'U AL᷊AL᷊USASSA

¹ Napawe wua'udde i ya'u naaringikka sambau naal᷊ihidda tingikku taumata nambo wuassu surga apan u'ui, “Paddalote Ruata! Ruatang kite eteudde Ruata apan mannal᷊amatta; i Tou Ruata awantuhanne wuṛṛu mataṛṛino!

² Pallaṛṛuung-Nge matul᷊idda wuṛṛu masiṛṛonga! I Tou suete naṛṛuumannu sumasandaga apan wahewalla, apan nandal᷊eo runia ringannu sasandage. Ruata suete naṛṛuumannu sumasandaga udde, ana waugu ete i tou namate manga allangngu Ruata.”

³ See tingikku taumata nambo udde niumui apia, “Paddalote Ruata! Timbulu putungnga apan nangepoddu soa wahewalla udde sarun tumimbula sarangkal᷊o'engnge!”

⁴ Ne sire ruam pul᷊o appata piaṛṛange wuṛṛu sire appata riadianna apan uapal᷊iwutta adderan araratuanna udde inumaruutta wuṛṛu nassubba Ruata apan ua'ianna su adderan araratuanna. I mangitou nabbisara, “Amin! Paddalote Ruata!”

Andeangngu awingngu Ana'u Domba

⁵ See niaringiṛṛana wuassu adderan araratuanna udde tingikku wisara apan mabbisara, “Paddalote Ruata, ei manga allangngu Ruata, wuṛṛu anambon taumata – timmade dario'a – apan massubba Ruata!”

⁶ Napawe wua'udde i ya'u naaringikka sambau ere tingikku ammul᷊annu taumata nambo atonna; tingikke naal᷊ihidda lua'a mabbasse wuṛṛu ere rallu'a mappose. I ya'u naaringikka i mangitou mabbisara, “Paddalote Ruata! Ana waugu Ruatang kite Lembon Taṛṛino udde, orassa indi uaparenta!

⁷ Wette i ite lumala'a wuṛṛu lumuassa; wette i ite maddalo awawantu-Ge! Ana waugu nia'omante allong kawingnga apan uaaggasa arannu Ana'u Domba udde, wuṛṛu pare-Ne nasaddiate iawingnga si Tou.

⁸ Peddeta lenan apan sussal᷊endapa suete nionggolla si tou iapaal᷊uṛṛe.” (Peddeta lenanna udde eteudde manga inolaanna apan mapia apan niola'u al᷊aṛṛana'u Ruata.)

⁹ See mala'ekatta udde nabbisara si ya'u, “Woṛṛetta'a indi: ‘Lal᷊umanna'a su taumata apan niwagoanna su andeangngu awingngu Ana'u Domba udde.’ ” See mala'ekatta udde nanamba apia, “Ete indi watti'a atonna wuassu Ruata.”

¹⁰ I ya'u nassumaga su saruannu mala'ekatta udde ana waugu nassubba si tou, arawe i tou nabbisara si ya'u, “Arie! Arie passubba si ya'u, passubbate Ruata! Ana waugu i ya'u lai allangnga ere i'o wuṛṛu ere anambon tuṛṛangu apan uaaggasa matohassa su watti'u Mawu Yesus!” Ana waugu ete watti'u Mawu Yesus udde mannantiro manga taumata apan mabatti'u papatta.

Sumasa'e awal᷊o mawira

¹¹ Wua'udde i ya'u naasilo surga nawu'a, see niasiloanna sambau awal᷊o mawira. Sumasa'e-Ne aranne Matuṛṛuta wuṛṛu Atonna. I Tou matul᷊idda sulal᷊ummu mangema'u ṛuumanna wuṛṛu sulal᷊ummu pangalo apan niolang-Nge.

¹² Mata-Ne naal᷊ihidda ṛenggamu putungnga wuṛṛu su pua-Ne i Tou ual᷊uṛṛe manambo araposan araratuanna. Su wada-Nge uawoṛṛetta sambau aranna; wuṛṛu tumba'u i Tou sassane masingkatu aranna udde.

¹³ Jubah apan ual᷊uṛṛe si Tou suete niammo sulal᷊ummu ṛaṛṛa. Wuṛṛu i Tou nisaggo “Ṛengetannu Ruata”.

¹⁴ Tantaram pangalo wuassu surga uatantalongnga si Tou ringannu uasa'e manga awal᷊o mawira, wuṛṛu uapeddetu lenan mawira wuṛṛu waresi.

¹⁵ Wuassu moṛṛo-Nge sinumabanga sammata hal᷊ele apan maṛṛoro wuṛṛu ringannu hal᷊ele udde i Tou sarun mapaarugi manga walahanna, wuṛṛu i Tou sarun mamarenta si mangitou ringannu tatumma'ina atta'a. I Tou sarun mamakkan anggore sulal᷊ummu pamamakkannu anggoru asasa'un Ruata Apan Lembon Taṛṛino.

¹⁶ Su jubah-Ne wuṛṛu su palang-Nge uawoṛṛetta aranna indi, “Ratun al᷊awo'u ratu, wuṛṛu Mawun al᷊awo'u mawu.”

¹⁷ Ana see i ya'u naasilo sangkatou mala'ekatta uarisikka su wowon matannallo. Ringannu tingikka ma'ikkata i tou inumui su anambon manu'u winalanganna, “Wette pa'ammule, tadea'u i ite inai su andeangnga wahewalla apan ilallaghun Ruata!

¹⁸ Wette uminassa manga ṛemessu manga ratu, wuṛṛu ṛemessu manga panglima, wuṛṛu ṛemessu taumata apan nate su pangalo; wette uminassa ṛemessu manga sumasa'e awal᷊o wuṛṛu ṛemessu manga awal᷊one wuṛṛu ṛemessu anambon taumata, timmade ara'e dario'a, allangnga wuṛṛu tawe allangnga!”

¹⁹ Wua'udde i ya'u naasilo winatangnga udde, wuṛṛu manga ratun runia ringannu manga ammul᷊annu tantara mangitou, uaammulla mapapangalo lumawanna si Tou apan uasa'e awal᷊o mawira udde, wuṛṛu manga tantara-Ne.

²⁰ Ne winatangnga udde niasametta suadio'a ringannu nabi awusu apan suete na'ola'a manga al᷊aṛṛindu'a su saruannu winatangnga udde. (Ringannu manga al᷊aṛṛindu'a uddewe winatangnga udde nangawusu manga taumata apan uatahuanna tatialam binatangnga udde, wuṛṛu manga taumata apan massubba paal᷊uannu winatangnga udde.) See winatangnga udde wuṛṛu nabi awusu udde niramme ta'e wiakka sulal᷊ummu tahal᷊oangngu putungnga apan lukkenggama ringannu belerangnga.

²¹ Wuṛṛu ammul᷊annu tantara mangitou nipaten hal᷊ele apan sinumabbanga wuassu moṛṛongu sumasa'e awal᷊o mawira udde. Ne manga manu'u winalanganna lai nirumanta wuṛṛu niuminassa ṛemessi mangitou apan nipate udde.