SONDAPPA 16 - WUKE SUSI WATTI'U AL᷊AL᷊USASSA

Manga cawanna asasa'un Ruata

¹ Ana see i ya'u naaringikka tingikka wahewalla wuassu lal᷊ummu Wal᷊en Ruata nabbisara su sire pitu mala'ekatta udde, “Roote wuṛṛu lal᷊ina'e lal᷊oṛṛon pitu cawanna asasa'u Ruata udde su wowon runia!”

² Ne mala'ekatta paarorone inaite wuṛṛu nallal᷊innu lal᷊oṛṛon cawanne su runia. Ne nilumappute manga pinsula apan mahiadda wuṛṛu tumaniten mataddu'a su anambon taumata apan pia tatialam winatangnga udde, wuṛṛu su manga taumata apan massubba paal᷊uanne.

³ Napawe wua'udde mala'ekatta aruane nallal᷊innu lal᷊oṛṛon cawanne su tahal᷊oangnga. Ne ua'en tahal᷊oangnga nabbal᷊i ere ṛaṛṛan taumata nate, wuṛṛu natete manga riadianna apan mabbiakka sulal᷊ummu tahal᷊oangnga.

⁴ Wua'udde mala'ekatta atallune nallal᷊innu lal᷊oṛṛon cawanne su manga sal᷊ukka wuṛṛu manga al᷊imatan ua'e, ne al᷊awo'u ua'ene nabbal᷊i ṛaṛṛa.

⁵ I ya'u naaringikka mala'ekatta apan uataṛṛino ua'e nabbisara, “Ṛuumanna apan niemangngu udde matul᷊idda, I'o Lembon Susi, Ruata apan nirumanta, wuṛṛu nirumantate!

⁶ I mangitou suete napaaturon ṛaṛṛam walahannu Ruata wuṛṛu ṛaṛṛa manga nabi; orassa indi I'o mappa'inummu ṛaṛṛa si mangitou. Atonna, naṛṛinote udde maola'a si mangitou!”

⁷ Ana see i ya'u naaringikka tingikka wuassu mezbah nabbisara, “Mawu, Ruata Lembon Taṛṛino, atonna wuṛṛu su atatul᷊idda manga ṛuumanna apan niema'a si yami!”

⁸ Napawe wua'udde mala'ekatta aippane nallal᷊innu lal᷊oṛṛon cawanne su matannallo, ne matannallo niwala mannutungnga taumata ringannu sal᷊ihangnge apan mal᷊oso udde.

⁹ Taumata natutungngu sal᷊ihangnge, wuṛṛu i mangitou namontoga arannu Ruata, apan uataṛṛino manga asasusa udde. Salaiwe aroddi, i mangitou maddiri mawal᷊u wuassu manga rosa mangitou wuṛṛu maddiri maddalo awawantugu Ruata.

¹⁰ See mala'ekatta al᷊imane nallal᷊innu lal᷊oṛṛon cawanne su adderan araratuannu winatangnga udde. Ne ahewallu araratuannu winatangnga udde nabbal᷊i maranduma, wuṛṛu taumata mangngi'i lila ana waugu atataddu'a.

¹¹ See i mangitou namontoge Ruata su surga ana waugu i mangitou nataddu'a wuṛṛu ana waugu manga pinsuli mangitou. Arawe i mangitou tawe mawal᷊u lai wuassu pallal᷊agu mangitou apandal᷊eo.

¹² Napawe wua'udde mala'ekatta aiannume nallal᷊innu lal᷊oṛṛon cawanne watukku Sal᷊ukku Efrat apan wahewalla udde. Ne sal᷊ukka udde namara na'oman sara manga ratu wuassu samba'an ra'i wotongnge sumabbi umamatta.

¹³ See i ya'u naasilo tatallu ghaṛṛaho lal᷊eo apan olangnge naal᷊ihidda a'akka. A'akka udde sambau-sambau sussabbanga wuassu moṛṛongu naga, wuassu moṛṛongu winatangnga, wuṛṛu wuassu moṛṛongu nabi awusu.

¹⁴ I mangitou eteudde manga ghaṛṛaho lal᷊eo apan ma'ola'a manga al᷊aṛṛindu'a. Tatallu ghaṛṛaho udde inaite su anambon manga ratu su ahewallu runia wuṛṛu nangammule mangitou mapapangalo su Allo apan wahewalla, eteudde Allo wuassu Ruata Lembon Taṛṛino.

¹⁵ “Daringiṛṛete! I Ya'u rumanta ere taṛṛa ta'o! Al᷊al᷊uassa su taumata apan sidutu uataṛṛapa wuṛṛu uariaga peddene, ma'oman sara i tou tawe umamatta tantol᷊e wuṛṛu masili su saruannu awadaalla!”

¹⁶ Wua'udde manga ghaṛṛaho udde nangammullu manga ratu udde su tampa apan sulal᷊ummu wisaran Ibrani isassaggo Harmagedon.

¹⁷ Napawe wua'udde mala'ekatta appitune nallal᷊innu lal᷊oṛṛon cawanne su winalanganna. Ne niaringikke tingikka apan ma'ikkatta wuassu adderan araratuannu Wal᷊e Mawu, apan nabbisara, “Nasuete!”

¹⁸ See nariaddite sawallo ma'ilatta wuṛṛu tingikku rallu'a mappose wuṛṛu ruddallu'a, lapiddu linukka apan wahewalla. Tawe saran paassa pia linukka aroddi ahewalle ro'en taumata niriaddi. Ete indi linukka apan ahewal᷊anne!

¹⁹ Soa wahewalla udde natahia tallung kaadoanna, wuṛṛu naṛṛimunsa'e lai manga soa su anambon araratuanna su runia. See Ruata naanaungnga Babel apan wahewalla udde. Ne Ruata napa'inummi tou anggore wuassu cawannu Ruata – eteudde anggoru asasa'u-Ne apan nangillembo.

²⁰ Anambon taṛṛanusa nawontola, wuṛṛu anambon bowone nawul᷊ussa.

²¹ Uranna eisse apan wahewa, sambau-sambau awakkane limam pul᷊o su kilone, nanawo wuassu langitta nangema'a manga taumata. Ne i mangitou namontoga Ruata ana waugu asasusan uranna eisse apan wahewalla udde.