SONDAPPA 14 - WUKE SUSI WATTI'U AL᷊AL᷊USASSA

Ana'u Domba wuṛṛu al᷊aṛṛanang-Nge

¹ Wua'udde i ya'u naasilo, see niasiloanna Ana'u Domba udde uarisikka su wowon Wuiddu Sion. Suadio'a ringanni Tou pia 144.000 su atoune taumata apan su pakkanu sangkatou-sangkatou uawoṛṛetta aran-Ne wuṛṛu arannu Mawu Iamang-Nge.

² See i ya'u naaringikka tingikka wuassu langitta mangngelekka naal᷊ihidda tingikku ua'e wahewalla apan mappampassa wuṛṛu naal᷊ihidda tingikku rallu'a apan masaddata. Tingikka udde niaṛṛingiṛṛana naal᷊ihidda tingikku musikka wuassu mananalangnga kecapi apan tantal᷊anna mannengkella kecapine.

³ Su saruannu adderan araratuanna wuṛṛu sire appata riadianna wuṛṛu manga piaṛṛange uapal᷊iwutta adderan araratuanna udde, 144.000 su atoune udde mangngantari sambau antari wakku. Antari udde tawe aurumannu saran sangkatou, tumba'u sire 144.000 su atoune udde apan suete nipallosa wuassu runia.

⁴ I mangitou udde manga taumata apan sidutu na'ukkassa ere maṛṛuala susi, ana waugu tawe uaaukka suadio'a ringannu wawine. I mangitou uatantalongnga Ana'u Domba udde suapan tampa i Tou inai. Wuassu wallatu anambon taumata, tumba'u i mangitou apan suete nipallosa maola'a sasamba apan paarorone su Ruata wuṛṛu su Ana'u Domba.

⁵ Tawe saran paassa i mangitou mangawusu; wuṛṛu i mangitou tawe anggone saran adio'a.

Sire tallu mala'ekatta

⁶ See i ya'u naasilo sangkatou mala'ekatta waine apan tuttalla'a matanggaka su langitta. Mala'ekatta udde uaapiddu watti'a su ola'u Watti'u Al᷊al᷊uassa apan awasa iapaasingkatta su taumatan runia eteudde su anambon walahanna, ṛuanganna, wahasa wuṛṛu araratuanna.

⁷ Mala'ekatta udde u'ui ringannu tingikka apan ma'ikkatta, “Aata'utten Ruata wuṛṛu paddalote awawantu-Ge! Ana waugu nia'omante tempone Ruata mamarikissa taumata. Subbaite i Tou apan nandiaddi langitta, runia, tahal᷊oangnga wuṛṛu al᷊awo'u al᷊imatan ua'e!”

⁸ Mala'ekatta aruane nanansuna mala'ekatta paarorone lapiddu inumui, “Nanawote! Soam Babel apan wahewalla nanawote! I tou suete na'ola'a al᷊awo'u walahanna niwu'annu anggore – eteudde anggore wuassu apulun sasandage!”

⁹ Sangkatou mala'ekatta atallune nanansuna darua mala'ekatta udde, lapiddu inumui ringannu tingikka ma'ikkatta, “Taumata apan massubba winatangnga udde ringannu paal᷊uanne, wuṛṛu pia tatialam winatangnga udde su pakkane ara'e su limane,

¹⁰ taumata udde sarun ma'inumma anggore wuassu Ruata, eteudde anggoru asasa'u-Ne apan suete nilal᷊inni Tou sulal᷊ummu tampane, apan tawe nihaingnga sarang kadio'a! Anambon taumata udde sarun sansaranna sulal᷊ummu putungnga wuṛṛu belerangnga su saruannu manga mala'ekatta susi wuṛṛu su saruannu Ana'u Domba udde.

¹¹ Timbula wuassu putungnga apan mannansara manga taumata udde sidutu tuttimbula saran mal᷊annu-l᷊annu. Allo ṛabbi tawe illol᷊one i mangitou sassansaranna, eteudde i mangitou apan massubba winatangnga udde wuṛṛu paal᷊uanne, anambon taumata apan pia tatialan arannu winatangnga udde!”

¹² Sulal᷊ummu olangnge indi walahannu Ruata apan matuṛṛuta su manga parentan Ruata wuṛṛu matuṛṛuta Mawu Yesus, ṛinone matammuda.

¹³ See i ya'u naaringikka tingikka wuassu surga mabbisara, “Woṛṛetta'a indi: Manattaka orassa indi, al᷊al᷊uassa su manga taumata apan nate tantal᷊anna mangngimbe Mawu!” “Atonna!” sasimbaku Ghaṛṛahon Ruata. “I mangitou sarun mangillol᷊o mammanara masahadda, ana waugu hessim pangangimbe mangitou sidutu uatantalongnga si mangitou.”

Runia itinganna

¹⁴ Wua'udde i ya'u na'ellega, ne niasiloanna sambau winabbawa apan mawira. Su wowon winabbawa udde ua'ianna sangkatou apan aellehanna ere taumata. Su pua-Ne pia sambau araposan araratuanna wul᷊awanna, wuṛṛu su lima-Ne pia sambau hal᷊ele maṛṛoro.

¹⁵ Wua'udde sangkatou mala'ekatta waine sinumabanga wuassu Wal᷊en Ruata. Ringannu tingikka apan ma'ikkatta, i tou inumui si Tou apan ua'ianna su wowon winabbawa udde, “Limbea'e hal᷊ele-Nu udde wuṛṛu orassa indi pangitingke, ana waugu temponetem pangangitingnga; runia nal᷊ahate wotongngete itinganna!”

¹⁶ See i Tou apan ua'ianna su wowon winabbawa udde nallimbeten hal᷊ele-Ne watukku runia, ne runia a'itingante.

¹⁷ Wua'udde i ya'u naasilo lai sangkatou mala'ekatta waine lai sinumabbanga wuassu Wal᷊en Mawu su surga. I Tou lai uaaggasa hal᷊ele sammata apan maṛṛoro.

¹⁸ Napawe wua'udde, sangkatou mala'ekatta waine, apan uataṛṛino putungnga, nirumanta wuassu mezbah. Ringannu tingikka ma'ikkatta i tou inumui su mala'ekatta apan uaaggasa hal᷊ele maṛṛoro udde, “Limbea'e hal᷊elenu udde wuṛṛu ti'ote manga wuan anggore su runia, ana waugu manga wuane nal᷊ahate!”

¹⁹ Ne mala'ekatta udde nallimbeten hal᷊elene watukku runia wuṛṛu nani'o manga wuan anggore wuassu alune, see nilombo sulal᷊ummu hahilingannu anggoru asasa'un Ruata apan wahewalla.

²⁰ Manga wuan anggore udde nihilingnga su liuddu soa, wuṛṛu wuassu hahilingannu anggore udde mangngelekke ṛaṛṛa naal᷊ihida sal᷊ukka, araune tallu ṛasutta kilometeṛṛe, wuṛṛu al᷊al᷊umme marani n dua meteṛṛe.