SONDAPPA 12 - WUKE SUSI WATTI'U AL᷊AL᷊USASSA

Wawine wuṛṛu naga

¹ See niasiloanna su langitta sambau apan ma'aṛṛindu'a wuṛṛu tumaniten ma'atiangnga. Sangkatou wawine ual᷊uṛṛen matannallo peddene, tantal᷊anna uarisikka su wowon wul᷊anna. Su puane pia sambau araposan araratuanna niola'a wuassu mapul᷊o dua anumpitanna.

² Wawine udde, tantal᷊anna pia illoṛṛo, wuṛṛu ana waugu temponete mangunsiwe, ne i tou mangngintul᷊in atatauddu'a.

³ See niasiloante apia su langitta sambau apan ma'aṛṛindu'a. Pia sambau naga maṛṛamu apan wahewalla atonna pia puane pitu wuṛṛu tatandunge mapul᷊o. Suapan puane pia araposan araratuanna.

⁴ Ringannu tol᷊ene i tou nanggemonnu sepertiga wuassu manga anumpitanna su langitta wuṛṛu nituntunga watukku runia. Naga udde uarisikka su saruannu wawine apan mangunsiwete udde ringannu panduma mangallupa anangnge, napawe i tou niasungkangke.

⁵ See wawine udde nangunsiweten sangkatou ana'a esakka apan sarun mamarenta anambon walahanna ringannu tatumma'inna atta'a. Arawe ana'a udde niaṛṛo wuassu wawine udde, see niapidda ringannu Ruata wuṛṛu su saruannu adderan araratuan-Ne.

⁶ Ne wawine udde tinumal᷊angnga su wadda'a, su tampa apan suete nissaddian Ruata si tou. Su tampa udde i tou sarun paddul᷊iananna 1260 allo al᷊annune.

⁷ See su surga nariaddite pangalo. I Mikhael wuṛṛu manga mala'ekanne mapapangalo lumawanna naga udde. Wuṛṛu naga udde lai nilal᷊imannu manga mala'ekanne, lumawanna si Mikhael.

⁸ Arawe naga udde niapaarugi. I tou wuṛṛu manga mala'ekanne tate iwala matana'a su surga.

⁹ Naga apan bahewalla udde niramme su liudde! Ete i tou atoanna timmade udde apan aranne Setanna ara'e Ghaṛṛaho Lal᷊eo, apan nangawusu ahewallu runia. I tou niramme su runia su sambau ringannu manga mala'ekanne.

¹⁰ See i ya'u naaringikka tingikka apan ma'ikkatta su surga mabbisara, “Ete orassa indi tempone Ruata manal᷊amatta pabbawala-Ge! Orassa indi Ruata napaal᷊iatta'u taṛṛino-Ne ere sangkatou Ratu! Orassa indi Ratum Punnu Sal᷊amatta apan suete pina'ire udde suete napaal᷊iatta'u taṛṛino-Ne! Ana waugu apan nangansila manga tuṛṛangi ite su saruannu Ruata, allo wuṛṛu ṛabbi, suete niapaasabbanga wuassu surga.

¹¹ Manga tuṛṛangi ite suete napaarugin tou ringannu ṛaṛṛan Ana'u Domba udde, wuṛṛu ringannu watti'a apan atonna wuassu Ruata apan niwatti'i mangitou. I mangitou mal᷊uassa nanantillu niawa mangitou ma'oman sara mate.

¹² Ana waugu udde, ṛinone surga wuṛṛu sarangkanambone apan uatana'a sul᷊alumme, lumala'a! Arawe nasilakate runia wuṛṛu tahal᷊oangnga, ana waugu Setanna sinumossokke ringanni yamiu ringannu asasa'une apan Bahewalla, ana waugu i tou masingkata, manungku tempone tate mal᷊annu lai.”

¹³ Su tempo naga udde naatutukka manungku i tou nirammete su runia, i tou nanattakke mangngenggena wawine apan suete nangunsiwen ana'a esakka udde.

¹⁴ Arawe wawine udde nionggol᷊annu darua papaiddu manu'a rajawali apan mal᷊alakka, tadea'u i tou tumalla'a su tampa atanaanne su wadda'a, suapa i tou sarun paddul᷊iananna tallu tonna annumu wul᷊anna al᷊annune, mal᷊iuda wuassu aenggenu naga udde.

¹⁵ Ne naga udde napaasabbangu ua'e wuassu moṛṛonge apan manambo atonna watukku wawine udde, tadea'u mapa'elekki tou.

¹⁶ Arawe runia nassumbala wawine udde; runia namu'a moṛṛonge, wuṛṛu nangallupa ua'e apan sinumabbanga wuassu moṛṛongu naga udde.

¹⁷ Naga mangke nasa'u atonna su wawine udde, na'oman sara i tou inaite namangalo walahanna waine wuassu wawine udde, eteudde anambon taumata apan tuttuṛṛuta manga parentan Ruata, wuṛṛu nattiala su ola'u Mawu Yesus wuṛṛu taṛṛino-Ne.

¹⁸ See naga udde dirumarisikka su apanne.