SONDAPPA 1 - WUKE SUSI WATTI'U AL᷊AL᷊USASSA

¹ Lal᷊oṛṛon wuke indi mabatti'a su ola'u apa apan suete niapaal᷊iatta'u Mawu Yesus su ola'u manga arariaddianna apan sarun mariaddi. Ruata namasingkata Mawu Yesus tadea'u i Tou mamasingkata su manga allangngu Ruata, apa apan ṛinone mal᷊ihakke mariaddi. Kristus nandolokku mala'ekan-Ne si Yohanes, allang-Nge, iapapasingkatu manga arariaddianna udde si tou.

² Ne i Yohanes nabbati'en sarangkanambone apan niasiloanne udde; wuṛṛu ete indi watti'i tou su ola'u tanatan Ruata apan tinohassu Mawu Yesus Kristus wuassu tatiala-Ne.

³ Lal᷊umanna'a su taumata apan mabbasa wuṛṛu maddaringikka watti'u papattam wuke indi see tuttuṛṛuta apa apan uawoṛṛetta sulal᷊ummu wuke indi. Ana waugu tate mal᷊annu lai sarangkanambone indi sarun mariaddi.

Tabea su pitu jamaatta

⁴ Manga tuṛṛanga apan uatana'a su pitu jamaatta su leta'u Asia! I ya'u Yohanes, mangngantimma i yamiu onggol᷊annu al᷊amatta wuṛṛu al᷊al᷊uassa wuassu Ruata – eteudde i Tou apan nirumanta, apan nirumantate wuṛṛu apan nirumanta sarangkal᷊o'engnge – wuṛṛu lai wuassu pitu ghaṛṛaho apan uatana'a su saruannu adderan araratuannu Ruata,

⁵ wuṛṛu wuassi Yesus Kristus, mattatiala apan matuṛṛuta. Ete i Tou apan paarorone niapaawiakka apia wuassu papate wuṛṛu ete i Tou ahebbal᷊anne uaparenta manga ratun runia. Mawu Yesus mandangngu si ite, wuṛṛu ringannu papate-Ne, i Tou napaal᷊iung kite wuassu manga rosang kite,

⁶ wuṛṛu nandiadi si ite sambau walahannu manga imam, apan mangngimbe Ruata, Iamang-Nge. Mawu Yesus Kristus eteudde awantuhanne wuṛṛu uataṛṛino sarangkal᷊o'engnge. Amin!

⁷ Pa'ellega i Tou rumanta sulal᷊ummu winabbawa! Anambon taumata sarun ma'ellega si Tou, nasutta i mangitou lai apan nangusu'a si Tou. Anambon walahanna su runia sarun lumal᷊on Tou. Ore, Atonna! Amin!

⁸ “Ete i Ya'u apan paarorone wuṛṛu pangudusanne,” wisaran Mawu Ruatan, apan nirumanta, apan nirumantate, wuṛṛu nirumanta sarangkal᷊o'engnge, Apan Lembon Taṛṛino.

Aellega su ola'i Kristus

⁹ I ya'u Yohanes, tuṛṛangu apan mal᷊uassa wuṛṛu massusa suadio'a ringanni yamiu sulal᷊ummu asasusa apan naṛṛia'a su mallal᷊aṛṛenggenni Kristus. I ite masabare matataṛṛanga ana waugu walahanna pussa'a-Ne. I ya'u niramme su Patmos ana waugu i ya'u mammasingkatu tanatan Ruata, apan tinohassu Mawu Yesus sulal᷊ummu tiala-Ne.

¹⁰ Su allo Mawu, i ya'u niaasuttannu Ghaṛṛahon Ruata, see i ya'u naaringikka tingikka apan ma'ikkatta – nassul᷊ungngu tingikku trompeta – mabbisara su liu'u.

¹¹ Tingikka udde nabbisara, “Woṛṛetta'a apa apan niasiloannu, wuṛṛu onggol᷊a'a wuke udde su pitu jamaatta apan isassago indi: Efesus, Smirna, Pergamus, Tiatira, Sardis, Filadelfia, wuṛṛu Laodikia.”

¹² I ya'u nanaile watukku liudde ma'ellega isai udde mabbisara si ya'u. See i ya'u naasilo pitum bua leddan sol᷊o apan niola'a wuassu wul᷊awanna.

¹³ Su pattangngannu manga leddan sol᷊o udde uarisikka sangkatou apan niasiloanna naal᷊ihidda taumata. I Tou ual᷊uṛṛen jubah alo'engnge na'oman sara ledda. Su sabba-Nge, i Tou uapaattu lal᷊indumu ro'o wuassu wul᷊awanna.

¹⁴ Utang-Nge mawira ere wambul᷊un domba, awirane ere sangarenna ana'e wungkassa. Mata-Ne luṛṛenggama ere putungnga;

¹⁵ ledda-Ne luṛṛena naal᷊ihida witu'a itattambuna. Tingik-Ke naal᷊ihidda tingikku ua'e mappampassa apan wahewalla.

¹⁶ Lima uanan-Ne uaagassa anumpitanna pitu, wuṛṛu wuassu moṛṛo-Nge sinumabangnga hal᷊ele maṛṛoro sammata, apan ṛoṛṛone ruam ba'a. Hati-Ne lullansiangnga naal᷊ihidda matannallo su allo allattune.

¹⁷ Su tempo i ya'u naasilo, i ya'u nassumaga su saruan-Ne ere taumata nate. Arawe i Tou namitan lima-Ne aikkatanna si ya'u see nabbisara, “Arie paata'utta! Ete i Ya'u apan paarorone wuṛṛu pangudusanne.

¹⁸ Ete i Ya'u i Tou apan wiakka! I Ya'u natete, arawe pa'elege, i Ya'u wiakka saran mal᷊annu-l᷊annu. I Ya'u uataṛṛino papate, wuṛṛu su wowon runian taumata nate.

¹⁹ Ana waugu udde woṛṛetta'a manga inolaanna apan niasiloannu, eteudde manga inolaanna apan sarun mariaddi orassa indi wuṛṛu manga inolaanna apan sarun mariaddi sal᷊immurine.

²⁰ Ete indi addapinga wuassu anumpitanna pitu apan niasiloannu su lima uanang-Ku, wuṛṛu wuassu pitu leddan sol᷊o wul᷊awanna udde: Anumpitanna pitu udde eteudde manga mala'ekatta su pitu jamaatta, wuṛṛu pitu leddan sol᷊o udde eteudde pitu jamaatta udde.”