SASABANGNGA 6 - WUKE SUSI WATTI'U AL᷊AL᷊USASSA

Mawu namaggo si Musa

¹ Ruata nabbisara si Musa, wisarane, “Ete i Ya'u Mawu.

² I Ya'u naipasilon batangang-Ku si Abraham, i Ishak wuṛṛu i Yakub naola'a Ruata Apan Lembontaṛṛino, arawe i Ya'u tawe namasingkatu watangang-Ku si mangitou ringannu arannu ‘Mawu.’

³ Ruata lai na'ola'a pa'aire si mangitou. I Ya'u ma'ire sarun mangonggolu wanua Kanaan si mangitou, wanua tampan pabbiaṛṛanni mangitou dorone naal᷊ihidda taumata raho.

⁴ I Ya'u naaringikke sasal᷊iomannu taumatan Israel apan niallangngu walahannu Mesir, ana see i Ya'u naaringikka pa'aire-U udde.

⁵ Nariaddi al᷊iata'e su taumatan Israel manungku i Ya'u nabbisara si mangitou: Ete i Ya'u Mawu; i yamiu sarun Ta'u iapallossa wuassu pataṛṛuallanganna Mesir. I Ya'u sarun mapal᷊iatta'u taṛṛino-U apan bahewalla ipanal᷊amatta si yamiu wuṛṛu mangema'u ṛuumanna mawakkata su walahannu Mesir.

⁶ I yamiu sarun Ta'u olaanna al᷊aṛṛana-U wuṛṛu i Ya'u maola'a Ruatanu. Ne i yamiu sarun maasingkatta manungku i Ya'u indi Mawu, Ruatanu, apan mamallossi yamiu wuassu patataṛṛuallangnganna su Mesir.

⁷ I yamiu sarun Ta'u iapidda watukku wanua apan buatte nipa'ire-U ringannu sasalu si Abraham, i Ishak wuṛṛu i Yakub; leta'a udde Ta'u ionggola si yamiu maola'a pussaanu sassane. Ete i Ya'u Mawu.”

⁸ Anambon tanata Mawu indi nipasingkatti Musa su walahannu Israel, arawe i mangitou maddiri maddaringikka si Musa, ana waugu pattaṛṛuallanganna apan maṛṛagissa udde naaola'a si mangitou niawul᷊iaten antimma.

⁹ Wua'udde nabbisara si Musa,

¹⁰ “Roote saruanna ratu Mesir wuṛṛu wal᷊oa'a si tou manungku i tou ṛinone mamalan balahannu Israel manantangngu wanuane.”

¹¹ Arawe i Musa sinumimbakka, “Taumatan Israel sassane maddiri maddaringikka si ya'u. Apa wotongnge ratu Mesir maddaringikka taumata apan longonna massinaukka ere i ya'u?”

¹² Ete aroddi Mawu nandolokki Musa wuṛṛu i Harun iapapasingkatta su walahannu Israel wuṛṛu su ratu Mesir manungku itarua nirolokku Mawu iapapiaṛṛa'u walahannu Israel sumabangnga wuassu Mesir.

Pangangawanni Musa wuṛṛu i Harun

¹³ Indiwe pangangawanni Musa wuṛṛu i Harun; i Ruben, ana'i Yakub pahul᷊une, pia siri appata ana'a esakka; i Henokh, i Palu, i Hezron, wuṛṛu i Karmi. I mangitou udde iupungngu al᷊amona wuassu manga ṛuanganni sulal᷊ummu walagi i Ruben.

¹⁴ I Simeon wuṛṛu awingnge sangkatou wawinen Kanaan pia siri annumma ana'a esakka; i Yemuel, i Yamin, i Ohad, i Yakhin, i Zohar wuṛṛu i Saul. I mangitou udde iupungngu al᷊amona ṛuanganna sulal᷊ummu ṛuanganni Simeon.

¹⁵ I Lewi pia siri tallu ana'a esakka; i Gerson, i Kehat wuṛṛu i Merari; i mangitou udde iupungngu al᷊amona manga amonanna sulal᷊ummu ṛuanganni Lewi. I Lewi nal᷊al᷊appa uukka 137 su tonnane.

¹⁶ I Gerson pia ana'a esakka darua; i Libni wuṛṛu i Simei; i mangitou uatahuanna manambo papapulunna.

¹⁷ I Kehat pia siri appata ana'a esakka; i Amram, i Yizhar, i Hebron wuṛṛu i Uziel. I Kehat nal᷊al᷊appa uukka 133 su tonnane.

¹⁸ I Merari pia ana'a esakka darua; i Mahli wuṛṛu i Musi. Eteudde manga amonanna sulal᷊ummu ṛuanganni Lewi ringannu papapulunni mangitou sambau-sambau.

¹⁹ I Amram na'awingngi Yokhebed, tuarin iamangnge, wuṛṛu manga ana'i mangitou eteudde i Harun wuṛṛu i Musa. I Amram nabiakka 137 su tonnane.

²⁰ I Yizhar pia siri tallu ana'a esakka: i Korah, i Nefeg wuṛṛu i Zikhri.

²¹ I Uziel lai pia siri tallu ana'a esakka; i Misael, i Elsafan wuṛṛu i Sitri.

²² I Harun na'awingngi Eliseba, ana'i Aminadab wawine; i Eliseba lai pia tuṛṛangnge i Nahason. I Eliseba nanungkangngi Nadab, i Abihu, i Eleazar wuṛṛu i Itamar.

²³ I Korah pia siri tallu ana'a esakka; i Asir, i Elkana wuṛṛu i Abiasaf. I mangitou udde iupungngu al᷊amona wuassu ṛuangannu amonanni Korah.

²⁴ I Eleazar ana'i Harun esakka, naawingngu sangkatou su wallattu ana'i Putiel, wuṛṛu ana'i mangitou eteudde i Pinehas. Eteudde anambon timmadu ṛuanganna wuṛṛu tembonannu amonanna sulal᷊ummu ṛuanganni Lewi.

²⁵ I Harun wuṛṛu i Musa uddewe apan niparentannu Mawu iapaapiddu manga taumatan Israel sumabbangnga wuassu Mesir.

²⁶ Itarua sinumaruanna ratu Mesir tadea'u i tou mamallossu taumatan Israel.

Mawu nangonggolu parenta si Musa wuṛṛu si Harun

²⁷ Su tempo Mawu uahahatto Musa su Mesir,

²⁸ Mawu nabbisara, “Ete i Ya'u Mawu. Wal᷊oa'e su ratu Mesir sarangkanambone apan Ta'u niwal᷊o si'o.”

²⁹ Arawe i Musa sinumimbakka, “Mawu, I'o masingkatta manungku i ya'u longonna massinaukka. Ratu sarun tawe maddaringikka si ya'u?”