SASABANGNGA 33 - WUKE SUSI WATTI'U AL᷊AL᷊USASSA

Mawu nandolokku walahannu Israel manantangngu Wowon Sinai

¹ Ana see Mawu nabbisara si Musa, “Tatanga'e tampa indi wuṛṛu roote suadio'a ringannu walahanna apan niapiddu wuassu Mesir udde watukku wanua apan Ta'u pina'ire si Abraham, si Ishak wuṛṛu si Yakub see lai papapulunni mangitou.

² I Ya'u sarun mandolokku sangkatou mala'ekatta iapapiaṛṛa'i yamiu. I Ya'u sarun mallimbuakka walahannu Kanaan, Amori, Het, Feris, Hewi wuṛṛu Yebus.

³ I yamiu mattudan leta'a apan ala wuṛṛu masuwukka. Arawe i Ya'u sassane tawe tumantalongnga ringanni yamiu, tadea'u i yamiu tawe Ta'u pateanna su tangngan dal᷊anna, ana waugu i yamiu walahanna puane maattika.”

^4-6 Wua'udde Mawu nandolokki Musa niapawisara su walahannu Israel, “I yamiu walahanna puane maattika. Unnu wisara i Ya'u lai tumantalong ringanni yamiu tumba'u tal᷊ang kadio'a, i yamiu sarun Ta'u pateanna abbi. Luatte al᷊awo'u wul᷊awanni yamiu, ne i Ya'u sarun manantunna apa apan sarun Ta'u olaanna si yamiu.” Napawe naaringikka tatagu Mawu udde, i mangitou nasusa atonna naal᷊ihidda taumata lullal᷊o. Ana see i mangitou namallosu wul᷊awanni mangitou. Nariaddi, napawe buatte nanantangngu Wowon Sinai, walahannu Israel tate nappaattu lal᷊ogakka wul᷊awanna.

Rasannu Mawu

⁷ Masokka-sokka, napawe walahannu Israel maddasanna, i Musa manganu Rasanna wuṛṛu iaparisikka addaune wuassu paddasananni mangitou. Rasanna udde isassago Rasannu Mawu, wuṛṛu isai apan maapulu madorongnga tatantiron Mawu, inaite isudde.

⁸ Amungkangngu i Musa inaite su Rasanna udde, manga taumatan Israel uarisikka su saruannu ngaran dasanni mangitou wuṛṛu mannutukka si Musa ma'oman sara i tou sumutta.

⁹ Napawe i Musa nasuttate, sinumossoke bal᷊iaṛṛannu winabbawa wuṛṛu natta'alla su ngaran Dasanna. Wuassu winabbawa udde Mawu uahahatton i Musa.

¹⁰ Su tempo taumatan Israel naasilo pal᷊iaṛṛannu winabbawa su ngaran Dasannu Mawu, i mangitou sarangkanambone dirumarisikka wuṛṛu niumal᷊intudda su ngaran dasannu sangkatou-sangkatou.

¹¹ Mawu uahahatton Musa ringannu uahahati, naal᷊ihidda taumata uahahatton yawene. Wua'udde i Musa nabbelengke su paddasananna. Arawe i Yosua ana'i Nun, sangkatou umbasanna ual᷊al᷊ima si Musa, sidutu uatana'a sulal᷊ummu Rasanna udde.

Mawu nadiandi sarun mallu'adda walahan-Ne

¹² Su sambau allo i Musa nabbisara Mawu, “Mawu, I'o namarenta si ya'u niapapiaṛṛa'u walahanna indi watukku wanua apan pina'ire-Nu. Arawe I'o tawe nabbal᷊o isai apan sarun irolokku mallal᷊ima si ya'u. Mawu, I'o nabbisara manungku I'o masingka'u, wuṛṛu mal᷊uassa si ya'u.

¹³ Amungkangngu aroddi, atimanna mamasingkattu ṛiinnu, Mawu, tadea'u i ya'u wotongnge mangimbe Si'o wuṛṛu sidutu maal᷊uassa naung-Ngu. Naunge lai manungku walahanna indi buatte nipile-Nu maola'a pussaa-Nu.”

¹⁴ Unnu Mawu, “I yamiu sarun Ta'u lu'aranna tadea'u wotongnge maatahuanna leta'a apan Ta'u pinaire.”

¹⁵ I Musa sinumimbakka, “Amungkangngu Mawu tawe mallaṛṛenggenna si yami, arie paddoloṛṛa'a yami manantangngu tampa indi.

¹⁶ Ereapa taumata sarun maasingkatta manungku I'o mal᷊uassa si ya'u wuṛṛu su walahanna indi amungkangngu I'o tawe mantul᷊ungngi yami? Darantan Mawu su pattangnganni yami sarun paṛṛalane si yami wuassu manga walahanna waine su runia.”

¹⁷ Unnu Mawu si Musa, “Darorongngu sarun Ta'u daringiṛṛanna, ana waugu i Ya'u masingkannu wuṛṛu i Ya'u mal᷊uassa si'o.”

¹⁸ Ana see i Musa sinumal᷊ande, “Mawu, i ya'u paelleha'o semakku daranta-Nu.”

¹⁹ Sasimbakku Mawu, “I Ya'u sarun sumabbi ringannu al᷊awo'u awawantu-U su saruannu, lapiddu managgon arang-Ku apan susi. Ete i Ya'u Mawu, wuṛṛu i Ya'u mapal᷊iatta'u darangngun naungnga wuṛṛu aakkanna su manga taumata apan Ta'u nipile.

²⁰ Hati-U sarun tawe Ta'u ipasilo si'o, ana waugu taumata tawe wotongnge maasilo si Ya'u, wuṛṛu sidutu wiakka.

²¹ Su samba'a-U indi pia buidda watu; i'o wotongnge rumarisikka isudde.

²² Su tempo semakku daranta-U sumabbi, i'o Ta'u itaṛṛo su sulal᷊ummu sambau loṛṛangngu wuidda watu udde wuṛṛu Ta'u sappingannu lima-U ma'oman sara i Ya'u sinumabbite.

²³ Ana see Ta'u wabbutanna lima-U tadea'u i'o wotongnge maasilo si Ya'u wuassu liudde, arawe hati-U sarun tawe asiloannu.”