SASABANGNGA 32 - WUKE SUSI WATTI'U AL᷊AL᷊USASSA

Sapi wul᷊awanna

¹ Su tempo walahannu Israel naasilo manungku i Musa tumaniten mal᷊annu sumossokka wuassu wowone, arawe ta'e poiaroddi lai, i mangitou nakkulunna si Harun wuṛṛu nabbisara si tou, “I ite wagga apate nariaddi si Musa, taumata apan buatte nangapiddi ite sinumabbangnga wuassu Mesir; nariaddi yami ola'ete Mawu apan sarun mamiaṛṛa'i yami.”

² Ana see i Harun nabbisara si mangitou, “Luatte ngante-ngante wul᷊awanna apan ual᷊uṛṛe su manga awingngu wuṛṛu manga anangngu, wuṛṛu apira'e ringangku.”

³ Ne i mangitou nalluatte manga ngante-ngante wuṛṛu niapidda ringanni Harun.

⁴ I Harun nanganu ngante-ngante udde, ana see niuno wuṛṛu niwoson tou sulal᷊ummu sambau pasitaane wuṛṛu i tou na'ola'a sambau sapi. Walahanna udde nabbisara, “Ei Israel, eteindi monganni ite apan nanguntuddi ite sinumabbangnga wuassu Mesir!”

⁵ Ana see i Harun napararisikku sambau mezbah su saruannu sapi wul᷊awanna udde wuṛṛu nangal᷊iata, “Tiṛṛabbi pia andeangnga ipangaddata Mawu.”

⁶ Tiṛṛabbine marua' allo maṛṛanggapa, manga taumatan Israel nangapiddu manga pira winatangnga olaanna sasamba itattambunna, wuṛṛu manga pira lai olaanna sasamban paddarame. I mangitou niuma'ianna u'anna wuṛṛu ma'inumma, ana see nabbuatta ana waugu lulluassa.

⁷ Ne Mawu nabbisara si Musa, “Paal᷊ihakke sumossokka, ana waugu walahannu apan nipiaṛṛangngu sinumabbangnga wuassu Mesir buatte na'ola'a al᷊al᷊eo.

⁸ I mangitou buatte sinumewadda wuassu manga parenta-U. I mangitou na'ola'a paal᷊uanna sapi wuassu wul᷊awanna niwoso, ana see nassubba wuṛṛu nangonggolu sasamba si tou. Unni mangitou, eteudde monganni mangitou apan nangapiddi mangitou sinumabbangnga wuassu Mesir.

⁹ I Ya'u masingkatta manungku walahannu udde tate maddaringikka.

¹⁰ Imbaṛṛangnga manal᷊are si Ya'u. I Ya'u massa'u si mangitou wuṛṛu inai mamate si mangitou. Arawe i'o wuṛṛu papapulunnu sarun Ta'u olaanna sambau walahanna apan bahewalla.”

¹¹ I Musa sinumal᷊ande Ruatane, wisarane, “Mawu, anio I'o ṛinone ma'ola'a aroddi si mangitou? Wal᷊inewe I'o buatte nanal᷊amatta si mangitou wuassu Mesir ringannu taṛṛino wuṛṛu atatohassa apan bahewalla?

¹² Amungkangngu I'o mamate si mangitou, taumatan Mesir sarun mabbisara manungku I'o namiaṛṛa'u walahannu udde sinumabbangnga wuassu Mesir tadea'u mamate si mangitou su panenteanna wuṛṛu i mangitou sarangkanambone masue. Ariewe aroddi, oh Mawu, wal᷊ute naung-Ngu wuṛṛu ariete manilaka walahanna udde.

¹³ Naungete manga allangngu i Abraham, i Ishak wuṛṛu i Yakub. Naungete manungku I'o lai na'ire ringannu sasalu tadea'u mangonggolu papapulunna anambone ere anumpitanna su langitta, wuṛṛu lai manungku ahewallu leta'a apan pina'ire-Nu udde sarun maola'a pussa'a papapulunni mangitou saran mal᷊annu-l᷊annu.”

¹⁴ Ne Mawu namal᷊u pandumanne wuṛṛu tate mapaamattu riin-Ne ipangema'a walahanna udde ringannu asasilaka.

¹⁵ I Musa sinumossoke apia wuassu wowone udde uaapiddu darua watu apan wawoṛṛetannu manga titan Duata su sandiṛṛanne ruan ba'a.

¹⁶ Ruata sassane buatte na'ola'a watu udde wuṛṛu nanguitta manga tita udde isudde.

¹⁷ Tantal᷊anna sussossoka, i Yosua naaringikka manga taumatan Israel uui, ana see i tou nabbisarate si Musa, “Pia pagahahio pangalo su paddasananna.”

¹⁸ Unni Musa, “Daringiṛṛanna naal᷊ihidda wal᷊ine pagahahio naauntungnga ara'e hio narugi; udde tingikku taumata mangngantari.”

¹⁹ Napawe i Musa maraniten paddasananna udde, i tou naasilo sapi wul᷊awanna wuṛṛu manga taumata tantal᷊anna massal᷊aingnga, ne i tou nasa'ute. Isudde lai, su wawal᷊annu wowone udde, i Musa namantingngu watu apan niapiddi tou na'oman sara naṛṛimunsa'a.

²⁰ Wua'udde i tou nanganu paal᷊uanna sapi niola'u manga taumatan Israel udde, ana see niwoso wuṛṛu niwalu na'oman sara naal᷊ussa ere awu, ana see nilo'annu ua'e. Wua'udde i tou nandolokku taumatan Israel niapa'inumma.

²¹ I tou nabbisara si Harun, “Apate niola'i mangitou si'o na'oman sara niwalanu i mangitou na'ola'a rosa wahewalla?”

²² Sasimbakki Harun, “Arie pa'asa'u si ya'u; i'o masingkatta sassane ereapa ahewallu naungngu manga taumata indi ma'ola'a al᷊al᷊eo.

²³ I mangitou nabbisara si ya'u, ‘I ite wagga apa apan nariaddi si Musa, taumata apan buatte nangapiddi ite sinumabbangnga wuassu Mesir; nariaddi yami ola'ete monganna apan botongnge mamiaṛṛa'i yami.’

²⁴ I ya'u nandolokki mangitou manantillu wul᷊awanna, ana see i mangitou nanantilla si ya'u. Lal᷊ogakka sarangkanambone udde ta'u nitambunna su putungnga, ana see nariadite sapi indi!”

²⁵ I Musa naatutukka manungku i Harun buatte namalan balahannu Israel naal᷊ihidda awal᷊o napallosananna wuassu tandangnge, na'oman sara i mangitou nabbal᷊i pinallal᷊agen manga seetti mangitou.

²⁶ Ne i tou dirumarisikke su saruannu ngara wahewallu paddasananna wuṛṛu niumui, “Isai apan uasamba'a Mawu ṛinone rumanta inawarendi!” Ne ṛuanganni Lewi nirumantate namal᷊iwutta si Musa,

²⁷ wuṛṛu i tou nabbisara si mangitou, “Ruatan Israel namarenta si yamiu samba'u-samba'u manawutta hal᷊elenu wuṛṛu umamatta sumabbi paddasananna indi, wuassu ngaran pasallanganna indi maddatingngu ngara waine apiddu mamate manga tuṛṛangnga, manga hawenu wuṛṛu manga al᷊indongannu.”

²⁸ Ṛuangannu Lewi tinumuṛṛutta parenta udde wuṛṛu su allo udde iraṛṛangngo tallu ṛiwu su atoune nate nipate.

²⁹ Unni Musa su ruuangannu Lewi, “Allo indi yamiu buatte naṛṛaem batangannu maola'a imam ipangimbe Mawu ringannu namate manga ana'a wuṛṛu manga tuṛṛangngu, ne Mawu nangonggolu al᷊aman-Ne si yamiu.”

³⁰ Tiṛṛabbine i Musa nabbisara su walahanna udde, “I yamiu buatte na'ola'a rosa wahewalla. Arawe orassa indi ya'u sarun suma'a wowone udde apia sumaruanna Mawu; doronganna i ya'u maasomba aampungngu manga rosanu.”

³¹ Ana see i Musa inaite apia sumaruanna Mawu wuṛṛu nabbisara, “Walahanna udde buatte na'ola'a rosa apan bahewalla. I mangitou na'ola'a monganna wuassu wul᷊awanna.

³² Doronganna Mawu mangampungnga rosa mangitou; amungkangngu tawe, pappasse arangku wuassu wuken manga taumata wiakka.”

³³ Mawu sinumimbakka, “Tumba'u manga taumata apan buatte na'ola'a rosa su saruang-Ku sarun pappasanna aranne wuassu wuke udde.

³⁴ Roote orassa indi, wuṛṛu apira'e i mangitou udde watukku tampa apan buatte niwal᷊o si'o. Mala'eka'-U sarun mangehetta si'o, arawe tempone sarun dumanta manga taumata udde sarun Ta'u iṛṛuumanna ana waugu manga rosan mangitou.”

³⁵ Ana see Mawu nandantan asasusa su manga taumata udde ana waugu i mangitou namata'i Harun na'ola'a paal᷊uanna sapi wul᷊awanna udde.