SASABANGNGA 27 - WUKE SUSI WATTI'U AL᷊AL᷊USASSA

Mezbah

¹ “Pa'ola'e sambau mezbah wuassu alu akasia. Saṛṛene uataṛṛawu'u, al᷊o'engnge wuṛṛu al᷊alakke sambau-sambau 2,2 metere wuṛṛu atanggakke 1,3 metere.

² Suapan buune al᷊iurosone ṛinone olanna manga tatandu'a apan uaṛṛaidda sambau ringannu mezbah. Sarangkanambone ṛinone oosannu witu'a.

³ Pa'ola'e manga urinna wahewalla, sikopo, manga mangko, manga saṛṛampangnga wuṛṛu tampan putungnga. Saranapa sarangkanambone udde ṛinone olaanna wuassu witu'a.

⁴ Pa'ola'e kawa nianamma wuassu witu'a wuṛṛu pasea'e appata hal᷊angnga su alu papasanna su wuune appata al᷊iu wowane.

⁵ Atanggakku kawa nianamma udde ṛinone atanggakke mal᷊oara wuassu atanggakku mezbah. Kawa nianamma udde ṛinone ipul᷊issa su mezbah wageangnge al᷊iu wowane.

⁶ Pa'ola'e darua alu papasanna wuassu alu akasia aoosannu witu'a,

⁷ wuṛṛu suṛṛia'a sulal᷊ummu manga hal᷊angnga su sandiṛṛannu mezbah rua mba'a su tempo mamasanna mezbah udde.

⁸ Pa'ola'e mezbah udde wuassu pappala wuṛṛu pia loṛṛangnge sulal᷊umme, tumuṛṛuttu hol᷊aga apan Ta'u nipasingkatta si'o su puiddu wowone indi.”

Rallaku Rasannu Mawu

⁹ “Pa'ola'e rallaka uapal᷊iwutta Rasang-Ku apan papagal᷊annu senggota wuassu mal᷊aṛṛenessa linen al᷊ussa. Su wageangngu timukka, senggota udde al᷊o'engnge 44 metere,

¹⁰ tataṛṛangannu ruan pul᷊o diṛṛi witu'a, sambau-sambau ringannu apampakke witu'a, wuṛṛu aaitta see pangaitanne wuassu sal᷊a'a.

¹¹ Pa'ola'e ereudde lai su samba'an sawannaka.

¹² Su samba'an baṛṛatta, senggota udde al᷊o'engnge 22 metere, ringannu mapul᷊o diṛṛi wuṛṛu mapul᷊o apampakke.

¹³ Su wageangngu ra'i, apan pia ngarane, al᷊o'engngu sengotta udde lai 22 metere.

^14-15 Su aiṛṛi aikatannu ngara udde ṛinone paseannu senggota, sambau-sambau al᷊o'engnge 6,6 metere ringannu tatallu diṛṛi sulal᷊ummu tatallu apampakke.

¹⁶ Su ngarane ṛinone eleannu pampele al᷊o'engnge 9 metere wuassu linen al᷊ussa apan niraddu'u wol ma'elomma, ungu wuṛṛu maṛṛamu, wuṛṛu nilogaṛṛannu karawange. Ipanaṛṛangnga pampelen ngara udde ṛinone olaanna appata diṛṛi ringannu appata apampakke.

¹⁷ Anambon diṛṛi su rallaka udde ṛinone ipasasampa'u aaitta sal᷊a'a; aainne ṛinone wuassu sal᷊a'a wuṛṛu apampakke wuassu witu'a.

¹⁸ Senggota apan uapal᷊iwutta rallaka udde al᷊o'engnge 44 metere, al᷊alakke 22 metere wuṛṛu atanggake 2,2 metere. Senggota ṛinone olaanna wuassu mal᷊aṛṛenessa linen al᷊ussa wuṛṛu apampakke wuassu witu'a.

¹⁹ Anambon aolangnge apan ipaatta sulal᷊ummu Rasanna, anambon pati'annu Rasanna wuṛṛu manga sengotta udde ṛinone olaanna wuassu witu'a.”

Ola'u mammadul᷊i sol᷊o

²⁰ “Doloṛṛa'e taumatan Israel mangapiddu lanan zaitun tutune wuṛṛu apianne ipantaṛṛo sol᷊o sulal᷊ummu Rasang-Ku tadea'u wotongnge re'omanna wuṛṛu sidutu lukkenggamma.

²¹ I Harun wuṛṛu manga anangnge ṛinone mallu'adda sol᷊o udde wuassu wawallo maddatingngu marua'allo su tampa i Ya'u rumanta, su liudde mal᷊aṛṛenessa apan ua'ele su saruannu Wantallu Pa'aire. Parenta udde ṛinone olaannu taumatan Israel wuṛṛu papapulunne saran mal᷊annu-l᷊annu.”