SASABANGNGA 26 - WUKE SUSI WATTI'U AL᷊AL᷊USASSA

Rasannu Mawu

¹ “I Ya'u ola'ete Rasanna wuassu mapul᷊on bau mal᷊aṛṛenessa linen al᷊ussa, iraddu'u wolla ma'elomma, ungu wuṛṛu maṛṛamu. Sujite mal᷊aṛṛenessa udde ringannu hambarannu mala'ekatta.

² Suapan wageangngu mal᷊aṛṛenessa udde ṛinone uasul᷊ungnga, al᷊o'engnge mapul᷊o dua su meterene wuṛṛu al᷊alakke darua su meterene.

³ Liman wageangngu mal᷊aṛṛenessa ṛinone isampa'a mabbal᷊i sambau senggotta, wuṛṛu liman bageangnge waine ṛinone olaanna lai aroddi.

⁴ Ola'e aainne wuassu mal᷊aṛṛenessa ma'elomma su wiwikku senggotta darua udde,

⁵ liman pul᷊o aainne su senggotta sambau-sambau.

⁶ Pa'ola'e lai liman pul᷊o aaitta wul᷊awanna ipanampa'u senggotta darua udde tadea'u wotongnge maola'a sambau.

⁷ Su atuppu Rasanna udde pa'ola'e mapul᷊o assa wageangngu mal᷊aṛṛenessa wuassu wambul᷊un kambingnga.

⁸ Suapan wageangnge ṛinone uasul᷊ungnga ahewalle, al᷊o'engnge mapul᷊o tallu su meterene wuṛṛu al᷊alakke darua su meterene.

⁹ Liman bageangnge ṛinone isampa'a mabbal᷊i sambau senggotta, wuṛṛu annummu wageangnge waine ṛinone olaanna lai aroddi. Sampa'a aiannumme ṛinone lappuanna darua ipanaappa saruannu Rasanna.

¹⁰ Suṛṛia'e lai liman pul᷊o aaitta su wiwikku senggotta paarorone wuṛṛu liman pul᷊o lai su wiwikku senggotta aruane.

¹¹ Pa'ola'e liman pul᷊o aaitta wuassu witu'a wuṛṛu aita'a su pangaitanne udde tadea'u senggotta darua udde mabbal᷊i atuppu Rasanna.

¹² Mal᷊aṛṛenessa sampoto lambene ipaatta ipanaappa liuddu Rasanna.

¹³ Lebben mal᷊aṛṛenessa al᷊alakke liman pul᷊o senti metere su al᷊o'engngu Rasanna ṛinone iwala uataappa sandiṛṛannu Rasanna udde.

¹⁴ Pa'ola'e darua lal᷊uuba su wageangngu liuddu Rasanna, sambau wuassu pisin domba esakka apan niwuṛṛannu maṛṛamu wuṛṛu sambau lai wuassu pisi al᷊ussa.

¹⁵ Pa'ola'e manga sal᷊aba'u Dasanna apan matul᷊idda wuassa alu akasia.

¹⁶ Suapan sal᷊aba'u atanggakke appatu metere wuṛṛu al᷊alakke 66 sentimetere.

¹⁷ Suapan sambua sal᷊aba'u pia darua pati'anna sampare, na'oman sara manga sal᷊aba'u udde wotongnge isampa'a sambau ringannu waine.

¹⁸ Su Rasanna samba'an timukka pa'ola'e ruan pul᷊o salaba'u,

¹⁹ ringannu appatu pul᷊o apampakke wuassu sal᷊a'a, darua wowane suapan sal᷊aba'u wuṛṛu su darua pati'anne.

²⁰ Su wageangngu sawannakku Rasanna, pa'ola'e ruan pul᷊o sal᷊aba'u

²¹ ringannu appatu pul᷊o apampakke wuassu sal᷊a'a, darua su al᷊ungngu sambau sal᷊aba'u.

²² Su wageangngu liudde Rasanna samba'a waṛṛata, pa'ola'e annumma sal᷊aba'u

²³ wuṛṛu darua salaba'u su manga wuune.

²⁴ Manga sal᷊aba'u wuune udde ṛinone isampa'u wageangngu leddane, masal᷊a watukku wageangngu rosone. Darua sal᷊aba'u apan naola'a wuune ṛinone alaanna ere olangnge udde.

²⁵ Nariaddi sarangkanambone pia ual᷊u angkaluanna ringannu mapul᷊o annumma apampakka sal᷊a'a, darua wowane suapan sal᷊aba'u.

²⁶ Pa'ola'e mapul᷊o lima alu uaware wuassu alu akasia, lima maola'a manga waware su sandiṛṛannu Rasanna,

²⁷ lima lai su sandiṛṛanne waine, wuṛṛu lima lai su sandiṛṛannu Rasanna wageangngu liudde samba'an waṛṛatta.

²⁸ Alu uaware su pattangnganne ṛinone ipasangnga atanggakke mal᷊oara wuassu sal᷊aba'u, wuassu pentakke maddatingngu pentakku Rasanna udde.

²⁹ Diṛṛin Dasanna wuṛṛu manga alu wawarene udde ṛinone oosannu wul᷊awanna. Manga hal᷊angnge ipanaṛṛangnga manga alu udde ṛinone olaanna wuassu wul᷊awanna.

³⁰ Darisiṛṛa'e Rasanna udde tumuṛṛuttu riinna apan nipasingkatta si'o su puiddu wowone indi.

³¹ Pa'ola'e sambau mal᷊aṛṛenessa lal᷊indummu ngara wuassu linen al᷊ussa apan niraddu'a ringannu wol ma'elomma, ungu wuṛṛu maṛṛamu. Hambareten mala'ekatta mal᷊aṛṛenessa udde.

³² Elea'e pampele udde su appata diṛṛi alu akasia apan aoosannu wul᷊awanna ringannu aaitta wul᷊awanna wuṛṛu pasea'e su wowon apampakke sal᷊a'a.

³³ Addoa'e mal᷊aṛṛenessa su al᷊ungngu raddagu aaitta su atuppu Rasanna. Su liuddu mal᷊aṛṛenessa udde ṛinone iaddo Wantallu Pa'aire apan lal᷊oṛṛoannu watu darua udde. Mal᷊aṛṛenessa udde uawallata Wabbo'a Susi wuṛṛu Wabbo'a Lembon Susi.

³⁴ Addoa'e lal᷊uubbu Wantallu Pa'aire su wowon bantalla.

³⁵ Meddan sasamba ṛinone iaddo su liuddu Wabbo'a Lembon Susi su wageangngu sawannakka, wuṛṛu leddan sol᷊o su wageangngu timukka sulal᷊ummu Rasanna udde.

³⁶ Pa'ola'e pampele ngaran Dasanna wuassu linen al᷊ussa apan niraddu'u wol ma'elomma, ungu wuṛṛu maṛṛamu, laggaṛṛannu hambaranna.

³⁷ Su pampele udde ṛinone olaanna liman bua diṛṛi wuassu alu akasia apan aoosannu wul᷊awanna wuṛṛu isampa'u lima aaitta wul᷊awanna. Pa'ola'e liman bau apampakka wuassu witu'a su manga diṛṛi udde.”