SASABANGNGA 24 - WUKE SUSI WATTI'U AL᷊AL᷊USASSA

Pa'aire nitohassa

¹ Wua'udde Mawu nabbisara si Musa, “Rangante sumaruanna si Ya'u, i'o suadio'i Harun, i Nadab wuṛṛu i Abihu, wuṛṛu pitun pul᷊o piaṛṛa'u walahanna, wuṛṛu al᷊intudate passubba si Ya'u wuassu marau.

² Tumba'u i'o sassane wotongnge rumanta mangundani-U. Ingana'a waine tawe wotongnge rumanta marani-rani, ewe'e tumanangnge lai tawe wotongnge suma'a wowone indi.”

³ Ana see i Musa inaite wuṛṛu namasingkatta su walahanna udde anambon parenta wuṛṛu atorannu Mawu. I mangitou sarangkanambone sinumimbakka sangkaṛṛindo'a, “Yami ma'apulu tumuṛṛutta anambon parenta apan niwisaran Mawu.”

⁴ Wua'udde i Musa namoṛṛettu anambon parentan Mawu. Tiṛṛabbine marua'allo, i tou napararisikku sambau mezbah ringannu mapul᷊o dua palene su wawal᷊annu wowone udde; suapan palene uaapiddu arannu mapul᷊o dua ṛuangannu Israel.

⁵ Ana see i Musa nandolokku manga pira umbasanna, wuṛṛu i mangitou nangongolu sasamba itattambunna su Mawu wuṛṛu namototta manga pira sapi maola'a sasamban paddarame.

⁶ Sambageanganna wuassu daṛṛan sapi udde nianun i Musa wuṛṛu nilal᷊inna sulal᷊ummu manga tinaṛṛiti. Sambageanganna lai nilal᷊inna su wowon mezbah.

⁷ Wua'udde i tou nanganu wuken pa'aire apan wawoṛṛetannu manga titan Mawu, wuṛṛu niwasan tou ringannu tingikka ma'ikkata su walahanna udde. Unni mangitou, “Yami ma'apulu tumuṛṛutta Mawu wuṛṛu mapaamattu al᷊awo'u parenta-Ne.”

⁸ Ana see i Musa nanganu daṛṛa sulal᷊ummu manga tinaṛṛiti udde wuṛṛu nialassa su tumana'u soa. Wisarane, “Daṛṛa indi mannohassa pa'aire Mawu ringanni yamiu pangaiananne wuassu manga parenta-Ne.”

⁹ Wua'udde i Musa, i Harun, i Nadab, i Abihu wuṛṛu siri pitun pul᷊o piaṛṛa'a udde sinumaate wowone,

¹⁰ wuṛṛu i mangitou naasilote Ruata Israel uarisikka al᷊iurosone su sambau tampa naal᷊ihidda apampakku wal᷊en wuassu nilam, wuṛṛu ma'elomma naal᷊ihidda langitta masemakka.

¹¹ Manga piaṛṛa'u Israel udde naasilote Ruata; salaiwe aṛṛoddi i Tou tawe namate si mangitou. Wua'udde i mangitou niumante wuṛṛu na'inumpe.

I Musa su Wowon Sinai

¹² Wua'udde Mawu nabbisara si Musa, “Rantate ringang-Ku su puiddu wowone. Isudde sarun Ta'u ionggolla si'o watu darua apan buatte Ta'u niwoṛṛetannu anambon tita-U. Anambon tita udde Ta'u nionggolla maola'a al᷊aṛṛa'a su walahanna udde.”

¹³ Ana see i Musa wuṛṛu i Yosua mallalal᷊imane nasasadiate wuṛṛu i Musa sinumaate wowone atatanaannu Mawu udde.

¹⁴ I Musa buatte nannanata manga piaṛṛa'u Israel, “Paṛṛaddote su rasanna indi ma'oman sara yami mabelengnga. I Harun wuṛṛu i Hur indi suadio'a ringanni yamiu. Isai apan pia hatto, wotongnge sumaruanna sitarua tadea'u hatto udde maatokka.”

¹⁵ I Musa sinumaate Wowon Sinai, ana see i tou nioopannu winabbawa.

^16-17 Semakku darantan Mawu niumonto'a su wowone udde wuṛṛu taumatan Israel naasilo semakka naal᷊ihidda putungnga lukkenggamma su puiddu wowone. Annummu allo al᷊annune winabbawa udde uaoossa wowone udde, wuṛṛu su allo appitune Mawu namago si Musa wuassu winabbawa udde.

¹⁸ Ana see i Musa sidutu sussa'a na'oman sara i tou sinumutta sulal᷊ummu winabbawa udde. Appatu pul᷊o su allone appatu pul᷊o su ṛabbine i Musa uatana'a isudde.