SASABANGNGA 21 - WUKE SUSI WATTI'U AL᷊AL᷊USASSA

Su ola'u mammarenta allangnga

¹ Ana see Mawu nabbisara si Musa, “Onggol᷊a'e su manga taumatan Israel manga atoranna indi:

² Amungkangngu i yamiu mamalli sangkatou allangnga wuassu walahannu sassane, i tou ṛinone mammanara ringannu al᷊annune annummu tonna. Sul᷊alummu tonna appitune i tou ṛinone ipallossa wuṛṛu tate iapa'awaekka manga apa.

³ Unnu wisara i tou ta'e umbasanna su tempo i tou naola'a allangngu, ne awingnge tawe wotongnge tumantalongnga su tempo i tou sumabbangnga. Arawe unnu wisara i tou buatte na'awingnga su tempo naola'a allangngu, awingnge wotongnge tumantalongnga suadio'a ringanni tou.

⁴ Amungkangngu mawune nangawingngi tou ringannu sangkatou wawine, ana see i tou naasomba ana'a, ne awingnge wuṛṛu anangnge udde maola tatahuanannu mawune, wuṛṛu tawe wotongnge tumantalongngu allangnga udde su tempo i tou ipallossa.

⁵ Arawe unnu wisara allangnga udde namasingkatta manungku i tou marangngu awingnge, manga anangnge, wuṛṛu mawune, wuṛṛu maddirite ipallossa,

⁶ ne mawune ṛinone mangapiddi tou watukku tampa patataṛṛamawuanna. Poiaroddi allangnga udde irolokka rumarisikka uasaṛṛadda su ngara ara'e su diṛṛin ngaran patataṛṛamawuanna, wuṛṛu mawune ṛinone mamebbetta tal᷊ingan allangnga udde. Ne i tou sarun mabbal᷊i allangnge su al᷊o'engngu pabbiaṛṛanne.

⁷ Amungkangngu sangkatou wawinen Ibrani niwal᷊u'u iamangnge maola'a allangnga, wawine udde tawe iapallossa napawe anumpe su tonnane, nariaddi uapapaṛṛalan allangnga esakka.

⁸ Amungkangngu i tou tawe maal᷊uassa mawune apan pia naungnga ma'awingngi tou, ne i tou ṛinone iwal᷊u'a apia su hagurangnge. Wawine udde tawe wotongnge iwal᷊u'a su taumata raho, ana waugu i tou buatte niola'u mawune tawe su ṛinone apan tawe nanipussa paddariandine.

⁹ Amungkangngu pia sangkatou mamalli allangnga wawine maola'a awingngu anangnge, allangnga wawine udde ṛinone olaanne naal᷊ihidda anangnge sassane.

¹⁰ Amungkangngu ana'a esakka udde ma'awingnga apia, i tou sidutu mangonggollu wiakka wuṛṛu laubba see lai sarangkanambone ere buatte nionggola su awingnge paarorone.

¹¹ Amungkangngu i tou tawe manuungngu winabbawa udde, i tou ṛinone mamallossu awingnge udde ringannu tawe manengkamma roitta wawaekke.”

Atoranna su ola'u araṛṛagissa

¹² “Isai apan mamuulla taumata waine maddatingngu mate, ṛinone iṛṛuumanna pateanna.

¹³ Arawe amungkangngu i tou namuulla ringannu tawe nipattatudda wuṛṛu tawe pandumma mamate, i tou wotongnge tumal᷊angngu watanganne su sambau tampa apan ta'u ita'e si'o, wuṛṛu poiaroddi i tou sarun maasomba tul᷊unganna.

¹⁴ Arawe amungkangngu sangkatou masa'u wuṛṛu ringannu nipattatudda mamate taumata waine, wua'udde i tou tumal᷊angnga su mezba-U tadea'u maasomba tul᷊unganna, taumata udde ṛinone al᷊apanna wuassu mezbah wuṛṛu iṛṛuumanna pateanna.

¹⁵ Isai apan namuulla iamangnge ara'e inangnge ṛinone iṛṛuumanna pateanna.

¹⁶ Isai apan natal᷊angngu sangkatou taumata, ṛinone iṛṛuumanna pateanna, tanne taumata udde buatte niwal᷊ungnge ara'e ta'e su wal᷊ene.

¹⁷ Isai apan mammontoga iamangnge ara'e inangnge, ṛinone iṛṛuumanna pateanna.

¹⁸ Amungkangngu sulal᷊ummu pabbawawul᷊o pia sangkatou apan namuullu watu su taumata waine ara'e nango'a, arawe tawe namate si tou, i tou tawe iṛṛuumanna. Amungkangngu taumata apan nipuulla udde nawantingnga ana waugu nio'a,

¹⁹ arawe wua'udde nararisikka wuṛṛu niumamatta apia ringannu ta'inna, taumata apan namuulla ṛinone mangundamma si tou ma'oman sara mapia wuṛṛu mamaekka su al᷊annune i tou maradda'a.

²⁰ Isai apan mamuulla allangnge esakka ara'e waawine na'oman sara allangnge udde nasal᷊a nate, ṛinone i tou iṛṛuumanna.

²¹ Arawe amungkangngu allangnga udde tawe nate sulal᷊ummu massallo ara'e dua allo, mawune udde tawe iṛṛuumanna. Ararugi apan naṛṛia'a si tou ana waugu niawul᷊iannu allangnge udde maola'a sambau ṛuumanna si tou.

²² Amungkangngu manga siri pira esakka tantal᷊anna uawawul᷊o wuṛṛu sangkatou suwallati mangitou piaddu naal᷊essa su sangkatou wawine pia illoṛṛone na'oman sara i tou nanawoanna, arawe tawe angngone su wageangnge waine, taumata udde ṛinone mamaekka denda anambone ere raddorongannu awingnge wuṛṛu asingkatannu manga mallaṛṛuungnga.

²³ Arawe amungkangngu wawine udde nasilaka lembon wahewalla, ne ṛuumannu al᷊al᷊eo udde eteudde niawa hantiannu niawa,

²⁴ mata hantiannu mata, isi hantiannu isi, ta'iakka hantiannu ta'iakka, ledda hantiannu ledda,

²⁵ lessa hantiannu lessa, lessa nal᷊oso hantiannu lessa nal᷊oso, hoggo'a hantiannu hoggo'a.

²⁶ Isai mamuulla mata allangnga ma'oman sara mawuta, ṛinone mamallossu allangnga udde maolaa'a wawaekku matane udde.

²⁷ Amungkangngu sangkatou mamuulla allangnge ma'oman sara mapaddi isine, i tou ṛinone mamallossu allangnga udde maola'a wawaekku isine udde.”

Manara manga taumata apan uatahuanna darotongnga

²⁸ “Amungkangngu pia sambau sapi esakka nanandu'a sangkatou taumata na'oman sara nate, sapi udde ṛinone pateanna ringannu tuntungannu watu, wuṛṛu ṛemenne tawe wotongnge inasanna, arawe tatahuanne tawe iṛṛuumanna.

²⁹ Amungkangngu sapi esakka udde anaramme mannandu'a, wuṛṛu tatahuanne buatte niapanaungnga, arawe tawe nallu'adda winatangnga udde, ana see amungkangngu sapi esakka udde nanandu'a sangkatou taumata naddatingngu nate, ne winatangnga udde ṛinone pateanna ringannu tuntungannu watu wuṛṛu tatahuanne lai ṛinone iṛṛuumanna pateanna

³⁰ Arawe amungkangngu tatahuannu sapi udde niwala mamaekka sal᷊ane, i tou ṛinone mamaekka anambone nassulungngu raddoronganna ipanubbussa niawane.

³¹ Amungkangngu nate udde sangkatou ana'a esakka ara'e wawine, atoranna udde lai iappaatta.

³² Amungkangngu niapate udde sangkatou allangnga esakka ara'e wawine, tatahuannu sapi ṛinone mamaekka tallun pul᷊o roitta sal᷊a'a su tatahuannu allangnga udde, wuṛṛu sapi esakka udde ṛinone tuntungannu watu ma'oman sara mate.

³³ Isai apan nanganu lal᷊aabbu paṛṛihi ara'e na'al᷊i paṛṛihi wuṛṛu tawe nilaawanna, ana see sambau sapi esakka ara'e keledai nanawo sulal᷊umme,

³⁴ tatahuannu paṛṛihi udde ṛinone mamaekka sal᷊ane su tatahuannu winatangnga udde, arawe i tou wotongnge mangal᷊appa winatangnga apan natete udde su watanganne.

³⁵ Amungkangngu pia sapi erakku sangkatou namate sapi esakku taumata waine, tatahuanne ruan katou udde ṛinone mabbal᷊u'u winatangnga apan ta'e wiakka udde wuṛṛu mattahia roinne. Itarua lai mattahia ṛemessu winatangnga apan natete udde.

³⁶ Arawe amungkangngu niasingkatante manungku sapi esakka udde inanaramanne mannandu'a, wuṛṛu tatahuanne tawe mallu'adda, i tou ṛinone mallanna'a ringannu sapi esakka apan ta'e wiakka, wuṛṛu wotongnge manganu winatangnga apan natete udde su watanganne.”