SASABANGNGA 20 - WUKE SUSI WATTI'U AL᷊AL᷊USASSA

Mapul᷊o Tita

¹ Ana see Ruata nabbisara, wuṛṛu indiwe manga wisara-Ne,

² “Ete i Ya'u Ruatanu apan nangapiddi yamiu sinumabbangnga wuassu Mesir su tampa i yamiu niallangnga.

³ Imbaṛṛangnga masubba manga Mawu waine. Passubbate si Ya'u.

⁴ Imbaṛṛangnga i'o ma'ola'a paal᷊uanna hun su batangannu apan lihidde ere roso su langitta, su runia ara'e sulal᷊ummu ua'e su al᷊ungngu runia.

⁵ Imbaṛṛangnga massubba paal᷊uanna ere udde, ana waugu ete i Ya'u Ruatanu, wuṛṛu i Ya'u maddiri isul᷊ungngu sarangkanambone. Manga taumata apan maddanting-Ku, Ta'u iṛṛuumanna sara ṛawanna atallune wuṛṛu aiappanne.

⁶ Arawe i Ya'u mapal᷊iatta'u darangngu-U su ṛiwune papapulunnu manga taumata marangngu si Ya'u wuṛṛu matuṛṛutta tita-U.

⁷ Imbaṛṛangnga managon arang-Ku walate asagone, ana waugu i Ya'u, Ruatanu, makkuumanni sai-sai apan walate assagoneng arang-Ku.

⁸ Laghua'awe allon Sabat wuṛṛu addate allo udde maola'a allo apan na'ukkassa.

⁹ I yamiu Ta'u nionggol᷊annu annummu allo ipammanara,

¹⁰ arawe allo appitune uddewe allo pangillol᷊oanna apan niṛṛae tumba'u hunane si Ya'u. Su allo udde tawe saran sangkatou apan botongnge mammanara, mawae i yamiu, ara'e lai manga anangngu, manga allangngu, winatangngu ara'e taumata raho apan uatana'a su wanuanu.

¹¹ Sulal᷊ummu tempo annummu allo, i Ya'u, Mawu, na'ola'a runia, langitta, tahal᷊oangnga, wuṛṛu al᷊awo'a sulal᷊umme, arawe su allo appitune i Ya'u nangillol᷊o. Ana waugu udde i Ya'u, Mawu, nangal᷊amatta allon Sabat wuṛṛu niṛṛae passubanna si Ya'u.

¹² Pangaddata iamangngu wuṛṛu inangngu, tadea'u i yamiu mabbiaka su lal᷊umanna'a wuṛṛu mabbiakka malannu su wanua apan sarun Ta'u ionggolla si yamiu.

¹³ Imbaṛṛangnga mamate.

¹⁴ Imbaṛṛangnga sumandaga.

¹⁵ Imbaṛṛanganga manna'o.

¹⁶ Imbaṛṛangnga mattiala awusu su ola'u taumata waine.

¹⁷ Imbaṛṛangnga numemma darotongngu taumata waine, wal᷊ene, awingnge, manga allangnge, winatangnge, keledaine, ara'e sarangkanambone apan tatahuananne.”

Taumatan Israel matta'utta

¹⁸ Napawe manga taumata naaringikka rallu'a wuṛṛu tingikku trompeta, apiddu naasilo sawallo wuṛṛu wowone pia timbulla, i mangitou mangngiladda matta'utta wuṛṛu dirumarisikka marau-rau.

¹⁹ Unni mangitou si Musa, “I'o pabbatti'a si yami, yami sarun maddaringikka; arawe ariewe Ruata mabbisara si yami, aṛṛengenne yami mate.”

²⁰ I Musa sinumimbakka, “Arie pa'ata'utta. Ruata dirumanta tumba'u manal᷊u'atta si yamiu tadea'u i yamiu sidutu matuṛṛutta, wuṛṛu tawe ma'ola'a rosa.”

²¹ Arawe manga taumata udde sidutu uarisikka marau-rau, wuṛṛu tumba'u i Musa nangundannin winabbawa marandumma su tampan Duata nirumanta.

Atoranna su ola'u mezbah

²² Mawu namarenta si Musa iapaiwal᷊o su walahannu Israel, “I yamiu naasilote ereapa i Ya'u, Mawu, nabbisara si yamiu wuassu langitta.

²³ Imbaṛṛangnga aola'a su watangannu manga paal᷊uanna sal᷊a'a ara'e wul᷊awanna apan subbanni yamiu wal᷊ine wuassi Ya'u.

²⁴ I Ya'u ola'ete sambau mezbah waussu leta'a, ana see onggola'e isudde domba wuṛṛu sapinu maola'a sasamba itattambunna wuṛṛu sasamba paddarame. Su al᷊awo'u tampa apan buatte nitantunna si yamiu maola'a tampa patataṛṛamawuanna si Ya'u, i Ya'u sarun dumanta wuṛṛu mangal᷊amatta si yamiu.

²⁵ Amungkangngu i yamiu ma'ola'a si Ya'u sambau mezbah wuassu watu, imbaṛṛangnga olaanna wuassu watu nipaangnga, ana waugu amungkangngu i yamiu mappaattu papaangnga ipama'a watu, mezbah udde tate iapaatta si Ya'u.

²⁶ Imbaṛṛangnga maparisikku mezbah apan matanggakka na'oman sara ṛinone suma'e ringannu tuadda, tadea'u tawe asiloanna wageangngu wadangngu apan tawe ṛinone ellehanna.”