SASABANGNGA 17 - WUKE SUSI WATTI'U AL᷊AL᷊USASSA

Ua'e wuassu watu wahewa

¹ Wua'udde walahannu Israel sarangkanambone nanantangu wadda'u Sin wuṛṛu mangngingkate wuassu tampa sambau watukku tampa waine ere buatte nirolokku Mawu. Su allo sambau i mangitou naddasanna su Rafidim, arawe isudde tawe ua'e pa'inumanna.

² Ana see i mangitou sussawutulle si Musa wuṛṛu nabbisara, “Yami onggol᷊ewen ua'e pa'inumanna.” I Musa sinumimbakka, “Anio i yamiu sussawutulla wuṛṛu mannal᷊u'atta Mawu?”

³ Arawe manga taumata udde mangke tumaniten marou wuṛṛu i mangitou sidutu sussawutulla si Musa. Unni mangitou, “Anio i'o nangapiddi yami sinumabbangnga wuassu Mesir? Tadea'u yami, manga ana'i yami wuṛṛu winatangngi yami mate marou?”

⁴ Ne i Musa sinumal᷊andete Mawu, wisarane, “Apa ṛinone ta'u olaanna su manga taumata indi? Pa'ellege, i mangitou ma'apulu manuntungngu watu si ya'u.”

⁵ Unnu Mawu si Musa, “Waggoite siri pira taumata piaṛṛange wuṛṛu amata'e suadio'a ringanni mangitou malliu ṛoro balahanna udde. Apira'a lai ta'inna apan nipaatta pinamuulla Sal᷊ukku Nil.

⁶ I Ya'u sarun rumarisikka su saruannu su wowon sambau watu wahewa su Wowon Sinai. Puulle watu udde, ne ua'e sarun sumabbangnga na'oman sara manga taumata udde wotongngete ma'inumma.” I Musa na'ola'a aroddi aellehannu manga piaṛṛa'u Israel.

⁷ Tampa udde nisaggo Masa ana waugu ete su tampa udde taumatan Israel nanal᷊u'atta Mawu su tempo i mangitou naiwal᷊o, “Tanne Mawu uarundinganna si ite ara'e tawe?” Tampa udde lai isassago Meriba ana waugu su tampa udde taumatan Israel sussawutulla.

Pangalo ringannu taumatan Amalek

⁸ Wua'udde taumatan Amalek nirumanta wuṛṛu namangalo taumatan Israel su Rafidim.

⁹ Unni Musa si Yosua, “Pamilete manga siri pira taumata inai mamangalo taumatan Amalek. Tiṛṛabbi ya'u sarun dumarisikka su puiddu wuidda mangagassa ta'inna apan niapaapiddu Mawu.”

¹⁰ I Yosua tinumuṛṛutta apa apan nirolokki Musa si tou. I tou inaite namangalo taumatan Amalek, tantal᷊anna i Musa, i Harun wuṛṛu i Hur sinuma'a wuidda naddatingngu puidde.

¹¹ Su al᷊annune i Musa uawatten limane, taumatan Israel naauntunga. Arawe napawe ta'iakki Musa maado wowa, ete taumatan Amalek apan maauntunga.

¹² Napawe i Musa nal᷊otakke, i Harun wuṛṛu i Hur nanganu sambau watu tadea'u i Musa wotongnge uma'ianna; i Harun wuṛṛu i Hur uarisikka su samba'a aiṛṛi wuṛṛu aikkatanni Musa uatumpulla limane tadea'u sidutu uawatte maddatingngu matannallo umattuppa.

¹³ Panginsueanne taumatan Amalek niawaddon i Yosua.

¹⁴ Mawu nabbisara si Musa, “Woṛṛeta'e ola'u auntunganni yamiu indi tadea'u sidutu nannaunganna. Wal᷊oa'a si Yosua manungku i Ya'u sarun mamate taumatan Amalek.”

¹⁵ Ana see i Musa napararisikku sambau mezbah wuṛṛu nisago “Eteudde Mawu Waneṛṛa'u.”

¹⁶ Unni Musa, “Wattea'e paatanggakka waneṛṛa Mawu! Mawu napapangalo nandoappa taumatan Amalek saran mal᷊annu-l᷊annu!”