SASABANGNGA 1 - WUKE SUSI WATTI'U AL᷊AL᷊USASSA

Manga taumatan Israel niola'a allangnga su Mesir

¹ I Yakub apan isassago lai Israel, inaite watukku Mesir ringannu al᷊aṛṛanangnge wuṛṛu amonanni mangitou sambau-sambau. Manga ana'i Yakub eteudde:

² I Ruben I Simeon I Lewi I Yehuda

³ I Isakhar I Zebulon I Benyamin

⁴ I Dan I Naftali I Gad I Asyer.

⁵ Papapulunni Yakub udde sarangkanambone pitun pul᷊o su atoune. I Yusuf doronete uatana'a su Mesir.

⁶ Manga pira tempo wua'udde i Yusuf wuṛṛu manga tuṛṛangnge natete, aroddi lai manga taumata sanluwane.

⁷ Arawe papapulunni mangitou, eteudde manga taumatan Israel, naṛṛana'e napulunna manambo atonna, wuṛṛu reenganni mangitou a'atambanna mal᷊ihakka atonna, na'oman sara wanua Mesir napene mangitou.

⁸ Wua'udde sangkatou ratu wakku apan waggan i Yusuf mannatakke mammarenta su Mesir.

⁹ I tou nabbisara su tumana'u araratuanne, “Manga taumatan Israel udde maasilaka atonna si ite, ana waugu i mangitou tumanite manambo wuṛṛu mattohasanna wuassi ite.

¹⁰ Unnu wisara nariaddi pangalo, i mangitou sarun maammulu seetti ite wuṛṛu mamangalo si ite, ana see tumal᷊angnga manantangngua wanua indi. I ite ṛinone madea'a lal᷊anne tadea'u i mangitou tawe atambanna anambone apia.”

¹¹ Ne manga taumata Mesir napaatenegu manga mandariaga walahannu Israel, tadea'u mapasusan susan biakki mangitou ringannu mammanara masahadda. I mangitou niwata'a mabbangunna hunan datu Mesir manga soa Pitom wuṛṛu Raamses maola'a punnu pangangadoannu saranapa.

¹² Arawe lembon sassansarannu taumata Mesir, ewe'e lembon aatambanna reengannu taumatan Israel, wuṛṛu nassal᷊iawukke i mangitou su ahewallu wanua udde, na'oman sara taumata Mesir matta'utte mangitou.

¹³ Ana see ringannu maṛṛagissa mannansara taumatan Israel,

¹⁴ wuṛṛu nanansarate wiakki mangitou. Ringannu tawe aakkanne i mangitou niwata'a mammanara masahadda su manga pa'olaanna wal᷊en wuṛṛu su manga wawail᷊anna.

¹⁵ Wua'udde ratu Mesir namarenta si Sifra wuṛṛu si Pua, ruan katou biangnga apan mantul᷊ungngu manga wawinen Ibrani apan mangngunsiwe.

¹⁶ Unnu ratu Mesir, “Su tempo i yamiu mantul᷊ungngu wawinen Ibrani mangunsiwe, paanaunge indi; Amungkangngu ana'a apan niasungkangnga udde esakka, patete i tou! Amungkangngu ana'a apan niasungkangnga udde wawine, wala'e i tou wiakka.”

¹⁷ Arawe biangnga ruang katou udde taumata apam matta'uttu Ruata. Itarua maddiri tumuṛṛutta parentan ratu wuṛṛu namalan anambon ana'a esakka udde wiakka.

¹⁸ Ne ratu namago biangnga darua udde wuṛṛu naiwal᷊o, “Anio iraddua namalan manga ana'a esakka udde wiakka?”

¹⁹ Itarua sinumimbakka, “Wawinen Ibrani wal᷊ine ere wawine Mesir. I mangitou mal᷊uassa atonna mangunsiwe. Tantal᷊anna biangnga taambe nirumanta, anangnge niasungkangke.”

^20-21 Ne Ruata nangal᷊amatta manga biangnga udde wuṛṛu nangonggolu papapulunna sitarua, ana waugu itarua mangngaddata Ruata. Wuṛṛu taumatan Israel aatambanna anambone wuṛṛu matohassa.

²² Ana see ratu nangonggolu parenta indi su tumanangnge, “Suapan ana'a esakku taumatan Ibrani apan wakkute niasungkangnga ṛinone iramme su Sal᷊ukku Nil, arawe anambon anangnge wawine wotongnge iwala wiakka.”