RUT 4 - WUKE SUSI WATTI'U AL᷊AL᷊USASSA

I Boas na'awingngi Rut

¹ I Boas inaite watukku tampa pasasombanna su ngara pasallangannu soa. Napawe i tou ua'iante poiaroddi sinumabbite sangkatou esakka apan suṛṛingiranni Boas udde ta'e amonanni Elimelekh apan ṛepessa. Ana see i Boas namaggo si tou, “Tuṛṛangku, wette a'iante isindi!” Taumata udde nirumanta, ana see niuma'ianna.

² wua'udde i Boas nangahe siri mapul᷊o piaṛṛa'u tumana'u soa udde niuma'ianna lai su sambau isudde. Napawe i mangitou ua'iante,

³ nabbisarate i Boas su taumata apan ta'e tuṛṛangnga udde, “I Naomi nabelengke wuassu Moab. Orassa indi i tou mabbal᷊u'u leta'a pussa'an inawal᷊uanne Elimelekh, tuṛṛangngi ite.

⁴ Wuṛṛu antimangku i'o ṛinone masingkattu ola'u hatto udde. Amungkangngu i'o mappulu mamalli, wal᷊oa'e su saruannu manga taumata apan ua'ianna isindi. Amungkangngu tawe, wal᷊oa'e paasemakka, ana waugu tumba'u iaddua apan pia taṛṛino su hatto udde; i'o paarorone wua'udde i ya'u.” Sasimbakku taumata udde, “Ore, i ya'u sarun mamalli.”

⁵ Ana see unni Boas, “Mapia amungkangngu aroddi. Arawe, amungkangngu i'o mamalli leta'a wuassi Naomi, ne i'o lai ṛinone manganu si Rut, wawinen Moab, inawal᷊uannu ana'i Naomi. Ana waugu, leta'a udde ṛinone sidutu maola'a pussa'an papapulunnu taumata apan natete udde.”

⁶ Taumata udde sinumimbakka, “Amungkangngu aroddi, ne i ya'u tawe maasuungnga. Orassa indi mappianne ta'ute ipallosa hakka'u eteudde taumata apan paarorone mamalli leta'a udde. Tawe gunane i ya'u mamalli leta'a ana waugu leta'a udde sarun mabbal᷊i tatahuanannu papapulungku. Mappianne i'ote pamalli leta'a udde.”

⁷ Su tempo udde amungkangngu taumata mabbal᷊u'a ara'e manal᷊iun sambau darotongnge, ne ipanohassa olangnge udde, inanaramanne mabbawal᷊unge malluatta silopene, ana see ionggola su mamamalline. Etearoddi olangnge manga taumata su Israel mannohassa sambau hatton pamamalli leta'a.

⁸ Ana waugu udde, su tempo taumata udde nabbisara si Boas, “I'ote pamalli,” i tou nalluatta silopene ana see nionggola si Boas.

⁹ Ne unni Boas su manga piaṛṛa'u tumana'u soa wuṛṛu manga taumata waine apan isudde lai, “Allo indi yamiu sarangkanambone maola'a matatialane manungku i ya'u buatte namalli al᷊awo'u pussa'an Elimelekh wuṛṛu al᷊aṛṛanangnge, eteudde i Kilyon wuṛṛu i Mahlon.

¹⁰ Wua'udde lai ya'u maawingngi Rut, wawinen Moab, inawal᷊uanni Mahlon udde maola'a awingku. Ringannu aroddi leta'a udde sidutu maola'a pussa'an amonannu taumata apan natete udde. Wuṛṛu papapulunne lai sidutu sarun uatana'a ringannu tuṛṛangnge wuṛṛu su soane. Paanaunge tuṛṛa-tuṛṛangnga, allo indi yamiu naola'a matatialane.”

¹¹ Manga piaṛṛa'u tumanangnge wuṛṛu taumata waine apan uasemodda isudde nabbisara, “Ore, Naomi maola'a matatialane. Antimanna Mawu ma'ola'a awingngu udde ere i Rakhel wuṛṛu i Lea apan nanungkangngu manambo ana'a si Yakub. Antimanna i'o mangke su wiakke wuṛṛu suwallatu manga taumata wuassu ṛuanganni Efrata wuṛṛu antimanna i'o mangke tumelengnga su Betlehem.

¹² Antimanna al᷊aṛṛana'a apan sarun ionggolu Mawu si'o wuassu wawine indi sarun maola'a amonannu ere i Peres, ana'i Yehuda wuṛṛu i Tamar.”

I Boas wuṛṛu papapulunne

¹³ Ne i Boas nappuluten Rut maola'a awingnge. Mawu nangal᷊amatta si Rut na'oman sara i tou piate illoṛṛo ana see nanungkangken ana'a esakka.

¹⁴ Manga wawine nabbisara si Naomi, “Daralo su Mawu! i Tou buatte nangonggolu sangkatou pulunna esakka si'o su allo indi iapapadul᷊i si'o. Antimanna ana'a udde sarun tumelengnga su Israel!

¹⁵ Mananambonu udde tumaniten marangngu si'o. I tou buatte nangonggola si'o nilumebbe wuassu apa apan wotongnge ionggolu siri pitu anangngu esakka. Orassa indi buatte nangonggolu pulunna esakka lai si'o, apan sarun mangonggolu atatohassa wakku si'o wuṛṛu mamadul᷊i si'o su tempo i'o timmadete.”

¹⁶ I Naomi nangambi ana'a udde ana see niapadul᷊ianante ringannu aakkanna wuṛṛu darangngu.

¹⁷ Manga wawine al᷊indonganni mangitou nangonggolu aranna su ana'a udde i Obed. Su al᷊awo'u taumata i mangitou mabbisara, “Naomi naasombate sangkatou ana'a esakka!” Ete i Obed indi apan sal᷊immurine naola'a iamangngi Isai, wuṛṛu i Isai iamangngi Daud.

^18-22 Wuṛṛu ete indi akkitu palalawanni Daud, manattakka wuassi Peres, eteudde: Peres, Hezron, Ram, Aminadab, Nahason, Salmon, Boas, Obed, Isai, Daud.