RUT 2 - WUKE SUSI WATTI'U AL᷊AL᷊USASSA

I Rut nammanara su wailli Boas

¹ I Naomi pia sangkatou tuṛṛangnga wuassu awingnge, i Elimelekh. Taumata udde ala wuṛṛu lai a'addatanna. Aranne i Boas.

² Su allo sambau i Rut nabbisara si Naomi, “Mama, i ya'u madorongnga inai su wailla mamurutta ganduma apan asinungka manawo wuassu liman mangangitingnga. I ya'u mammendamma asinungka pia taumata apan mamala'u ma'ola'a manara udde.” “Ore, ana'a!” sasimbakki Naomi, “roote!”

³ Ne i Rut inaite watukku wailla wuṛṛu namurutta ganduma utantalongnga manga. Inauranna i tou inaite watukku wailli Boas.

⁴ Tawe nal᷊annu wua'udde i Boas nirumanta wuassu Betlehem wuṛṛu nattabea singana'a mangangitingnga. “Antimanna Mawu uaṛundinganna si yamiu,” wisarane. Mangangitingnga sinumimbakka, “Antimanna Mawu mangal᷊amatta si Papa.”

⁵ Ana see i Boas naiwal᷊o mandariaga wawail᷊anne, “Isai wawine udde?”

⁶ Mandariaga wailla udde sinumimbakka, “I tou wawine walahannu Moab apan wakkute nirumanta suadio'a ringanni Naomi wuassu wanua Moab.

⁷ I tou nadorongnga si ya'u tadea'u iwala tumantalongnga wuassu liuddu mangangitingnga tadea'u mamurutta ganduma apan mannawo. Ro'en marua'allo i tou sidutu mammanara wuṛṛu orassa indi wakkute nangillol᷊o talangkadio'a su sambengessa.”

^8-9 Ana see i Boas nabbisara si Rut, “Paddaringikka asuene. I'o lasa'e pamurutta ganduma su waillu taumata waine. Pamurutte isindi suadio'a ringannu mamanara'u wawine. Panantuṛṛutte watukka apa i mangitou mangitingnga. Tantalongke si mangitou wuṛṛu arie marau wuassi mangitou. Amungkangngu i'o marou, panganute ua'e wuassu manga wensada apan buatte niloṛṛoannu manga mamanara esakka. I ya'u buatte namarenta tadea'u i mangitou tawe manal᷊asangngu.”

¹⁰ Naaringikka udde, i Rut niumal᷊intudda su saruanni Boas wuṛṛu nabbisara, “papa, i ya'u tawe su lal᷊anne manengkamma inolaanna apan aroddi apiane wuassi Papa. I ya'u indi taumata raho, wuṛṛu tawe su lal᷊anne maasomba darangngu wuassi Papa!”

¹¹ I Boas sinumimbakka, “I ya'u naaringikke, su ola'u al᷊awo'u apa apan buatte niolangngu su la'ianannu, napawe awingngu natete. I ya'u masingkata manungku i'o buatte nanantangngu hagurangngu wuṛṛu wanuanu ana waugu rumanta wuṛṛu matana'a isindi suadio'a ringannu taumata apan taambe niasingkatannu.

¹² Antimanna Mawu mabbal᷊issa al᷊awo'u apapianu. Antimanna i'o manengkamma al᷊awo'a apan ṛinone ionggolu Mawu, Ruatan Israel si'o, ana waugu i'o nirumantate mangimanna wuṛṛu uasirungnga si Tou!”

¹³ I Rut sinumimbakka, “i Papa mapia atonna si ya'u, salaiwe i ya'u tawe nassul᷊ungngu mamamanaran Papa. Asasaṛṛionto'i Papa naal᷊uassa naungku.”

¹⁴ Napawe nia'omante tempone umanna, i Boas nabbisara si Rut, “Wette umanna. Indi lal᷊andinne.” Ne i Rut niumante suadio'a ringannu mangangitingnga. I Boas nangonggolu lai ganduma mamara si tou. Wuṛṛu i Rut niumanna mal᷊ai-l᷊aidda. Wua' inumanna, ta'e pia lai lambene.

^15-16 Wua'udde i Rut inaite apia namurutta ganduma. Napawe i tou inaite aroddi, i Boas nabbisara su mangangitngnge, “Amungkangngu i tou mamurutta ganduma apan buatte niwa'issa, wala'e aroddi. Imbaṛṛangnga mamansili si tou ara'e mamul᷊o si tou. Mappianne i yamiu manawutta passambua wuassu ganduma apan buatte niwa'issa udde, wuṛṛu iema'a si tou tadea'u i tou mamurutta.”

¹⁷ I Rut sidutu mammurutta gandumma su wailla na'oman sara wawallo. Napawe i tou mammapa'e manga raen ganduma lapiddu ipamallosu watune wuassu raene, inauranna i tou napangallude iraṛṛangngo mapul᷊o su kilone.

¹⁸ Wua'udde i tou napul᷊ete su soa ringannu uaapiddu ina'ule nipurutta udde wuṛṛu niapasilo su la'iananne sangkura anambone apan buatte nipurunne. Wuṛṛu i tou lai nangonggola su la'iananne udde anna apan tawe nasue su tempo i mangitou niumanna.

¹⁹ Ne i Naomi na'iwal᷊ote si tou, “Wuassuapa i'o naasomba sarangkanambone indi? Su wailli sai i'o nammanara allo indi? Antimanna Ruata mangal᷊amatta taumata apan na'ola'a si'o ringannu mapia!” Ne i Rut nabbatti'a si Naomi manungku wailla su tampa i tou namurutta gandumma udde eteudde pussa'an sangkatou esakka aranne i Boas.

²⁰ “Ana'a, taumata udde tuṛṛangngi ite ta'e ṛepessa,” unni Naomi. “Ete i tou apan ṛinone mabiakka si ite. Antimanna Mawu mangal᷊amatta si tou. Mawu sidutu manipussa pa'aire-Ne, mawae ete su taumata apan ta'e wiakka ara'e lai si mangitou apan natete.”

²¹ Wua'udde i Rut nabbisara apia, “Mama, taumata udde nabbisara lai manungku i ya'u wotongnge sidutu mammurutta ganduma suadio'a ringannu manga mamanarane ma'oman sara pangitinganna su wailli tou marampiga.”

²² “Ore, ana'a” sasimbakki Naomi si Rut, “mappianne i'o mammanara suadio'a ringannu mamanara wawine su wailli Boas. Ana waugu amungkangngu i'o inai su wailla wal᷊ine, i'o sassal᷊asaannu taumata poiaroddi!”

²³ Ana waugu udde, i Rut sidutu uatantalongnga mamanara wawine su wailli Boas. I tou mammurutta ganduma poiaroddi na'oman sara pangitinganna marampiga – mawae pangitinganna paarorone aroddi lai pangitinganna sal᷊immurine. Wuṛṛu su al᷊annune udde i Rut uatana'a ringannu la'iananne.