RUT 1 - WUKE SUSI WATTI'U AL᷊AL᷊USASSA

I Elimelekh santaṛṛanaanna nangingkatta watukku Moab

^1-2 Su tempo paarorone tantal᷊anna Israel taambe uatahuanna ratu, wanua Kanaan niarantannu al᷊aṛutumma. Su tempo udde pia sangkatou esakka aranne i Elimelekh. I tou wuassu amonanni Efrata, wuṛṛu uatana'a su Betlehem su wageangngu leta'i Yehuda. Ana waugu ṛutumma udde, ne i tou inaite watukku wanua Moab suadio'a ringannu awingnge i Naomi, wuṛṛu ruan katou anangnge esakka; i Mahlon wuṛṛu i Kilyon. Ana see i mangitou natana'e poiaroddi. Su tempo i mangitou ta'e uatana'a isudde,

³ i Elimelekh natete. Ne natantangnga ete i Naomi wuṛṛu ruan katou anangnge.

⁴ Anangnge ruan katou udde na'awingngu maṛṛualan Moab, aranne i Orpa wuṛṛu i Rut. Mapul᷊o tonna nal᷊iute,

⁵ ruan katou ana'i Naomi udde natete lai, na'oman sara i Naomi niaṛaeanten awingnge arodi lai ruan katou anangnge.

I Naomi wuṛṛu i Rut nabelengnga watukku Betlehem

⁶ Manga pira tempo wua'udde i Naomi naaringikka manungku Mawu buatte nangal᷊amatta walahannu Israel ringannu hessin pangangitingnga apan mapia. Ana waugu udde i Naomi ringannu ruan katou mananambone nasasadiate manantangngu Moab.

⁷ I mangitou inaite su sambau mapul᷊e watukku Yehuda. Su tangngan dal᷊anna

⁸ i Naomi nabbisara sitarua katou mananambone udde, “Iraddua apul᷊ete su wal᷊en inangngu. Antimanna Mawu mapia si raddua ere lai iraddua mapia si ya'u wuṛṛu si mangitou apan natete udde.

⁹ Antimanna Mawu sarun mangonggolu pare siraddua tadea'u iraddua maasomba pamamanua apia.” Napawe buatte nabbisara aroddi, i Naomi nabbal᷊o sitarua wuṛṛu nangaria'a sitarua, Arawe i Orpa wuṛṛu i Rut mangke lulluai mangngintul᷊i,

¹⁰ wuṛṛu nabbisara si Naomi, “Tawe, Mama! Iambua lai tumantalongnga si mama mai ringannu walahanni Mama.”

¹¹ “Arie, ana'a!” sasimbakki Naomi, “iraddua mappianne apul᷊ete. Ma'ura iraddua tumantalongnga si ya'u? Wal᷊inewe i ya'u tate lai mapangunsiwen ana'a maola'a awingngu?

¹² Apul᷊ete, ana'a, ana waugu i ya'u timmadete tate mapa'awingnga apia. Wuṛṛu unnu wisara i ya'u ta'e pia antimma maawingnga ṛabbi indi lai wuṛṛu maasomba ana'a esakka,

¹³ apa iraddua maarangatta i tou mahewalla? Mangal᷊ene ana waugu olangnge udde iraddua maddirite maawingngu taumata waine? Tawe, ana'u, ariewe aroddi! I ya'u massusa apa apan niapendamanni yamiu ana waugu ṛuumannu Mawu si ya'u.”

¹⁴ I Rut wuṛṛu i Orpa nilumuai apia ma'ikka-ikkata wua'udde i Orpa nabbal᷊ote lapiddu nangari'a la'iananne ana see i tou napul᷊ete. Arawe i Rut maddiri maṛṛae wuassu la'iananne udde.

¹⁵ I Naomi nabbisarate si tou, “Rut, pa'ellege! Ipaggu napul᷊ete ringannu walahanne wuṛṛu ringannu manga monganne. I'o lai roote, ana'a, tantalongke si tou mapul᷊e!”

¹⁶ Arawe i Rut sinumimbakka, “Mama, ariete i Mama mandolo'u iapa'apul᷊e wuṛṛu manatangngi Mama! I ya'u maapulu tumantalongnga si Mama. Watukku apa i Mama inai, isudde lai ya'u inai. Suapan tampa i Mama matana'a, isudde lai ya'u maapulu matana'a. Walahanni Mama, udde lai walahangku. Ruata apan sassubbanni Mama, udde lai sarun subbangku.

¹⁷ Suapawe imama mate, isudde lai ya'u mate wuṛṛu ilabbingnga. Doronganna Mawu mangonggolu ṛumanna apan wakkata si ya'u, amungkangngu i ya'u mappulu mattal᷊ei wuassi Mama, tabene'e papate apan mapatal᷊ein kite!”

¹⁸ I Naomi na'ellega manungku i Rut atonna-tonna tumantalongnga, nariaddi, i tou tate nabbisara apia.

¹⁹ Ne itarua nanassukku amatanna na'oman sara naddatingke su Betlehem. Aroddi itarua na'omate poiaroddi, ahewallu soa udde niṛṛumoro. Manga wawine poiaroddi nabbisara, “Atonnawe i tou udde i Naomi?”

²⁰ “Ariete mamago si ya'u i Naomi,” unni Naomi, “i ya'u waggoite i Mara, ana waugu Ruata Apan Lembontaṛṛino buatte namala'u mabbiakka ringannu napenen asasusa.

²¹ Su tempo i ya'u nanantangngu soa indi ya'u mangke su asasuungnga, arawe orassa indi Mawu nangapi'u nabelengnga ringannu lima tawe loṛṛone. Ana waugu udde ariete i yamiu mamago si ya'u i Naomi lai, ana waugu Mawu Apan Lembontaṛṛino buatte nakkuumangku ringannu anambon asasusa!”

²² Ete aroddi watti'a su ereapa i Naomi nabelengnga wuassu Moab suadio'a ringanni Rut mananambone taumata Moab udde. Itarua na'oma su Betlehem su panattaṛṛannu tempon pangangitingnga ganduma.