ROMA 7 - WUKE SUSI WATTI'U AL᷊AL᷊USASSA

Titan paa'awingnga maola'a tul᷊ada

¹ Manga tuṛṛangku! Tuṛṛangnga sarangkanambone naasingkatte tita udde. Nariaddi yamiu masingkata manungku taṛṛinon tita su sangkatou taumata tumba'u mariaddi amungkangngu taumata udde ta'e wiakka.

² Sangkatou wawine apan piate awingnge, tul᷊addane, tuttuṛṛutta titan awingnge amungkangngu awingnge ta'e wiakka. Amungkangngu awingnge natete, i tou nal᷊iute wuassu titan awingnge udde.

³ Amungkangngu wawine udde mabbiakka ringannu sangkatou esakka waine su tempo awingnge ta'e wiakka, ne wawine udde isassago sinumandaga. Arawe amungkangngu awingnge natete, ne sulal᷊ummu tita, wawine udde nal᷊iute. Wuṛṛu amungkangngu i tou naawingnga apia ringannu sangkatou esakka waine, ne i tou tawe sinumandaga.

⁴ Aroddi lai yamiu, manga tuṛṛangku. Su titan agama Yahudi yamiu natete, ana waugu i yamiu buatte niapaaukka ringannu wadangngi Kristus wuṛṛu naola'a pussa'a-Ne apan suete niapaawiakka apia wuassu papate. I Tou niapaawiakka wuassu papate tadea'u i ite maola'a pia gunane su lantakku hatin Duata su al᷊o'engngu pabbiaṛṛani ite.

⁵ Ana waugu dorone, i ite mabbiakka tuttuṛṛutta pallal᷊agun taumata. Su tempo udde manga apulu apan ma'aola'a rosa, apan nilumapputa ana waugu titan agama, uataṛṛino su wadangngi ite. Ana waugu udde i ite ma'ola'a inolaanna apan maapate.

⁶ Arawe orassa indi i ite tate lai aiitannu titan agama Yahudi. I ite natete wuassu tita apan dorone uaparenta si ite. I ite tate lai tumuṛṛutta ere tatuṛṛuta apan dorone, tuttuṛṛutta tita apan uawoṛṛetta. Orasa indi i ite tumuṛṛutte ringannu ta tuṛṛutta wakku apan nipantingiddu Ghaṛṛahon Duata si ite.

Tita wuṛṛu rosa

⁷ Amungkangngu aroddi, apa ipabbisaran kite? Manungku titan agama Yahudi lal᷊eo? Asinungka tawe. Arawe ete tita udde apan nangaṛṛa'a si ya'u su ola'u rosa. I ya'u sarun tawe maasingkatta awawal᷊iu udde apa, amungkangngu tawe titan agama namasingkatta. “Imbaṛṛangnga wal᷊iu.”

⁸ Sulal᷊ummu titan agama, rosa pia tempone mapaal᷊aputu al᷊awo'u apulu apan wal᷊iu sulal᷊ummu naungku, ana waugu amungkangngu tawe titan agama, ne rosa lai mate.

⁹ I ya'u dorone mabbiakka tawe titan agama. Arawe napawe titan agama nirumanta, rosa mannattake mabbiakka wuṛṛu i ya'u natete.

¹⁰ Ne titan agama udde, apan paarorone tuddane mangngonggolu wiakka, ewe'e sal᷊immurine nandantan papate si ya'u.

¹¹ Ana waugu wuassu lal᷊ummu titan agama udde, rosa naasomba tempone namahia wuṛṛu namate si ya'u.

¹² Titan agama udde wuassu Ruata, wuṛṛu al᷊awo'u parenta sulal᷊ummu tita udde nirumanta wuassu Ruata, aroddi atul᷊ide wuṛṛu apiane.

¹³ Ei, apa indi atappasanne manungku apapia udde mandantan papate si ya'u? Asinungka tawe! Tumba'u rosa apan mandantan papate udde. Ringannu mappaattu apapia, rosa mandantan papate si ya'u, tadea'u pallal᷊agun rosa aasiloanna ringannu masemakka. Wuassu lal᷊ummu manga parentan Duata, niatialanna manungku lal᷊eo atonna rosa udde.

Pattatiakka sulal᷊ummu wadangngu taumata

¹⁴ I ite masingkata manungku titan agama Yahudi inasaputanne wuassu Ghaṛṛahon Duata; arawe i ya'u indi taumata lome. I ya'u suete niwal᷊u'a naola'a allangngu rosa.

¹⁵ Ana waugu i ya'u sassane tawe maasunna pallal᷊agu'u. Manga inolaanna apan ipaapulu'u, tawe ta'u olaanna, arawe manga inolaanna ipaadiri'u, udde a'olaangku.

¹⁶ Ne, amungkangngu i ya'u ma'ola'a manga inolaanna apan tawe ipaapulu'u udde, atappasanne manungku titan agama Yahudi udde mapia.

¹⁷ Nariaddi, wal᷊inewe i ya'u pia inolaanna udde, ewe'e rosa apan uaparenta si ya'u.

¹⁸ I ya'u masingkata manungku tawe saran sambau apan mapia sulal᷊ummu riri'u, eteudde su pallal᷊agu'u ere sangkatou taumata. Ana waugu i ya'u lai pia apulu ma'ola'a apapia, arawe i ya'u tawe maatuṛṛutta.

¹⁹ I ya'u tawe ma'ola'a apapia apan ipaapulu'u; arawe i ya'u ma'ola'a inolaanna apan lal᷊eo, apan ipaaddiri'u.

²⁰ Amungkangngu i ya'u ma'ola'a manga inolaanna apan tawe ipaapulu'u, udde atappasanne wal᷊inewe i ya'u apan ma'ola'a manga inolaanna udde, ewe'e rosa apan uaparenta si ya'u.

²¹ Nariaddi, ya'u nakkawessa manungku tita indi ṛinone pangimananni ite: eteudde manungku amungkangngu i ya'u maddiri ma'ola'a apapia, ne tumba'u al᷊al᷊eo apan lumatto su riri'u.

²² Naungku maapulun titan Duata,

²³ arawe i ya'u naatutukka manungku sulal᷊ummu riri'u pia lai tita waine apan uaagassa parenta – eteudde tita apan uapapaṛṛalan tita apan buatte nia'u naungku. Ana waugu udde i ya'u mangke paparentannu titan rosa apan uaparenta sulal᷊ummu riri'u.

^24-26 Ne, aroddite ola'u riri'u: i ya'u tuttuṛṛutta tita Duata ringannu ṛingiṛṛangku, arawe ringannu pallal᷊agu'u ere sangkatou taumata, i ya'u uasuṛṛubawa su rosa. Tumanite nal᷊ongonna i ya'u indi! Isai maapulu manal᷊amatta si ya'u wuassu wadangnga indi apan mangngapi'u su papate? Adiangkamanna su Ruata! I Tou maapulu manal᷊amatta si ya'u sulal᷊ummu Mawu Yesus Kristus.