ROMA 6 - WUKE SUSI WATTI'U AL᷊AL᷊USASSA

Nanantangngu rosa wuṛṛu mabbiakka uaaukka ringanni Kristus

¹ Amungkangngu aroddi, apa apan sarun iwisarang kite? Ṛinonewe i ite sidutu ma'ola'a rosa, tadea'u Ruata lembo mandangngu si ite?

² Tawe! Rosa tate lai uataṛṛino si ite, nariaddi, ṛatadde i ite sidutu mabbiakka ringannu ma'ola'a rosa?

³ Manga tuṛṛangnga masingkata manungku su tempo i ite nissaṛṛani, i ite ni'aukka ringannu Mawu Yesus Kristus? Indi pandumanne i ite iapaaukka ringannu papate-Ne.

⁴ Ringannu sasaṛṛani udde i ite nilabingnga su sambau ringanni Kristus wuṛṛu nate suadio'a ringanni Tou, tadea'u su ereapa Kristus niapaawiakka wuassu papate, wuassu taṛṛinon Iamangnga apan mawantuga, aroddi lai i ite wotongnge maapendama wiakka apan wakku.

⁵ Amungkangngu i ite naaukke ringannu Mawu Yesus, ana waugu i ite nate su sambau ringanni Tou, i ite maola'a sambau ringanni Tou lai, ana waugu i ite buatte niapaawiakka apia ere lai i Tou.

⁶ I ite masingkata manungku pallal᷊agun kite apan tabbe suete nipate su adio'a ringanni Kristus su alu arussa tadea'u taṛṛinon pallal᷊agun kite apan marosa udde niramme; ringannu aroddi i ite tate lai allangngu rosa.

⁷ Ana waugu amungkangngu sangkatou mate, taumata udde mal᷊iu wuassu taṛṛinon dosa.

⁸ Amungkangngu i ite suete nate suadio'a ringanni Kristus, i ite mangngimanna manungku i ite lai sarun mabbiakka su adio'a ringanni Tou.

⁹ Ana waugu i ite masingkatta manungku Kristus buatte niapaawiakka apia wuassu papate wuṛṛu i Tou tate mate apia; papate tate lai uataṛṛino watangan-Ne.

¹⁰ Papate apan naṛṛia'a si Kristus eteudde papate ana waugu rosa. Udde nariaddi tumba'u paassa ma'oman sarangkal᷊o'engnge. Wuṛṛu pabbiaṛṛanna apan buatte niamatan-Ne orassa indi eteudde mabbiakka hunane su Ruata.

¹¹ I yamiu ṛinone maṛṛangngon ririnu lai mate ana waugu rosa, arawe mabbiakka sulal᷊ummu paa'aukka apan matohassa ringannu Ruata sulal᷊ummu Yesus Kristus.

¹² Ariete lai mapaawalan rosa mamarenta pabbiaṛṛanna su runia tadea'u i'o tate tumuṛṛutta apulu apan lal᷊eo.

¹³ Arie lai i'o manantillu wageangngu wadangngu su taṛṛinon dosa ana waugu ipaatta su manga pandumanna apan lal᷊eo. Arawe tantila'e ririnu su Ruata ere taumata apan buatte niingkata wuassu papate watukku pabbiaṛṛanna. Tantila'e ahewallu ririnu su Ruata tadea'u ipaatta ma'ola'a apulu Duata.

¹⁴ Rosa tate wotongnge mamarenta si yamiu, ana waugu yamiu tate mabbiakka su parenta titan agama Yahudi arawe su al᷊ungngu al᷊amattu Ruata.

Allangnga su apulun Duata

¹⁵ Orassa indi apa panginsueanne? Wotongnge i ite ma'ola'a rosa ana waugu i ite tate su parenta titan agama Yahudi, ewe'e su al᷊ungngu taṛṛinon al᷊amattu Ruata? Atonna-tonna tawe!

¹⁶ I yamiu masingkatte manungku amungkangngu yamiu manantillu watangannu su sangkatou ipa'ola'a apulune, ne ete yamiu udde allangngu taumata apan tattuṛṛutanni yamiu – tanne allangngu rosa apan nangapiddi yamiu su papate, ara'e allangnga apan tuttuṛṛutta Ruata, wuṛṛu ringannu aroddi sarun maaukka apia ringannu Ruata.

¹⁷ Arawe adiangkamanna su Ruata! Ana waugu paarorone yamiu naola'a allangngu rosa, arawe orassa indi yamiu ringannu ahewallu naungngu tuttuṛṛutta al᷊aṛṛa'a naṛṛino apan buatte nionggola si yamiu.

¹⁸ Yamiu buatte nipallosa wuassu rosa, wuṛṛu orassa indi naola'e allangngu apulun Duata.

¹⁹ Ana waugu pasasunnanu aroddi al᷊omene, i ya'u mappaattu manga ola'u patataṛṛuallangnga tadea'u i yamiu wotongnge maasunna. Dorone i yamiu mannantillu ririnu maola'a allangngu manga inolaanna apan maarantina wuṛṛu apan lal᷊eo su pandumanna apan lal᷊eo. Aroddi lai orassa indi, ṛinone i yamiu manantillu ahewallu watanganni yamiu maola'a allangngu apulu Ruata su pandumannu Ruata sassane.

²⁰ Su tempo i yamiu paparentannu rosa, i yamiu tawe paparentannu apulun Duata.

²¹ Su tempo udde auntunganna apa apan nisengkammi yamiu wuassu manga inolaanna apan orassa indi maasili si yamiu amungkangngu olaanna? Manga inolaanna udde tumba'u mangapidda su papate!

²² Arawe orassa indi yamiu buatte niapaal᷊iu wuassu rosa, wuṛṛu naola'e allangngu Ruata. Auntungannu eteudde manungku i'o mabbiakka tumba'u hunane su Ruata wuṛṛu su olangnge udde sarun mandantan wiakka tutune wuṛṛu saran mal᷊annu-l᷊annu.

²³ Ana waugu papate udde sombangngu paddarosa; arawe wiakka tutune wuṛṛu saran mal᷊annu-l᷊annu su sambau ringanni Kristus Yesus Mawun kite eteudde aonggolu Ruata si ite ringannu tawe bawal᷊inne.