ROMA 4 - WUKE SUSI WATTI'U AL᷊AL᷊USASSA

Abraham maola'a tul᷊adda

¹ Amungkangngu aroddi, apa apan wotongnge iwisara su ola'i Abraham iupungngu al᷊amonan walahanni ite? Ereapa watti'u pabbiaṛṛanne?

² Amungkangngu manga inolaanne nisengkammu Ruata, na'oman sara i tou nareengnga taumata apan maal᷊uassa naungngu Ruata, ne i tou lai pia pangaiananne lumuassa. Arawe i tou tawe mamunga su saruannu Ruata.

³ Sulal᷊ummu Wuke Susi uawoṛṛetta, “Abraham mangngimanna Ruata, wuṛṛu ana waugu pangangimanne indi i tou tinarimmattu Ruata maola'a sangkatou taumata apan maal᷊uassa naungngu Ruata.”

⁴ Taumata apan mammanara, manarimmattu lal᷊antakke wuṛṛu lal᷊antake udde wal᷊ine maola'a sambau aonggola ana waugu eteudde pussaane.

⁵ Arawe pia taumata tawe mangantimma su manarane sassane; i tou mannantillu watanganne su Ruata apan napaal᷊iatta'a manungku taumata marosa sarun maal᷊iu wuassu passasal᷊ane. Pinangianannu pangangimanne udde Ruata nanarimmatta si tou maola'a taumata apan maal᷊uassa naungngu Ruata.

⁶ Aroddi lai su addapatti Daud; ana waugu i tou nabbisara sal᷊amatte lumala'a su taumata apan buatte tinarimmattu Ruata ere taumata apan maal᷊uassa naung-Nge, wuṛṛu Mawu tawe mandeengngu manga inolaannu taumata udde. Daud nabbisara arendi,

⁷ “Lal᷊umanna'a su taumata apan pasasal᷊ane niampunganna wuṛṛu manga rosane buatte nilabingngu Ruata!

⁸ Lal᷊umanna'a su taumata apan manga rosane tawe nireengu Ruata!”

⁹ Tanne wisara lal᷊umanna'a indi tumba'u wisara su taumata apan tuttuṛṛutta atorannu sunatta? Ara'e lai iwabbisara su taumata apan tawe tumuṛṛutta atorannu sunatta? Buatte nisaggon kami paarorone, manungku Abraham tinarimmattu Ruata maola'a sangkatou taumata apan maal᷊uassa naung-Nge, ana waugu Abraham mangngimanna Ruata.

¹⁰ E, angngerate Ruata mapaal᷊iatta'u olangnge udde? Su tempo Abraham taambe nisunatta ara'e suete nisunatta? Atonna tantal᷊anna i tou taambe nisunatta, wal᷊ine napawe i tou suete nisunatta.

¹¹ I tou nisunatta murine, wuṛṛu sunatti tou tumba'u maola'a sambau tatiala manungku Ruata buatte nanengkamma si tou maola'a taumata apan maal᷊uassa naungngu Ruata. I tou tinarimmattu Ruata su tempo i tou taambe tinumuṛṛutta atorannu sunatta. Wuṛṛu Abraham naola'a iamangngu manga taumata apan mangngimanna Ruata, wuṛṛu ana waugu i tou suete tinarimmattu Ruata maola'a sangkatou taumata apan maal᷊uassa naung-Nge, salaiwe i mangitou tawe tumuṛṛutta atorannu sunatta.

¹² Abraham lai iamangngu manga taumata mangngimanna apan tuttuṛṛutta atorannu sunatta. I tou lai iamangngu manga taumata mangngimanna wal᷊ine tumba'u ana waugu i mangitou tuttuṛṛutta atorannu sunatta, arawe i mangitou lai apan mabbiakka ringannu mangngimanna Ruata, ere lai Abraham su tempo i tou taambe tinumuṛṛutta atorannu sunatta.

Paairen Duata nisengkamma ana waugu mangngimanna Ruata

¹³ Ruata na'ire si Abraham wuṛṛu walahanne manungku runia indi sarun maola'a pussa'an Abraham. Ruata na'ire aroddi wal᷊ine ana waugu Abraham matuṛṛutta titan agama Yahudi, arawe ana waugu i tou mangngimanna Ruata na'oman sara i tou tinarimmattu Ruata maola'a sangkatou taumata apan maal᷊uassa naung-Nge.

¹⁴ Ana waugu amungkangngu tumba'u manga taumata apan tuttuṛṛutta su manga titan agama Yahudi apan sarun manengkamma paairen Duata, ne pangangimanne su Ruata tawe gunane saran adio'a, wuṛṛu paairen Duata lai wahia atonna.

¹⁵ Titan agama Yahudi mandantan ṛuumannu Ruata. Arawe amungkangngu tawe tita, ne tawe lal᷊awangnga lai.

¹⁶ Nariaddi paairen Duata udde pinangaiananne wuassu pangangimannu taumata su Ruata. Udde maola'a sambau paaire su anambon walahanni Abraham manungku paaire udde nionggola si mangitou maola'a sambau aonggola apan tawe bawal᷊inne wuassu Ruata; wal᷊ine tumba'u si mangitou apan matuṛṛutta titan agama Yahudi, arawe si mangitou lai apan mangngimanna Ruata ere Abraham mangngimanna si tou. Ana waugu ete Abraham udde iamangngi ite sarangkanambone, su ola'u pangangimanna.

¹⁷ Ana waugu Ruata nabbisara arendi si Abraham, “I Ya'u suete nandiaddi si'o iamangngu al᷊awo'u walahanna.” Aroddite Ruata nangonggolu paaire udde si Abraham. Wuṛṛu Abraham mangngimanna si Tou. Ete i Tou Ruata apan mapaawiakku taumata nate; ete i Tou lai Ruata apan ringannu tumba'u mabbisara ma'ola'a apa apan taambe naola'a su runia, mariaddi su runia.

¹⁸ Abraham sidutu mangngantimma wuṛṛu mangngimanna salaiwe tate antimma lai. Ana waugu udde i tou naola'a iamangngu al᷊awo'u walahanna. Ere uawoṛṛetta sulal᷊ummu Wuke Susi, “Walahannu sarun mariaddi manambo atonna.”

¹⁹ Abraham tempo udde masingkata manungku i tou tate lai maasomba walahanna, ana waugu i tou tumaniten timmadde, wuṛṛu uukke maranite maṛṛasutta su tonnane; see lai Sara awingnge udde tinna. Arawe pangangimanni Abraham tawe naurangnga.

²⁰ I tou sidutu mangngimanna wuṛṛu tawe mappapadua su paairen Duata. Ewe'e naatohassa lai pangangimanni tou, na'oman sara sidutu i tou mangke maddalo Ruata.

²¹ I tou mangngimanna atonna manungku Ruata wotongnge manipussa paaire-Ne.

²² Ana waugu udde Abraham nitarimmatu Ruata maola'a taumata apan maal᷊uassa naungngu Ruata.

²³ Wisara “tinarimmatta maola'a sangkatou taumata apan maal᷊uassa naungngu Ruata” uawoṛṛetta wal᷊ine tumba'u si Abraham sassane,

²⁴ arawe si ite lai. I ite sarun itarimmata ere sangkatou taumata apan maal᷊uassa naungngu Ruata, ana waugu i ite mangngimanna Ruata apan suete napaawiakku Mawu Yesus, Mawu kite wuassu papate.

²⁵ Mawu Yesus udde buatte tinantilla iapapate ana waugu manga rosan kite, see i Tou niapaawiakku Ruata apia, tadea'u i ite maaukka apia ringannu Ruata.